Kuyateka “Maji Yenye Kina”

MITHALI fulani ya Biblia yataarifu hivi: “Mashauri ya moyoni ni kama kilindi [“maji yenye kina,” NW]; lakini mtu mwenye ufahamu atayateka.” (Mithali 20:5) Nyakati za Biblia ilikuwa vigumu zaidi kupata maji kuliko ilivyo katika nchi nyingi leo. Yesu aliposema na mwanamke Msamaria, mwanamke huyo alikuwa akiburuta maji kutoka kwenye bubujiko la Yakobo, kisima kilichokuwa na kina kipatacho meta 23!—Yohana 4:5-15.

Kama andiko la Mithali 20:5 lionyeshavyo, ufahamu uhitajiwao ili kuvuta mawazo na hisia zenye kina zilizomo moyoni mwa mtu ni kama ile jitihada ihitajiwayo kuteka maji kisimani. Jambo hilo ni kweli katika sehemu zilizo nyingi za maisha. Kwa kielelezo, yaelekea wawajua watu mmoja-mmoja ambao kwa miaka mingi wamejiongezea ujuzi na uzoefu mwingi. Ikiwa hao hawana mwelekeo wa kujitolea kutoa shauri bila kuombwa, huenda ukahitaji kuwashawishi wafanye hivyo. Kwa kuonyesha upendezi, kuuliza maswali, na kuchunguza kwa busara, utakuwa kana kwamba, unaiteremsha ndoo yako ndani ya kisima cha hekima chenye kina.

Shauri la andiko la Mithali 20:5 pia ni lenye kutumika katika familia. Mara nyingi, wake husikika kusema hivi: “Mume wangu huwa haniambii jinsi ahisivyo!” Huenda mume akasema hivi: “Mke wangu hukoma tu kuongea nami!” Katika hali za namna hiyo, ufahamu wahitajiwa ili kuteka mawazo yaliyo ndani kabisa moyoni mwa mwenzi wa ndoa. Mara nyingi maswali ya busara (Je, ulipata magumu mchana? Ni nini lililotukia? Naweza kusaidiaje?) yaweza kuanzisha uwasiliano wa moyo mweupe. Kuonyesha ufahamu huo kutatia nguvu kifungo cha ndoa, kwa manufaa ya wote wawili mume na mke.