Ziara za Kurudia Sahili na Zenye Matokeo
1 Je! wewe hufanya ziara za kurudia kwa ukawaida, au kwa ujumla huona likiwa jambo gumu kwa sababu hujui la kusema? Hakuna haja ya kuhofu. Kuna mambo matatu yatakayokusaidia uwe na mafanikio: (1) kujitayarisha vizuri; (2) uwezo wa kuzungumza jambo moja au mawili juu ya mambo machache sahili ya Biblia; na (3) utayari wa kusikiliza maoni ya mwenye nyumba.
2 Unapojitayarisha kufanya ziara ya kurudia, fikiria jambo ambalo litafaa kuzungumza na mwenye nyumba. Je! yeye ni mwanafunzi? Wanafunzi wengi watakuwa na wakati wa ziada wa kuzungumzia vichwa vya Biblia mwezi huu wafurahiapo pumziko kutoka masomo yao. Yaelekea utapata wengine wakiwa tayari kupokea ujumbe wa Ufalme. Je! ulitokeza swali mwishoni mwa ziara yako iliyopita, au mwenye nyumba alionyesha kupendezwa na jambo fulani? Rudia maandishi yako, na utumie kitabu Kutoa Sababu kupata habari utakayohitaji ili kufanya ziara ya kurudia yenye matokeo. Unapofanya ziara hiyo, uwe mchangamfu na mwenye urafiki. Msalimie mwenye nyumba kwa jina lake.
3 Ikiwa ulimwangushia mwenye nyumba Mnara wa Mlinzi na Amkeni!, ziara yako ya kurudia yaweza kutegemea jambo moja au mawili sahili ambayo umechagua kutoka kwa gazeti. Ikiwa uliangusha trakti kwenye ziara ya kwanza, unaweza ama kuongea juu ya trakti yenyewe ama ufuatie angusho kwa kuonyesha jambo moja lifaalo katika gazeti au broshua.
4 Ikiwa uliangusha “Uzima Katika Ulimwengu Mpya Wenye Amani,” sema tu:
◼ “Wakati wa mwisho nilipokuzuru, tuliongea juu ya ahadi ya Mungu ya ulimwengu wenye amani. Kama tulivyozungumza, hali nzuri zaidi zitakuja kupitia Ufalme wa Mungu. Unafikiri ni nini kinachohitajiwa kwetu ili tuwe sehemu ya ulimwengu huo mpya wenye amani?” Ruhusu mwenye nyumba atoe maelezo, kisha shiriki naye lile wazo kwenye Zaburi 37:9, 11, 29.
5 Ikiwa uliangusha “Kuna Tumaini Gani kwa Wapendwa Waliokufa?,” maelezo haya mafupi yaweza kuanzisha mazungumzo:
◼ “Mwishoni mwa mazungumzo yetu ya wakati uliopita nilikuachia trakti yenye kichwa Kuna Tumaini Gani kwa Wapendwa Waliokufa? Fungu la tatu latokeza maswali yenye kupendeza: ‘Kwa sababu gani watu wanakufa? Wafu wako wapi? Na tunaweza kuwaje na uhakika kwamba wanaweza kuishi tena?’ Kichwa kinachofuata ‘Kifo, na Lile Linalotukia Wakati Sisi Tunapokufa,’ chajibu kila swali. Nina nakala ya ziada ya trakti hiyo hapa. Angalia yale isemayo katika fungu la nne.” Halafu mwenye nyumba anapofuatana nawe, soma fungu hilo, kutia ndani maandiko mawili, na umuulize mwenye nyumba maoni yake. Sikiliza kwa makini yale asemayo, na ufuatie kulingana nayo.
6 Wakati mazungumzo yaendeleapo, huenda mwenye nyumba akatoa maoni yasiyo sahihi. Si lazima kupinga kila kitu asemacho. Badala yake, kazia kichwa kinachozungumziwa. Maoni yoyote yasiyo ya kimaandiko ambayo huenda akatoa yaweza kurekebishwa kwenye ziara zijazo.
7 Kwa vyovyote vile panga kufuatia kupendezwa kokote kwa kufanya ziara za kurudia sahili na zenye matokeo wakati wa Aprili.