Molimo ea ‘Ikemiselitseng ho Tšoarela’

1-3. (a) Mopesaleme Davida o ile a jara moroalo ofe o boima, hona o ile a fumanela pelo ea hae e utloileng bohloko matšeliso joang? (b) Ha re etsa sebe, re ka ’na ra jara moroalo ofe empa Jehova o re tiisetsa eng?

MOPESALEME Davida o ile a re: “Liphoso tsa ka li bokellane ka holim’a hlooho ea ka. Li nkimetse joaloka mojaro o boima haholo. Ke utloile bohloko haholo hoo ke seng ke sa utloe letho.” (Pesaleme ea 38:4, 8) Davida o ne a tseba kamoo moroalo oa ho ba le letsoalo le molato o ka bang boima kateng. Empa o ile a fumanela pelo ea hae e utloileng bohloko matšeliso. O ile a utloisisa hore le hoja Jehova a hloile sebe, ha a hloea moetsalibe haeba a hlile a baka ’me a furalla tsela ea hae ea boetsalibe. A kholisehile ka ho feletseng hore Jehova o ikemiselitse ho hauhela ba bakileng, Davida o ile a re: “Jehova . . . u ikemiselitse ho tšoarela.”—Pesaleme ea 86:5.

² Ha re etsa sebe, le rona re ka ’na ra jara moroalo o boima oa ho ba le letsoalo le molato. Boikutlo bona ba ho ikoahlaea bo molemo. Bo ka re susumelletsa ho nka mehato e hlokahalang e le hore re lokise liphoso tsa rona. Leha ho le joalo, ho na le kotsi ea ho sithabetsoa ke boikutlo ba ho ba molato. Lipelo tsa rona tse re ahlolang li ka ’na tsa tsitlella hore Jehova ha a na ho re tšoarela, ho sa tsotellehe hore na re bakile hakae. Haeba re ‘utloile bohloko haholo ebe rea nyahama,’ Satane a ka ’na a leka ho etsa hore re tele, re be le boikutlo ba hore Jehova o re nka re se ba bohlokoa re bile re sa tšoanelehe ho mo sebeletsa.—2 Bakorinthe 2:5-11.

³ Na ke kamoo Jehova a talimang lintho kateng? Le hanyenyane! Ho tšoarela ke tšobotsi e ’ngoe ea lerato le leholo la Jehova. Ka Lentsoeng la hae, o re tiisetsa hore o ikemiselitse ho re tšoarela ha re bontša pako ea sebele le e tlohang botebong ba pelo. (Liproverbia 28:13) E le hore le ka mohla re se ke ra ba le khoao ea hore Jehova a ka re tšoarela, a re hlahlobeng lebaka leo a tšoarelang ka lona le hore na o tšoarela joang.

Lebaka Leo ka Lona Jehova a ‘Ikemiselitseng ho Tšoarela’

4. Jehova o hopola eng ka tsela eo re bopiloeng ka eona, hona see se ama tsela eo a re tšoarang ka eona joang?

⁴ Jehova o lemoha mefokolo ea rona. Pesaleme ea 103:14 e re: “O tseba hantle tsela eo re bopiloeng ka eona, oa hopola hore re lerole.” Oa hopola hore re entsoe ka lerole, re na le likhaello, kapa mefokolo, ka lebaka la ho se phethahale. Poleloana e reng o tseba “tsela eo re bopiloeng ka eona” e re hopotsa hore Bibele e tšoantša Jehova le sebopi ’me rona e re tšoantša le lijana tsa letsopa tseo a li bopang. (Jeremia 18:2-6) Sebopi se Seholo sea tseba hore re baetsalibe hobane re futsitse sebe empa o khetha tsela e nepahetseng ka ho fetisisa ea ho sebetsana le rona ho ea ka hore na rea mo mamela kapa che.

