Khaolong ea 10

Ke Hobane’ng ha ke Lokela ho Hlokomela Bophelo ba Ka?

Tšoaea ✔ pakaneng ka ’ngoe eo u ratang ho e finyella.

□ Ho fokotsa ho tšoenyeha

□ Ho laola bohale

□ Ho itšepa haholoanyane

□ Ho ba seli haholoanyane

□ Ho ba sehlahlo

□ Ho ntlafatsa ponahalo ea letlalo

□ Ho theola boima ba ’mele

HO NA le lintho tse ling bophelong tseo uena joaloka mocha u sa ikhetheleng tsona—tse kang batsoali, banab’eno le hore na u lula hokae, ha re bolela tse seng kae feela. Empa u ka ikhethela tabeng ea ho hlokomela bophelo ba hao. Le hoja liphatsa tsa lefutso li phetha karolo e itseng, hangata boemo ba hao ba ’mele bo itšetlehile ka tsela eo u khethang ho phela ka eona.a

U ka ’na ua re, ‘Empa ke sa le monyenyane haholo hore nka khathatseha ka taba ea ho itlhokomela ’meleng!’ Na u hlile u nahana joalo? Sheba lipakane tse thathamisitsoeng leqepheng la 71. U tšoaile tse kae? Ha e le hantle, e le hore u finyelle lipakane tseo ke habohlokoa hore u hlokomele bophelo ba hao.

Ke ’nete hore u ka ’na ua ikutloa joaloka Amber ea lilemo li 17, ea reng: “Ha ho kamoo nka lulang ke ja lijo tse entsoeng ka koro le tse se nang mafura le tsoekere nako ena kaofela!” Haeba u ikutloa ka tsela eo, u se ke ua tšoenyeha—ha ua tlameha ho tlohela ka ho feletseng ho ja lijo tse tsoekere le ho matha sebaka se selelele beke le beke. Bonneteng, ho ka ’na ha hlokahala hore u etse liphetoho tse seng kae feela e le hore u shebahale hantle, u be sehlahlo le hore u sebetse hantle. A re bone kamoo bacha ba bang ba entseng sena kateng.

E-ja Lijo Tse Nepahetseng—U Shebahale Hantle!

Bibele e re khothalletsa hore re itloaetse ho etsa lintho ka tsela e leka-lekaneng. Liproverbia 23:20 e re: “U se ke ua . . . ja ka bonyollo.” (Contemporary English Version) Hase kamehla ho leng bonolo ho latela keletso ena.

“Joaloka bacha ba bang ba bangata, ke lula ke lapile. Batsoali ba ka ba ’nile ba re ekare mpa ea ka e na le masoba!”—Andrew ea lilemo li 15.

“Ha e le hantle, kaha ha ke bone hore na ho ja lijo tse itseng ho ntematsa hakae hona joale, ha ke bone eka seo ke bothata.”—Danielle ea lilemo li 19.

Na ho hlokahala hore u itšoare haholoanyane malebana le lijo? A re bone seo bacha ba bang ba reng se ba tsoela molemo.

Mamela ’mele oa hao. Julia ea lilemo li 19 o re: “Ke ne ke tloaetse ho lekanyetsa lijo tseo ke li jang, empa hona joale ke khaotsa ho ja ha ke khotše.”

Qoba lijo tse se nang phepo. Peter ea lilemo li 21 o re: “Ka ho khaotsa ho noa lino-mapholi tse nang le asiti, ke ile ka theola boima ba ’mele ka liponto tse leshome [lik’hilograma tse hlano] ka khoeli e le ’ngoe feela!”

Itloaetse mekhoa e metle ea ho ja. Erin ea lilemo li 19 o re: “Ke leka hore ke se ke ka ipheta ha ke ja.”

Lekunutu la ho Atleha: E-ja ha e le nako ea lijo! Haeba u sa je, u tla lapa ebe u qetella u ja ho feta tekano.

