Je, Ungependa Kuongoza Funzo la Biblia Nyumbani?

Ripoti za hivi majuzi kutoka kwa waangalizi wasafirio zaonyesha kwamba ni asilimia 50 tu ya wahubiri wetu wanaoongoza mafunzo ya Biblia nyumbani. Huenda sababu ikawa kwamba wahubiri wapya zaidi wanahitaji kuzoezwa katika huduma. Wanahitaji kuonyeshwa jinsi ya kuweka maandishi mazuri ya huduma yao, kufanya ziara za kurudia na kuanzisha mafunzo ya Biblia nyumbani. Wengine wasio na mafunzo ya Biblia huenda wakawa baadhi ya wahubiri wetu wachanga. Hawa pia wanaweza kuzoezwa kushiriki katika sehemu hii yenye kuthawabisha ya huduma.—Mt. 28:19, 20.

Katika eneo letu twapata watu wengi ambao wangependa kujifunza juu ya Mungu na kusudi lake. Tuna vichapo bora vya kusaidia watu hawa. Broshua Mungu Anataka Tufanye Nini? na Ujuzi Uongozao Kwenye Uhai Udumuo Milele vimethibitika kuwa vichapo bora vya kuongoza mafunzo ya Biblia nyumbani katika eneo letu.

Ufanyeje ikiwa kwa kweli wataka kuongoza funzo la Biblia nyumbani? Ukihitaji msaada wa kuanzisha na kuongoza funzo la Biblia nyumbani, zungumza na mmoja wa wazee katika kutaniko ukimweleza tamaa yako. Fanya tamaa yako iwe jambo la kutolewa sala kwa Yehova. (1 Yn. 3:22) Tenda kupatana na sala yako kwa kushiriki kwa ukawaida na kutumia kiasi kifaacho cha wakati katika huduma. Jitahidi kufuatia mtu yeyote anayependezwa katika eneo lako. Fanya uwe mradi wako kuongoza angalau funzo moja la Biblia nyumbani kwa ukawaida kwa kuongezea funzo lolote ambalo huenda ukaongoza pamoja na watoto wako.—Ona kitabu Tumefanywa Tengenezo Tutimize Huduma Yetu ukurasa wa 89-91.

Waweza kupata shangwe iliyoongezeka upanuapo huduma yako itie ndani sehemu ya kuongoza funzo la Biblia nyumbani kwa ukawaida!