Lengolo le Tsoang Nicaragua

“Ha U Fihla Nōkeng ea Coco, U Tjekele ka ho le Letona”

“U LOKELA ho tsamaea ka koloi e loketseng litsela tse mpe, u nke mochine o hulang lintho tse boima, le likane tsa peterole. Itokisetse ho tsamaea tebetebeng ea seretse. Ha u fihla Nōkeng ea Coco, u tjekele ka ho le letona.”

Ho bua ’nete, mantsoe ana a moromuoa-’moho le ’na ha aa ka a nkhothatsa. Leha ho le joalo, hoseng ka Labobeli le leng ke ile ka kena leetong ka ea kopanong ea Lipaki Tsa Jehova e toropong e nyenyane ea Wamblán, ka leboea Nicaragua.

Ke ile ka tloha esale ka matjeke ke khanna vene ea ka eo le hoja e le ea khale e neng e ntse e le matla, ka tsamaea tseleng e ntle e bitsoang Pan-American Highway. Ha ke fihla Jinotega, ke ile ka kena tseleng ea mokurutlane eo baahi ba moo ba e bitsang feo, kapa tsela e mpe. Pele ke tloha toropong ea moo, ke ile ka bona mabenkele a mabeli, le leng le ne le bitsoa Mohlolo o Entsoeng ke Molimo ’me le leng le bitsoa Tsoho ea Bafu.

Tsela e ne e le matsoelintsoeke, e tletse meepa le metheō. Ke ne ke khanna butle ha ke tsamaea likhohlong. Ke ile ka feta pel’a nōka e telele e holimo phuleng ea thaba e koahetsoeng ke maru. Le hoja ho ne ho e-na le mouoane, ke ile ka bona lifate tse nang le bolele tseo ka thōko ho tsona ho nang le limela tse bitsoang bo-’mametsana.

Ha ke fihla mothinyeng o mong o mobe, ke ile ka batla ke thula bese e neng e tla e tsamaea har’a tsela. E ne e ntša mosi o motšo, ’me e raha majoe ha e feta. Mona Nicaragua, bakhanni ba rofo ba ithehile mabitso a kang Mohale, Phepheng, Tlhoare kapa Setsomi ’me a ngotsoe ka ho hlaka lifensetereng tse ka pele.

Motšehare o moholo ke ne ke se ke tsamaea Thoteng ea Pantasma. Ke ile ka feta ntlo ea mapolanka eo lebala la eona le fietsoeng hantle. Monna-moholo o ne a lutse bencheng, ntja e robetse tlas’a sefate ’me lipholo tse peli li pannoe sekosekareng sa mabili a lehong. Toropong e ’ngoe e nyenyane ke ile ka bona bana ba bangata ba tsoang sekolong. Ha ba tsamaea tseleng ba apere lijunifomo tsa bona tse putsoa, e ne eka ke leqhubu la leoatle ha le fihla lebōpong.

Letsatsi le ne le ntša koena bolibeng ha ke atamela Wiwilí ’me ke bona nōka ea Coco ka lekhetlo la pele. Nōka ena e khōlō e ne e totobetse motseng ha e ntse e phalla. Ke ile ka hopola litaelo tseo ke li fuoeng, eaba ke tjekela ka ho le letona ’me ke kena tseleng e sa jeseng litheohelang e bolelele ba lik’hilomithara tse 37 e lebang Wamblán.

Ke ne ke tsamaea tseleng e mpe haholo le e matsutla-tsutla, ’me ka tšela melatsoana e ka bang robeli kapa robong. Ke ile ka kubeletsa lerōle ha ke leka ho qoba likoti. “Ke ile ka koma lerōle,” joalokaha baahi ba moo ba bolela. Ha ke fihla moo tsela ena e mpe e fellang teng, motse oa Wamblán oo ke eang ho oona o ile oa hlahella thōkoana mola moo meriti e thehileng teng phuleng.

Ka letsatsi le hlahlamang, ho ne ho bonahala eka motho e mong le e mong o tsohile ka 4:30 hoseng. Kaha mekoko e ne e se e mphaphamisitse le pele ho moo, ke ile ka tsoha eaba ke tsamaea ka maoto seterateng se seholo. Moea oa thaba o ne o nkha liphaphatha tse bitsoang li-tortilla tse ntseng li bakoa liontong tsa majoe.

Maboteng a mangata ho ne ho e-na le litšoantšo tse mebala-bala tse toroiloeng ke motho oa moo. Li-pulpería kapa mabenkele a manyenyane a mateanong a litsela a ne a e-na le matšoao a lino-mapholi tse fapaneng tse rekisoang. Ho ne ho e-na le liboto tse hopotsang batho litšepiso tse ileng tsa etsoa ke mebuso e meraro e fetileng. Matloana a masenke a ne a hahiloe holim’a samente.

Ke ne ke lumelisa batho ka Senicaragua ke re, Adiós. Ba ne ba bososela ’me ba bua le ’na hamonate. Re ne re qoqa har’a lerata la sephethephethe sa lipere le limmoulo tse ntseng li feta.

Malapa a ile a fihla ka Labohlano mantsiboea a tlile kopanong ea matsatsi a mabeli. Ba bang ba ne ba tsamaea ka maoto, ba bang ba palame lipere ha ba bang ba palame livene. Banana le bashanyana ba bang ba ne ba tsamaile lihora tse tšeletseng ka maoto ba roetse liflopse. Ba ile ba tšela linōka ho sa tsotellehe liqhomane tsa fatše tse epetsoeng moo ba bile ba sa tšabe likoili tse ka metsing ao a sa phalleng ka matla. Ba bang ba tsoang hōle ba ne ba nkile mefaho ea raese e tšetsoeng ka mafura a kolobe. Ke hobane’ng ha ba ne ba tlile?

Ba ne ba tlil’o matlafatsa tšepo ea bona bakeng sa bokamoso bo molemo boo ba bo lebeletseng. Ba ne ba tlil’o utloa ha ba hlalosetsoa Bibele. Ba ne ba tlil’o thabisa Molimo.

Letsatsi la Moqebelo le ile la chaba. Batho ba fetang 300 ba ne ba lutse lephepheng la masenke, ba lutse holim’a libenche le litulo tsa polasetiki. Bo-’mè ba anyesa masea a bona. Ho ne ho utloahala lerata la lifariki le likhoho polasing e haufi.

Ho ile ha chesa habohloko. Leha ho le joalo, batho ba ile ba theha tsebe ’me ba mamela likeletso le tataiso eo ba neng ba e fuoa. Ba ne ba phetla Libibele tsa bona ha sebui se bala Mangolo, ba bina lipina tse thehiloeng ka Bibeleng, ’me ba mamela ka tlhompho ha ho rapeloa.

Ha kopano e fela, ke ile ka bapala papali e bitsoang liboko le bana. Eaba re buisana ka lintlha tseo bana bao ba li ngotseng. Ka ba bontša litšoantšo tsa linaleli le melala k’homphieutheng ea ka. Bana ba ne ba bososela ’me batsoali ba bona ba thabile.

Kopano e ile ea fela ka potlako, ’me e mong le e mong a leba hae. Ke ile ka tsamaea hoseng ha le hlahlamang ke ntse ke nahana ka lintho tse monate tse etsahetseng ’me ke e-na le lerato le khaphatsehang bakeng sa metsoalle ea ka e mecha. Ke ikemiselitse ho ba etsisa ’me ke ithute ho khotsofala le ho letela Molimo.

[Litšoantšo tse leqepheng la 17]

Malapa a tsamaile tsela e telele hore a be teng kopanong ea Wamblán