Ikoetlise Haholoanyane—U be Sehlahlo!

Bibele e re: “Koetliso ea ’mele e na le molemo.” (1 Timothea 4:8) Empa ho bonahala bacha ba bangata ba sa rate ho ikoetlisa.

“U ke ke ua lumela hore na ke bana ba bangata hakae ba neng ba feila tlelaseng ea boikoetliso, ha ke ne ke le sekolong se phahameng. E ne e le tlelase e bonolo ka ho fetisisa hoo e ka tšoantšoang le ho ja!”—Richard ea lilemo li 21.

“Ba bang ba re, ‘Ke hobane’ng ha ke lokela ho matha ka ntle letsatsing le chesang hore ke fufuleloe ke be ke khathale empa nka bapala papali ea video e ntumellang hore ke etse eka kea matha?’”—Ruth ea lilemo li 22.

Na ha ho buuoa ka ‘ho ikoetlisa’ ua sulafalloa? Haeba ho joalo, nahana ka melemo e meraro ea ho ba le kemiso e tsitsitseng ea ho ikoetlisa.

Molemo oa Pele. Ho ikoetlisa ho matlafatsa tsamaiso ea hao ea ’mele ea ho itšireletsa mafung. Rachel ea lilemo li 19 o re: “Ntate o ne a tloaetse ho re, ‘Haeba u sa iphe nako ea ho ikoetlisa, u tla tlameha ho ipha ea ho kula.’”

Molemo oa Bobeli. Ho ikoetlisa ho etsa hore boko bo ntše lik’hemik’hale tse etsang hore u khobe matšoafo. Emily ea lilemo li 16 o re: “Ho matha ho mpholisa hlooho ha ke nahana ka lintho tse ngata. Ke ikutloa ke khatholohile ’meleng ke bile ke imolohile maikutlong.”

Molemo oa Boraro. Ho ikoetlisa ho ka etsa hore u natefeloe ke bophelo. Ruth ea lilemo li 22 o re: “Ke rata ho hahloa ke moea, kahoo ha ke ikoetlisa ke etsa lintho tse kang ho hloa lithaba, ho sesa, ho thellisa lehloeng le ho palama baesekele.”

Lekunutu la ho Atleha: Bonyane qeta metsotso e 20 hararo ka beke u ikoetlisa ka matla, u etsa ntho eo u e thabelang.

Robala Hantle—U Sebetse Hantle!

Bibele e re: “Phomolo e tletseng letsoho e molemo ho feta mosebetsi o boima o tletseng matsoho a mabeli le ho lelekisa moea.” (Moeklesia 4:6) Ha u sa robale hantle, u ke ke ua sebetsa hantle!

“Haeba ke sa robala ka ho lekaneng, ha ke khone ho sebetsa hantle. Ke thatafalloa ho tsepamisa maikutlo nthong leha e le efe!”—Rachel ea lilemo li 19.

“Hoo e ka bang ka hora ea bobeli thapama, ke ikutloa ke khathetse hoo nka ’nang ka robala ke ntse ke buisana le batho ba bang!”—Kristine ea lilemo li 19.

Na u hloka nako e eketsehileng ea ho robala? A re bone seo bacha ba bang ba se entseng.

Qoba ho robala bosiu. Catherine ea lilemo li 18 o re: “Ke leka ho robala ka nako.”

Khaotsa moqoqo. Richard ea lilemo li 21 o re: “Ka linako tse ling metsoalle ea ntetsetsa kapa e nthomella melaetsa e se e le bosiu haholo, empa morao tjena ke ithutile ho khaotsa moqoqo ebe kea robala.”

Leka ho ba le kemiso e tsitsitseng. Jennifer ea lilemo li 20 o re: “Morao tjena, ke leka ho robala le ho tsoha ka nako e tšoanang.”

Lekunutu la ho Atleha: Leka ho robala bonyane lihora tse robeli bosiu ka bong.