5. Buka ea Baroma e hlalosa tsela e matla eo sebe se khomarelang ka eona joang?

⁵ Jehova oa utloisisa kamoo sebe se leng matla kateng. Lentsoe la hae le hlalosa sebe e le matla a susumetsang a khomaretseng motho ka tsela e bolaeang. Ha e le hantle sebe se khomarela ka matla hakae? Bukeng ea Baroma, moapostola Pauluse o hlalosa hore re tlas’a sebe joaloka masole a tlas’a molaoli oa ’ona. (Baroma 3:9) Sebe “se ile sa busa” batho joaloka morena. (Baroma 5:21) Se teng ho rona. (Baroma 7:17, 20) “Molao” oa sona o lula o sebetsa ka ho rona, ha e le hantle o leka ho laola liketso tsa rona. (Baroma 7:23, 25) Sebe se khomaretse nama ea rona ea boetsalibe ka matla hakaakang!—Baroma 7:21, 24.

6, 7. (a) Jehova o ikutloa joang ha batho ba bakileng e le kannete ba mo kopa hore a ba tšoarele? (b) Ke hobane’ng ha re sa lokela ho nka monyetla ka mohau oa Molimo?

⁶ Kahoo, Jehova oa tseba hore re ke ke ra khona ho mo utloa ka ho phethahetseng, ho sa tsotellehe hore na e ka ’na eaba re lakatsa ka tieo hakaakang ho mo utloa. Ka lerato o re tiisetsa hore ha re kopa tšoarelo ka pelo eohle, o tla re tšoarela. Pesaleme ea 51:17 e re: “Mahlabelo a khahlisang Molimo ke ha motho a hlomohile. Molimo, u ke ke oa iphapanyetsa pelo e utloileng bohloko le e sithabetseng.” Jehova a ke ke a lahla kapa a furalla pelo “e utloileng bohloko le e sithabetseng” ka lebaka la ho imeloa ke ho ba molato.

⁷ Leha ho le joalo, na see se bolela hore re ka nka monyetla ka mohau oa Molimo, ra sebelisa boetsalibe ba rona e le lebaka la ho etsa sebe? Le hanyenyane! Jehova ha a susumetsoe ke maikutlo feela tjee. Mohau oa hae o na le moeli. A ke ke a tšoarela ba ngangellang ho etsa sebe ka boomo, ba sa bake. (Baheberu 10:26) Ka lehlakoreng le leng, ha a bona motho ea soabileng e le kannete, o ikemisetsa ho mo tšoarela. Joale a re hlahlobeng lipolelo tse ling tse hlakileng tse sebelisitsoeng ka Bibeleng ho hlalosa tšobotsi ena e babatsehang ea lerato la Jehova.

Jehova o Tšoarela ka ho Feletseng Hakae?

8. Ha e le hantle Jehova o etsa eng ha a re tšoarela libe, hona rona re ikutloa joang ha a re tšoaretse?

⁸ Davida ea bakileng o ile a re: “Qetellong ka u bolella sebe sa ka. Ha kea ka ka pata phoso ea ka. . . . Eaba u tšoarela libe tsa ka.” (Pesaleme ea 32:5) Lentsoe “tšoarela” le fetolela lentsoe la Seheberu leo ha e le hantle le bolelang “ho phahamisa” kapa “ho jara.” Ho sebelisoa ha lona mona ho fana ka maikutlo a ho tlosa “molato, sebe kapa tlolo.” Kahoo, ha e le hantle Jehova o ile a phahamisa libe tsa Davida ’me a li tlosa. Ha ho pelaelo hore sena se ile sa bebofatsa boikutlo ba ho ba molato boo Davida a neng a bo jere. (Pesaleme ea 32:3) Le rona ka ho tšoanang re ka tšepa ka ho feletseng Molimo ea tlosang libe tsa ba batlang hore a ba tšoarele, motheong oa tumelo ea bona sehlabelong sa Jesu sa tefo ea topollo.—Matheu 20:28.

