Kutoa Mnara wa Mlinzi Katika Mei
1 Kusudi la Mnara wa Mlinzi huelezwa waziwazi katika kila toleo kwenye sehemu ya juu ya ukurasa wa 2. Tunaweza kufanya nini kupatana na kusudi hilo lililotangazwa ili kusaidia watu wengi iwezekanavyo? Wakati wa Mei, tutafanya jitihada ya pekee kutia moyo wote wanaopendezwa na ujumbe wa Ufalme kusoma Mnara wa Mlinzi kwa ukawaida.
2 Tunaweza kusema hivi kwa mtu anayesema yeye ni Mkristo:
◼ “Tunawauliza jirani zetu swali fulani na tungethamini maelezo yako juu ya hilo. Kwa kuwa Yesu alitufundisha tusali Ufalme wa Mungu uje na mapenzi Yake yafanywe duniani kama mbinguni, je! wewe unafikiri kwamba mapenzi ya Mungu kweli kweli yatafanywa hapa duniani?” Ruhusu jibu, halafu ufungue Isaya 55:10, 11 na umwambie mwenye nyumba aone jinsi ahadi zote za Mungu zitakavyotimizwa.—rs, uku. 13, utangulizi wa pili chini ya “Ufalme.”
3 Ikiwa mwenye nyumba anapendezwa, unaweza kuendelea kwa kusema:
◼ “Kusudi moja la gazeti Mnara wa Mlinzi ni kuvuta uangalifu kwenye utimizo wa unabii wa Biblia. Ona nakala hii.” Halafu elekeza fikira kwenye makala ya tatu ya funzo katika toleo la Aprili 1 la Mnara wa Mlinzi, “Kukaribisha kwa Shangwe Ulimwengu Mpya wa Mungu wenye Uhuru” na kusema: “Huenda ikawa unajiuliza, ‘Ni hali zipi zitakazokuwapo duniani wakati mapenzi ya Mungu yatakapofanywa hapa kama mbinguni?’ Ona yale ambayo fungu hili linasema:.” Halafu chagua habari kutoka mafungu 7-11 ambayo unahisi yatamfaa mwenye nyumba na usome habari hiyo kutoka kwa gazeti. Halafu toa uandikisho. Ikiwa toleo la kawaida halikubaliwi unaweza kutoa magazeti hayo mawili na broshua kwa mchango wa kawaida.
4 Ikiwa unataka mwe na mazungumzo marefu zaidi, utoaji huo huo waweza kupanuliwa utie ndani andiko kwenye Ufunuo 21:3-5, kama inavyoonyeshwa katika kitabu Kutoa Sababu.
Iwapo ni hivyo, baada ya kusoma Isaya 55:10, 11, ungeweza kusema:
◼ “Unabii mzuri ajabu kuhusiana na mapenzi ya Mungu kwa dunia utatimizwa hivi karibuni. Utaathiri maisha yako na yangu. Ebu sikiliza yale yaliyoandikwa kwenye Ufunuo 21:3-5.” Halafu unaweza kusoma mistari hiyo na uzungumzie baraka zitakazokuwako chini ya utawala wa Ufalme wa Mungu. Onyesha jinsi Mnara wa Mlinzi linavyotangaza serikali ya Ufalme wa Mungu.
Halafu tumia mafungu yaliyodokezwa kutoka kwa toleo la Aprili 1 la “Mnara wa Mlinzi” kama ilivyodokezwa katika fungu lililotangulia. Au, ikiwa una toleo la Mei 1 unaweza kusema:
◼ “Toleo hili lina makala ‘Nani Atakayeponyoka Ule “Wakati wa Taabu”?’ Itakusaidia kuona jinsi unavyoweza kuishi katika ulimwengu mpya wenye haki chini ya Ufalme wa Mungu tunaosoma juu yao katika Ufunuo 21.”
5 Tumia Mnara wa Mlinzi Kuwa Jiwe la Kukanyagia Kupata Funzo la Biblia: Lengo letu ni kusaidia wengine wajifunze kweli ili kwamba wao pia waweze kuwa wafanyakazi wenzi wa Yehova na kushiriki katika kutangaza Ufalme wa Yehova. Kwa hiyo basi, tunapowapata watu wanaopendezwa, tuwaandike chini na kurudi upesi.
6 Tunaposhiriki kweli pamoja na wengine kwa msaada wa Mnara wa Mlinzi, sikuzote na tutafute mwelekezo wa Yehova katika kazi yetu ili kwamba tuweze kupata na kulisha wale wenye mfano wa kondoo.—Yn. 21:15-17.