U tla rua molemo haholo haeba u nka mehato e seng mekae ho itlhokomela ’meleng. U hopole hore ha u itlhokomela ’meleng seo se tla u thusa hore u shebahale hantle, u be sehlahlo ’me u sebetse hantle. Ho fapana le lintho tse ling bophelong, u ka khona ho laola boemo ba hao ba ’mele ho isa bohōleng bo itseng. Erin ea lilemo li 19 o re: “Qetellong, ke uena feela ea ka hlokomelang bophelo ba hao.”

[Mongolo o botlaaseng ba leqephe]

LENGOLO LA SEHLOOHO

“Koetliso ea ’mele e na le molemo.”—1 Timothea 4:8.

KELETSO

Batla motho eo u ka ikoetlisang le eena. Sena se tla u susumetsa kaha u ke ke ua batla ho mo soabisa.

NA U NE U TSEBA . . . ?

Ha u ikoetlisa, ’mele oa hao o ntša li-endorphin—e leng lik’hemik’hale tse bokong tse kokobetsang mahlaba le ho etsa hore u ikutloe u phetse hantle.

SEO KE RERANG HO SE ETSA!

Pakane e loketseng eo nka ipehelang eona tabeng ea hore na ke tla ja ka tsela efe ke ․․․․․

Pakane e loketseng eo nka ipehelang eona tabeng ea ho ikoetlisa ke ․․․․․

Ke tla leka ho qeta khoeli ke robala lihora tse ka bang ․․․․․ bosiu ka bong.

Lintlha tseo ke tla rata ho li botsa motsoali kapa batsoali ba ka tabeng ena ke ․․․․․

U NAHANA’NG KA SEE?

● Ho itlhokomela ’meleng ho ka ama boikutlo ba hao ba ho itšepa joang?

● Ke’ng ea bohlokoa ho feta ho itlhokomela ’meleng?—1 Timothea 4:8.

[Ntlha e Qolotsoeng e leqepheng la 74]

“Ke rata tsela eo ke ikutloang ka eona ha ke ikoetlisa. ’Me ha ke qala ho shebahala hantle ka lebaka la hona, seo se etsa hore ke itšepe haholoanyane!”—Emily

[Lebokose le leqepheng la 73]

“Ke ile ka fetola tsela eo ke phelang ka eona”

“Ha ke kena lilemong tsa bocha ke ne ke le motenya, e leng seo ke neng ke sa se batle. Ke ne ke sa rate tsela eo ke shebahalang ka eona le eo ke neng ke ikutloa ka eona! Nako le nako ke ne ke leka ho theola boima ba ’mele ka ho ja lijo tse khethehileng, empa ka mor’a moo ke boetse ke nona. Kahoo, ha ke le lilemo li 15 ke ile ka etsa qeto ea hore ho lekane. Ke ne ke batla ho theola boima ba ’mele ka tsela e nepahetseng—eo ke neng ke tla e khomarela bophelo bohle ba ka. Ke ile ka reka buka e buang ka lijo tsa motheo tse nang le phepo e nepahetseng le tsela e loketseng ea ho ikoetlisa, eaba ke sebelisa seo ke se balang. Ke ne ke ikemiselitse hore le ha ‘nka khetšemela’ kapa ka nyahama, nke ke ka tela. Liphello e bile life? Ke ile ka atleha! Le pele ho feta selemo, ke ne ke se ke theotse boima ba ’mele ka liponto tse 60 [lik’hilograma tse 30]. Ho se ho fetile lilemo tse peli ke ntse ke le mokaalo. Ke ne ke sa kholoe hore seo se ka etsahala! Ke nahana hore se nthusitseng hore ke atlehe ke hobane ke ne ke sa je lijo tse khethehileng feela—ke ile ka fetola tsela eo ke phelang ka eona.”—Catherine ea lilemo li 18.

[Setšoantšo se leqepheng la 74]

Bophelo ba hao bo tšoana le koloi—haeba u sa bo hlokomele hantle bo tla senyeha