9. Jehova o suthisetsa libe tsa rona hole hakae?

⁹ Davida o ile a sebelisa polelo e ’ngoe e hlakileng ha a hlalosa kamoo Jehova a tšoarelang kateng, a re: “Feela joalokaha bochabela bo le hole le bophirimela, ka ho tšoanang o suthiselitse liphoso tsa rona hole le rona.” (Pesaleme ea 103:12) Letsatsi le chaba ka bochabela le likela ka bophirimela. Bochabela bo hole hakae le bophirimela? Kamoo ho utloisisoang kateng, bochabela bo lula bo le hole le bophirimela ka hohle kamoo motho a ka nahanang kateng. Ha ho mohla libaka tseo tse peli li ka kopanang. Setsebi se seng se re polelo ena e bolela hore “hole kamoo ho ka khonehang kapa ho isa boholeng boo re ka bo nahanang.” Mantsoe a Davida a bululetsoeng a re bolella hore ha Jehova a tšoarela, o suthisetsa libe tsa rona hole le rona ka hohle kamoo re ka nahanang kateng.

10. Ha Jehova a re tšoaretse libe, ke hobane’ng ha re sa lokela ho ikutloa re le molato ka lebaka la libe tseo re ileng ra li etsa?

¹⁰ Na u kile oa leka ho tlosa letheba seaparong se ’mala o khanyang? Mohlomong ho sa tsotellehe boiteko bo matla ka ho fetisisa boo u ileng oa bo etsa, letheba le ile la sala le ntse le bonahala. Hlokomela kamoo Jehova a hlalosang matla a hae a ho tšoarela kateng, o re: “Le hoja libe tsa lona li le khubelu, li tla ba tšoeu joaloka lehloa. Le hoja li le khubelu tlere! li tla ba tšoeu joaloka boea.” (Esaia 1:18) Re ke ke ra tlosa letheba la sebe ka matla a rona. Empa Jehova a ka tlosa libe tse bonahalang li le khubelu tlere! ’me a li soeufatsa tsa ba joaloka lehloa kapa boea bo sa dauoang. Ha Jehova a re tšoarela libe, ha ho hlokahale hore re qete bophelo bohle ba rona re ikutloa re le molato ka lebaka la libe tseo re ileng ra li etsa.

11. Jehova o lahlela libe tsa rona ka mor’a hae ka kutloisiso efe?

¹¹ Pineng ea teboho e susumetsang eo Ezekiase a ileng a e qapa ka mor’a hore a pholosoe ho kuleng ho bolaeang, o ile a re ho Jehova: “U lahletse libe tsohle tsa ka ka mor’a hao.” (Esaia 38:17) Mona Jehova o hlalosoa a nka libe tsa mofosi ea bakileng a li lahlela ka mor’a hae moo a ke keng a hlola a li bona kapa hona ho li hlokomela. Ho ea ka mohloli o mong, khopolo e fetisoang mona e ka ’na ea hlalosoa ka ho re: “U entse hore [libe tsa ka] eke ha lia ka tsa etsahala.” Na see ha se se khothatsang?

12. Moprofeta Mikea o bontša joang hore ha Jehova a tšoarela, o tlosa libe tsa rona ka ho feletseng?

¹² Tšepisong ea hae ea tsosoloso, moprofeta Mikea o ile a re o kholisehile hore Jehova o tla tšoarela sechaba sa hae se bakileng. O ile a re: “Na o teng Molimo ea tšoanang le uena, . . . ea lebalang melato ea ba setseng ba sechaba sa Iseraele? . . . U tla lahlela libe tsohle tsa bona botebong ba leoatle.” (Mikea 7:18, 19) Ak’u nahane hore na mantsoe ao a ne a bolela’ng ho ba neng ba phela mehleng ea Bibele. Na ho ne ho e-na le monyetla leha e le ofe oa hore motho a boele a fumane ntho e lahletsoeng “botebong ba leoatle”? Kahoo mantsoe a Mikea a bontša hore ha Jehova a tšoarela, o tlosa libe tsa rona ka ho feletseng.

