Kuzuru Bara Lililoahidiwa

TUSEME rafiki angekuambia kwamba alikuwa amekununulia—zawadi—nyumba mpya kabisa katikati ya mazingira mazuri na matulivu. ‘Yaonekanaje?’ ungejiuliza. Bila shaka ungekuwa na hamu ya kujionea nyumba hiyo, kutembea ndani yayo na kuchunguza kila chumba. Kwani, hayo ndiyo makao yako mapya!

Katika 1473 K.W.K., Yehova alilipatia taifa la Israeli la kale makao mapya—Bara Lililoahidiwa, ukanda wa eneo la karibu kilometa 500 kutoka kaskazini hadi kusini na upana wa kilometa 55, kwa wastani.a Likiwa katika mahali ambapo pameitwa Hilali (Eneo) Yenye Rutuba, lile Bara Lililoahidiwa lilikuwa mahali pa kuishi penye kupendeza, palipobarikiwa na hali zalo zenyewe za pekee.

Lakini kwa nini wapasa kupendezwa leo na “makao” aliyopewa mtu mwingine, hasa mtu aliyeishi muda mrefu uliopita? Kwa sababu ujuzi juu ya bara hilo la kihistoria waweza kuongeza uthamini wako wa masimulizi ya Biblia. “Katika bara la Biblia,” akaandika Profesa Yohanan Aharoni aliyekufa, “jiografia na historia zimechangamana sana hivi kwamba hakuna moja iwezayo kueleweka bila msaada wa ile nyingine.” Zaidi, katika upeo walo, Bara Lililoahidiwa liliandaa kielelezo kwa kadiri ndogo cha kile ambacho Paradiso chini ya Ufalme wa Mungu itamaanisha kwa wanadamu ulimwenguni pote!—Isaya 11:9.

Wakati wa huduma yake ya kidunia, Yesu Kristo alitumia mandhari za kawaida katika Bara Lililoahidiwa ili kufundisha masomo yenye kutumika. (Mathayo 13:24-32; 25:31-46; Luka 13:6-9) Sisi pia twaweza kujifunza mengi kwa njia yenye kutumika kwa kuchunguza mambo mbalimbali ya Palestina ya kale. Hivyo acheni tutembee kupitia baadhi ya vyumba vyayo, kwa kusema kitamathali, tukichunguza baadhi ya mambo yenye kutokeza ya bara hili lililokuwa makao ya watu wa Mungu kwa karne nyingi. Kama tutakavyoona, kuna mengi tuwezayo kujifunza kutokana na Bara Lililoahidiwa.

[Maelezo ya Chini]

[Hisani ya Picha katika ukurasa wa 2]

Cover: Pictorial Archive (Near Eastern History) Est.

[Hisani ya Picha katika ukurasa wa 3]

Garo Nalbandian