Uwe Mwenye Shukrani na Mwenye Furaha

‘KUSHUKURU ni jambo muhimu ambalo wanadamu huchochewa kufanya,’ likasema gazeti moja la Kanada Calgary Herald. Gazeti hilo liliwanukuu wanafunzi fulani wa shule ya msingi wenye umri wa miaka tisa walioombwa na mwalimu wao waandike kuhusu mambo yote ambayo wangetoa shukrani kwa ajili yake. Kijana mmoja alisema kwamba anashukuru familia yake ‘kwa sababu walimtunza.’ Pia msichana mmoja mdogo alishukuru wazazi wake akisema: “Wao huniweka salama na mwenye afya. Wananipenda, kunitunza, na kunilisha. Niko hai leo kwa sababu yao.”

Tunapokosa shukrani tunakuwa watu wasioridhika daima. Mwanafalsafa na mwanatheolojia, J. I. Packer asema, “tumeumbwa tuishi kwa kutegemeana na kwa kumtegemea Mungu.” Jambo hilo linatukumbusha ushauri wenye hekima wa Biblia uliotolewa karne nyingi zilizopita, ambao wasema: “Jionyesheni wenyewe kuwa wenye shukrani.” (Wakolosai 3:15) Kushukuru wengine kutoka moyoni hutusaidia kusitawisha mahusiano yenye upendo.

Isitoshe, tunaposhukuru na kuthaminiana, tunaonyesha pia kwamba tu wenye shukrani kwa Yehova, naye huona jambo hilo. Biblia husema: “Macho ya BWANA hukimbia-kimbia duniani mwote, ili ajionyeshe mwenye nguvu kwa ajili ya hao, waliokamilika moyo kuelekea kwake.” (2 Mambo ya Nyakati 16:9) Mungu hutuhakikishia kwamba yeye hukumbuka na kuthamini sana upendo ambao wanadamu huonyesha kwa jina lake. (Waebrania 6:10) Naam, tuna sababu nzuri ya kushukuru kwa sababu tunapoonyesha sifa hii kila siku, tunampendeza Yehova na tunakuwa wenye furaha zaidi. Ni kama vile Mithali 15:13 husema: ”Moyo wa furaha huchamgamsha uso.”.