13. Mantsoe a Jesu a reng “u re tšoarele melato ea rona” a bolela’ng?

¹³ Jesu o ile a sebelisa boemo bo pakeng tsa batho ba kolotoang le ba kolotang ho bontša kamoo Jehova a tšoarelang kateng. O ile a re phehella ho rapela, a re: “U re tšoarele melato ea rona.” (Matheu 6:12, Phetolelo ea Bibele ea Lefatše le Lecha) Kahoo Jesu o ile a tšoantša libe le melato. (Luka 11:4) Ha re etsa sebe, re fetoha “ba kolotang” Jehova. Mabapi le moelelo oa leetsi la Segerike le fetoletsoeng e le “ho tšoarela,” buka e ’ngoe ea litšupiso e re: “Ho tlohella molato, ho o lesa, ka ho se o batle.” Ka kutloisiso e ’ngoe, ha Jehova a tšoarela, o hlakola molato oo ho seng joalo re neng re tla o lefisoa. Ka hona baetsalibe ba bakileng ba ka khothala. Le ka mohla Jehova a ke ke a batla hore ba lefelle molato oo a o hlakotseng!—Pesaleme ea 32:1, 2.

14. Polelo “libe tsa lona li tle li hlakoloe” e tlisa setšoantšo sefe kelellong?

¹⁴ Ho tšoarela ha Jehova ho boetse ho hlalosoa ho Liketso 3:19: “Bakang ’me le sokolohe, libe tsa lona li tle li hlakoloe.” Lentsoe lena le qetellang le fetolela leetsi la Segerike le bolelang “ho tlosa ka ho feletseng, . . . ho phumola kapa ho timetsa.” Ho ea ka litsebi tse ling, le fana ka setšoantšo sa ha motho a hlakola mongolo. Seo se ne se ka khoneha joang? Enke e neng e atisa ho sebelisoa mehleng ea boholo-holo e ne e entsoe ka motsoako oa k’habone, sekhomaretsi le metsi. Kapele ka mor’a ho ngola ka enke eo, motho o ne a ka nka seponche se mongobo a hlakola mongolo oo. Papiso ena e ntle e bontša mohau oa Jehova. Ha a re tšoarela libe, ho tšoana le ha a nka seponche a li hlakola.

15. Jehova o batla hore re tsebe eng ka eena?

¹⁵ Ha re nahana ka lipapiso tsena tse sa tšoaneng, na ha ho hlake hore Jehova o batla hore re tsebe hore ka sebele o ikemiselitse ho re tšoarela libe hafeela a bona hore re bakile e le kannete? Ha ho hlokahale hore re tšohe hore o tla re ahlolela libe tseo nakong e tlang. Sena se bontšoa ke ho hong hoo Bibele e ho senolang ka mohau oa Jehova o moholo e leng hore ha a tšoarela, oa lebala.

“Ha ke sa Tla Hlola ke Hopola Libe Tsa Bona”

16, 17. Bibele e bolela’ng ha e re Jehova o lebala libe tsa rona, hona ke hobane’ng ha u cho joalo?

¹⁶ Jehova o ile a tšepisa tjena mabapi le ba leng selekaneng se secha: “Ke tla tšoarela liphoso tsa bona ’me ha ke sa tla hlola ke hopola libe tsa bona.” (Jeremia 31:34) Na see se bolela hore ha Jehova a tšoarela o sitoa ho hopola libe hape? Ka sebele ha ho joalo. Bibele e re bolella ka libe tsa batho ba bangata bao Jehova a ileng a ba tšoarela, ho akarelletsa le Davida. (2 Samuele 11:1-17; 12:13) Ho hlakile hore Jehova o ntse a tseba liphoso tseo ba ileng ba li etsa. Tlaleho eo ea libe tseo ba li entseng, hammoho le pako ea bona le ho tšoareloa ha bona ke Molimo, li bolokiloe molemong oa rona. (Baroma 15:4) Joale, Bibele e bolela’ng ha e re Jehova ha a ‘hopole’ libe tsa bao a ba tšoaretseng?

