Je, Una Imani?

Ili kumpendeza Yehova, ni lazima tuwe na imani. Hata hivyo, Biblia inasema kwamba “imani si mali ya watu wote.” (2 The. 3:2) Katika andiko hilo, mtume Paulo alikuwa akizungumzia wale waliomtesa, yaani, “watu hatari na waovu,” ambao alihitaji kuokolewa kutoka kwao. Lakini maelezo yake kuhusu imani yanaweza kutumiwa kuwahusu watu wengine pia. Baadhi ya watu huamua kupuuza uthibitisho ulio wazi kwamba kuna Muumba, yaani, Mungu. (Rom. 1:20) Huenda watu wengine wakadai wana imani kwa kadiri fulani, kwa sababu wanaamini kwamba kuna mtu au kitu kingine chenye nguvu kuliko wao. Lakini kuamini jambo hilo tu hakutoshi ili kumpendeza Yehova.

Tunahitaji kuwa na uhakika kwamba Yehova yuko na ni “mthawabishaji” wa wale ambao wana imani yenye nguvu. (Ebr. 11:6) Imani ni sifa ya tunda la roho yake takatifu. Hivyo, kusali kwa Yehova kunaweza kumsaidia mtu kupata roho takatifu. (Luka 11:​9, 10, 13) Njia nyingine muhimu ya kupata roho takatifu ni kwa kusoma Neno la Mungu lililoongozwa na roho. Kisha tunaweza kufikiria kuhusu mambo tunayosoma na kujitahidi kutumia mambo tunayojifunza. Kwa kufanya hivyo, tunairuhusu roho ya Yehova ituongoze maishani, na hivyo itatusaidia kuwa na imani inayomfurahisha Yehova.