“Vito vya Kweli”

“Vito vya kweli.” Hivyo ndivyo barua ambayo ofisi ya tawi ya Mashahidi wa Yehova ya Nigeria iliandikiwa, ifafanuavyo magazeti mawili ya pekee. Mwandikaji, mwanamume kijana, aeleza hivi:

“Ninaandika ili kuonyesha shukrani zangu za moyo mweupe kwa ajili ya jitihada zenu za kushughulikia karibu pande zote za maisha ya kila siku kupitia gazeti la Mnara wa Mlinzi na la Amkeni!

“Nina umri wa miaka 17. Mwaka uliopita kituo cha redio cha hapa kilidhamini shindano la insha yenye kichwa ‘Upendo Ni Zaidi ya Ngono—UKIMWI Ni Halisi.’ Kila insha ilipaswa kuzidi maneno mia nne. Insha bora zaidi ingetunukiwa tuzo la naira 1,000 [dola 12.50 za Marekani]. Bila shaka, walisema kwamba, watu wapaswa kuandika si ili kupata tuzo tu lakini, badala ya hivyo, wapate kujifunza kitu fulani. . . .

“Nilipata habari juu ya UKIMWI katika magazeti yote mawili. Kuhusu upendo, kulikuwa na idadi kubwa ya makala. Nilitumia hoja kutoka Amkeni! la Agosti 8, 1978, la Kiingereza.

“Karibu miezi miwili tu baada ya kutuma insha yangu, matokeo yalitangazwa. Nilishangaa kwamba, nilikuwa wa kwanza katika jimbo la Cross River na la Akwa Ibom!

“Habari zote nilizotumia zilitokana na hayo magazeti. Kwa kweli ni ajabu kwamba Yehova hutuandalia habari ya wakati wake katika ulimwengu huu wenye taabu na mfisadi kiroho na kiadili. Tukiwa Wakristo wa kweli, twajua kwamba upendo wamaanisha mengi, mengi zaidi ya ngono. Na, bila shaka, kuishi maisha safi, ya kiadili hutukinga dhidi ya maradhi kama UKIMWI.

“Nilihisi sina budi kuwashukuru kwa ajili ya vito hivyo vya kweli mnavyoandaa bila kuchoka. Yehova na aendelee kubariki jitihada zenu mwendeleapo kuandaa magazeti hayo yenye thamani.”