¹⁷ Leetsi la Seheberu le fetoletsoeng e le “ha ke sa tla hlola ke hopola” ha le bolele ho hopola se fetileng feela. Theological Wordbook of the Old Testament e re le akarelletsa “maikutlo a ho nka khato e loketseng.” Kahoo ka kutloisiso ena, ho “hopola” sebe ho akarelletsa ho nka khato khahlanong le baetsalibe. (Hosea 9:9) Empa ha Molimo a re “ha ke sa tla hlola ke hopola libe tsa bona,” o re tiisetsa hore ha a tšoarela baetsalibe ba bakileng, a ke ke a ba ahlolela libe tseo nakong e tlang. (Ezekiele 18:21, 22) Ka tsela eo, Jehova o lebala ka kutloisiso ea hore ha a lebise tlhokomelo libeng tsa rona nako le nako e le hore a lule a re qosa kapa a re fa kotlo. Na ha se ho tšelisang ho tseba hore Molimo oa rona oa tšoarela ebile oa lebala?

Ho Thoe’ng ka Liphello?

18. Ke hobane’ng ha ho tšoareloa ho sa bolele hore moetsalibe ea bakileng o lokoloha liphellong tsohle tsa tsela ea hae e fosahetseng?

¹⁸ Na ho ikemisetsa ha Jehova ho tšoarela ho bolela hore moetsalibe ea bakileng o lokoloha liphellong tsohle tsa tsela ea hae e fosahetseng? Che. Re ke ke ra etsa sebe ebe ha re hlaheloe ke liphello tse bohloko. Pauluse o ile a ngola a re: “Motho e mong le e mong o tla kotula seo a se jetseng.” (Bagalata 6:7) Re ka ’na ra tobana le liphello tse itseng tsa liketso tsa rona. Sena ha se bolele hore ka mor’a hore Jehova a re tšoarele o etsa hore re hlaheloe ke litsietsi. Ha mathata a hlaha, Mokreste haa lokela ho nahana hore mohlomong Jehova o mo otlela libe tsa hae tsa nakong e fetileng. (Jakobo 1:13) Ka lehlakoreng le leng, Jehova ha a re sireletse liphellong tsohle tsa liketso tsa rona tse fosahetseng. Tlhalo, ho ima ho sa batleheng, maloetse a tšoaetsanoang ka ho kopanela liphate, hore motho a se hlole a tšeptjoa kapa a hlomphuoa, tsena tsohle e ka ’na ea e-ba liphello tse bohloko tsa sebe tse ke keng tsa qojoa. Hopola hore esita le ka mor’a hore Jehova a tšoarele Davida libe tsa hae mabapi le Bathe-sheba le Uria, ha aa ka a mo sireletsa liphellong tse bohloko tse ileng tsa latela.—2 Samuele 12:9-12.

19-21. (a) Molao o tlalehiloeng ho Levitike 6:1-7 o ne o tsoela motho ea senyelitsoeng le mofosi molemo joang? (b) Haeba ba bang ba utloisitsoe bohloko ke libe tsa rona, Jehova o thabisoa ke ha re nka khato efe?

¹⁹ Libe tsa rona li ka ’na tsa e-ba le liphello tse ling, haholo-holo haeba ba bang ba utloisitsoe bohloko ke liketso tsa rona. Ka mohlala, nahana ka tlaleho e ho Levitike khaolo ea 6. Moo Molao oa Moshe o bua ka boemo ba ha motho a etsa phoso e tebileng ka ho inkela thepa ea Moiseraele-’moho le eena ka likhoka, ka ho qhekella kapa ka bomenemene. Ka mor’a moo ebe moetsalibe o hana hore o molato, hoo a bileng a itetang sefuba ho ikana ka bohata. Bopaki ba e mong bo thesela ba e mong. Leha ho le joalo, ebe hamorao mofosi o tšetšethoa ke letsoalo ’me o bolela sebe sa hae. E le hore Molimo a mo tšoarele, o lokela ho etsa lintho tse tharo: A khutlise seo a se nkileng, a lefe ea senyelitsoeng matšeliso ka liphesente tse 20 tsa thepa e utsoitsoeng, a be a fane ka ramo e le nyehelo ea molato. Joale, molao o re: “Moprista a etse sehlabelo sa ho tšoareloa libe bakeng sa motho eo ka pel’a Jehova ’me o tla tšoareloa.”—Levitike 6:1-7.

