Hadithi ya Tatu ya Uwongo: Watu Wote Wazuri Wanaenda Mbinguni

Ni nini chanzo cha hadithi hiyo?

Baada ya kifo cha mitume wa Yesu, mwanzoni mwa karne ya pili W.K., Mababa wa Kanisa wa mapema walipata umaarufu. Kikieleza kuhusu mafundisho yao, kitabu New Catholic Encyclopedia (2003), Buku la 6, ukurasa wa 687, kinasema hivi: “Fundisho lililoenea ni kwamba baada ya kifo nafsi iliyotengana na mwili inaingia papo hapo katika paradiso ya mbinguni baada ya kutakaswa ipasavyo.”

Biblia inasema nini?

“Wenye furaha ni wale walio na tabia-pole, kwa kuwa watairithi dunia.”—Mathayo 5:5.

Ingawa Yesu aliwaahidi wanafunzi wake kwamba angeenda ‘kuwatayarishia mahali’ mbinguni, alionyesha kwamba waadilifu hawaendi moja kwa moja mbinguni. (Yohana 3:13; 14:2, 3) Je, hakusali kwamba mapenzi ya Mungu yatendeke “duniani kama ilivyo mbinguni”? (Mathayo 6:9, 10) Kwa kweli, watu waadilifu watapata moja kati ya matumaini hayo. Hesabu ndogo ya waadilifu hao watatawala mbinguni pamoja na Kristo, lakini walio wengi wataishi milele duniani.—Ufunuo 5:10.

Baadaye, kanisa la mapema lilibadili maoni yake kuhusu daraka lake duniani. Kukawa na matokeo gani? Kitabu The New Encyclopædia Britannica kinasema hivi: “Hatua kwa hatua, kanisa lilichukua mahali pa Ufalme wa Mungu unaotarajiwa.” Kanisa lilianza kuimarisha mamlaka yake kwa kujiingiza katika siasa, na hivyo kupuuza maneno ya waziwazi ya Yesu kwamba wafuasi wake walipaswa kuwa “si sehemu ya ulimwengu.” (Yohana 15:19; 17:14-16; 18:36) Chini ya uvutano wa Maliki Mroma Konstantino, kanisa lililegeza mafundisho fulani, kama lile linalohusu utu halisi wa Mungu.

Linganisha mistari hii ya Biblia: Zaburi 37:10, 11, 29; Yohana 17:3; 2 Timotheo 2:11, 12