Kitu Bora Kushinda Vipodozi

BAADA ya kutaja “vitu vya kusaidia kujipamba kwa nje” ambavyo wanawake walitumia kuboresha uzuri wao, mtume Petro alishauri hivi: “Bali, uzuri wenu unapaswa kutokana na hali ya ndani ya utu wa kweli, uzuri usioharibika wa wema na utulivu wa roho, ambao ni wa thamani kubwa mbele ya Mungu.”—1 Petro 3:3, 4, Biblia Habari Njema.

Kwa kupendeza, mtume alipoandika juu ya kujipamba huko kwa nje, alitumia namna moja ya neno la Kigiriki koʹsmos, ambalo pia ni mzizi wa neno la Kiingereza “cosmetic” (kipodozi), linalomaanisha “kitu cha kusaidia kupamba h[asa] ngozi.” Je, Petro alikuwa akiwakataza wanawake Wakristo wasitumie vipodozi na vitu vingine vya kujipambia vilivyo sawa na hivyo? Neno la Mungu halidokezi jambo lolote kama hilo. Badala yake, linaruhusu mtu afanye uamuzi wake mwenyewe kuhusu jambo hilo, hivyo, tutatarajia kuwe na kutofautiana kwa kadiri fulani kuhusiana na mapendezi.

Hata hivyo, watu watapata wazo gani, vipodozi vikitumiwa kupita kiasi au kwa kiasi kinachoudhi wengine wengi? Je, hawatamwona mtu aliyejipamba hivyo kuwa mwenye kuchukiza, asiye na kiasi, mwenye pambo duni, mwenye majivuno, au mwenye kujihusudu? Naam, kufanya hivyo kwaweza kudunisha sura ya mwanamke, labda kukifanya watu wawe na maoni mabaya kuhusu sifa zake za kiadili.—Linganisha Ezekieli 23:36-42.

Kwa kuzingatia hayo, mwanamke ‘anayedai kumstahi Mungu’ atajitahidi kuona kwamba, akiamua kutumia vipodozi, sura yake inaonyesha utimamu wa akili, uanana, fadhili, na kiasi. Sifa kama hizo zitaboresha uzuri na haiba yake. Kwa kweli, kama ataamua kutumia vipodozi au la, atadhihirisha heshima na uzuri wa ndani. Jambo hilo litadhihirisha ujuzi wake kwamba, kama vile maneno ya Petro ambayo yamenukuliwa hapo juu yamaanishavyo, kuna kitu bora kushinda vipodozi.—1 Timotheo 2:9, 10.