Dumisha Mwelekeo Ufaao

¹ Twasisimuka kama nini kusoma juu ya maongezeko yanayofanyika katika nchi nyingi! Lakini, twatambua kwamba katika maeneo mengine wahubiri wa Ufalme mara nyingi hukabili ubaridi, kutojali, au hata upinzani wa moja kwa moja wa kazi yetu ya kuhubiri. Twaweza kuwaje na mwelekeo ufaao ikiwa hali iko hivi katika eneo letu? Twaweza kuzuiaje mwelekeo usiofaa ambao ungetunyang’anya shangwe yetu au kupunguza bidii yetu kwa kazi ya kufanya wanafunzi?

² Mwelekeo ufaao utatusaidia tudumishe usawaziko wetu. Hata katika hali zenye kutahini, hatupaswi kuacha mawazo yasiyofaa yatawale mtazamo wetu. Yesu alituwekea kielelezo kikamilifu. Kwa kadiri ni watu wachache waliokubali aliyofundisha. Wengine walijikwaa kwa mafundisho yake. Alikabili hali ambazo zilitahini uvumilivu wake sana. Viongozi wa kidini walichambua kazi yake nao wakafanya njama ya kumuua. Alitemewa mate, akazabwa makofi, akafanyiwa mzaha, akapigwa, na hatimaye akauawa. Lakini, alipata shangwe katika kazi aliyokuwa akifanya. Kwa nini? Yeye alitambua umuhimu wa kufanya mapenzi ya Mungu, naye hakukata tamaa.—Yn. 4:34; 13:17; Ebr. 12:2.

³ Dumisha Maoni Yaliyo Sawa juu ya Huduma Yetu: Ili kufanya hivi, twahitaji kukumbuka mambo kadhaa. Kumbuka kwamba tuna ujumbe ambao watu walio wengi hupuuza au hupinga. (Mt. 13:14, 15) Ingawa mitume waliamriwa kirasmi waache kufundisha kwa msingi wa jina la Yesu, walibaki wakiwa waaminifu kwa agizo lao la kuhubiri, na mavuno yaliendelea kuongezeka. (Mdo. 5:28, 29; 6:7) Twajua kimbele kwamba katika maeneo mengine, ni watu wachache kwa kulinganisha watasikiliza. (Mt. 7:14) Basi, tuna sababu ya kushangilia mtu mmoja tu katika eneo letu akisikiliza. Kumbuka, pia kwamba, wale wanaopinga wanapaswa kupewa fursa ya kusikiliza. (Eze. 33:8) Wapinzani fulani hubadilika hatimaye na kuwa waabudu wa Yehova. Huduma yetu inapoonwa kwa njia sawa, basi, hutuletea hisia ya utimilizo, hata kama ni wachache wanaosikiliza. Kuwapo kwetu milangoni tukiwa na ujumbe wa Ufalme wa Mungu ni ushahidi.—Eze. 2:4, 5.

⁴ Tuna sababu nzuri ya kuhisi inavyofaa katika mtazamo wetu. Kusitawi kwa kazi ya ulimwenguni pote na uthibitisho unaoongezeka wa kukaribia kwa dhiki kubwa kwapaswa kutuchochea sisi sote tufanye yote tuwezayo kutumikia tukiwa na ujitoaji kimungu. (2 Pet. 3:11, 14) Utendaji wenye bidii wakati wa Agosti utakuwa njia bora ya kuonyesha uthamini wetu kwa yale ambayo tumejifunza. Pia twataka washiriki wapya waonyeshe mwelekeo ufaao kwa kutumia yale ambayo wanafundishwa. Ikiwa baadhi ya wanafunzi wetu wa Biblia wamefanya maendeleo kufikia hatua ya kuwa wahubiri wasiobatizwa, mwezi wa Agosti waweza kuwa wakati ulio bora zaidi ili kuwasaidia waanze.

⁵ Iwe tunatumikia tukiwa wahubiri au mapainia, sisi sote twasaidiwa tukikumbuka kwamba yale ambayo Yehova anataka kwetu si mzigo. (1 Yoh. 5:3) Yeye anaahidi kututegemeza. (Ebr. 13:5b, 6) Kujapokuwa kutojali kwa umma, ubaridi, au ushindani, twapaswa kuwa na mwelekeo unaofaa na twendelee kuhubiri kwa sababu ni mapenzi ya Mungu kwamba tufanye hivyo.—1 Tim. 2:3, 4.