²⁰ Molao ona e ne e le tokisetso e mohau e tsoang ho Molimo. O ne o tsoela motho ea senyelitsoeng molemo, ea neng a khutlisetsoa thepa ea hae le eo ntle ho pelaelo a ikutloang a imolohile haholo ha mofosi a qetella a lumetse sebe sa hae. Ka nako e tšoanang, motho eo qetellong letsoalo la hae le neng le mo susumelletsa ho lumela molato oa hae le ho lokisa phoso ea hae, molao o ne o mo tsoela molemo. Ka sebele, haeba a ne a hana ho etsa seo, Molimo o ne a ke ke a mo tšoarela.

²¹ Le hoja re se tlas’a Molao oa Moshe, Molao oo o re fa leseli le itseng ka monahano oa Jehova, ho akarelletsa pono ea hae ka tšoarelo. (Bakolose 2:13, 14) Haeba ba bang ba utloisitsoe bohloko ke libe tsa rona, Molimo oa thaba ha re etsa sohle se matleng a rona ho lokisa phoso eo. (Matheu 5:23, 24) Sena se ka ’na sa akarelletsa ho amohela phoso ea rona, ho lumela hore re molato, esita le ho kopa tšoarelo ho motho eo re mo sitetsoeng. Re ntan’o ipiletsa ho Jehova motheong oa sehlabelo sa Jesu le ho thabela tiisetso ea hore Molimo o re tšoaretse.—Baheberu 10:21, 22.

22. Ha Jehova a re tšoarela, o tla boela a etse eng ho bontša hore oa re rata?

²² Joaloka motsoali leha e le ofe ea lerato, Jehova a ka ’na a tšoarela a ba a fana ka taeo e itseng. (Liproverbia 3:11, 12) Mokreste ea bakileng a ka ’na a tlameha ho tela tokelo ea hae ea ho sebeletsa e le moholo, mohlanka ea sebeletsang kapa e le pula-maliboho. Ho ka ’na ha e-ba bohloko ho eena hore ka nakoana a lahleheloe ke litokelo tseo a neng a li rata. Leha ho le joalo, taeo eo ha e bolele hore Jehova haa mo tšoarela. Re lokela ho hopola hore taeo e tsoang ho Jehova ke bopaki ba lerato la hae ho rona. Ho e amohela le ho e sebelisa ho molemong oa rona.—Baheberu 12:5-11.

23. Ke hobane’ng ha re sa lokela ho etsa qeto ea hore Jehova a ke ke a re hauhela, hona ke hobane’ng ha re lokela ho mo etsisa ’me re tšoarele batho ba bang?

²³ Ke ho khathollang hakaakang ho tseba hore Molimo oa rona o “ikemiselitse ho tšoarela”! Ho sa tsotellehe liphoso tseo mohlomong re li entseng, le ka mohla ha rea lokela ho nahana hore Jehova a ke ke a re hauhela. Haeba re baka e le kannete, re nka mehato ea ho lokisa phoso eo re bile re rapella tšoarelo ka tieo motheong oa sehlabelo sa Jesu, re ka kholiseha ka ho feletseng hore Jehova o tla re tšoarela. (1 Johanne 1:9) A re etsiseng ho tšoarela ha hae ha re sebelisana le ba bang. Etsoe haeba Jehova, ea sa etseng sebe, a ka re tšoarela ka lerato joalo, na rona batho ba baetsalibe ha rea lokela ho etsa sohle se matleng a rona hore re tšoarelane?