SWALI LA 7

Nifanye Nini Ninaposhinikizwa Kufanya Ngono?

KWA NINI NI MUHIMU

Maamuzi yako kuhusu ngono yanaathiri sana wakati wako ujao.

WEWE UNGEFANYA NINI?

Fikiria hali hii: Heather amekuwa na urafiki na Mike kwa miezi miwili tu, lakini anahisi kana kwamba amemfahamu maisha yake yote. Wao huandikiana ujumbe mfupi nyakati zote, wanazungumza kwa saa nyingi kwenye simu, na hata mmoja akianza sentensi mwenzake anaweza kuimalizia! Lakini sasa Mike anataka mengi zaidi kuliko mazungumzo.

Katika kipindi cha miezi miwili ambayo imepita, Mike na Heather hawajafanya lolote ila kubusu na kushikana mikono. Heather hataki kufanya zaidi ya hayo. Lakini pia hataki kumpoteza Mike. Hakuna mtu mwingine anayemfanya ajihisi kuwa mrembo sana na wa pekee kama Mike anavyomfanya ahisi. ‘Isitoshe,’ Heather anawaza, ‘Mimi na Mike tunapendana . . . ’

Ikiwa una umri wa kutosha kuanzisha urafiki wa karibu na mtu wa jinsia tofauti na ujikute katika hali ya Heather, utafanya nini?

TUA NA UFIKIRI!

Vazi linatumiwa kama kitambaa cha kufanya usafi — Ngono ni zawadi kutoka kwa Mungu kwa ajili ya watu waliofunga ndoa tu. Kufanya ngono kabla ya ndoa ni kutumia vibaya zawadi hiyo. Ni kama kuchukua vazi maridadi ulilopewa na kulitumia kama kitambaa cha kufanya usafi

Ukipuuza sheria za asili, kama vile ukijirusha kutoka juu sana na ujaribu kuruka kama ndege, utaumia. Ndivyo itakavyokuwa pia ukipuuza sheria za maadili, kama ile inayosema: “Mjiepushe na uasherati.”—1 Wathesalonike 4:3.

Kutotii amri hiyo kuna madhara gani? Biblia inasema hivi: “Yeye aliye na mazoea ya kufanya uasherati anautendea dhambi mwili wake mwenyewe.” (1 Wakorintho 6:18) Je, hilo ni kweli?

Wachunguzi wamegundua kwamba vijana wengi ambao wamefanya ngono kabla ya ndoa wamepatwa na angalau moja kati ya mambo yafuatayo.

MAJUTO. Vijana wengi ambao wamefanya ngono kabla ya ndoa wanasema kwamba walijuta baadaye.
KUTOAMINIANA. Baada ya kufanya ngono, kila mmoja huanza kujiuliza, ‘Amefanya ngono na nani mwingine?’
KUTOTIMIZWA KWA MATARAJIO. Tamaa ya moyoni ya wasichana wengi ni kuwa na mtu atakayewalinda, si kuwatumia vibaya. Nao wavulana wengi hawavutiwi sana na msichana baada ya kufanya ngono naye.
Jambo kuu: Ukijihusisha katika ngono kabla ya ndoa, utajishushia heshima kwa kupoteza kitu chenye thamani sana. (Waroma 1:24) Mwili wako ni wenye thamani sana, hupaswi kuutumia ovyoovyo!

Onyesha kwamba una msimamo thabiti kwa ‘kujiepusha na uasherati.’ (1 Wathesalonike 4:3) Kisha ikiwa utafunga ndoa siku moja, unaweza kufanya ngono. Nawe utaifurahia kabisa, bila wasiwasi, majuto, wala mahangaiko ambayo mara nyingi watu hupata wanapojihusisha katika ngono kabla ya ndoa.—Methali 7:22, 23; 1 Wakorintho 7:3.

UNA MAONI GANI?

Je, kweli mtu anayekupenda kikweli anaweza kuhatarisha hali yako ya kimwili na ya kihisia?
Mtu anayekujali kikweli anaweza kukushawishi uhatarishe uhusiano wako pamoja na Mungu?—Waebrania 13:4.