MSAADA KWA AJILI YA FAMILIA | KULEA WATOTO
Wasaidie Watoto Wako Wasilemewe na Ripoti za Habari Zinazotisha
Habari zenye kushtua—ambazo mara nyingi huambatanishwa na picha za video zinazoonyesha mambo waziwazi—zinapatikana siku nzima kwenye televisheni, simu, tablet, na kompyuta.
Na watoto wetu wanatazama.
Unaweza kufanya nini ili watoto wako wasipatwe na wasiwasi kupita kiasi kwa sababu ya ripoti hizo zenye kushtua?
Watoto wanaathiriwaje na habari?
Watoto wengi hushtuliwa na majanga wanayoona kwenye ripoti za habari. Ingawa huenda watoto fulani wasieleze jinsi wanavyohisi, ripoti za habari zenye kutisha zinaweza kuwaathiri sana.a Wasiwasi wao unaweza kuongezeka wanapowaona wazazi wao wakiwa na hofu.
Watoto huelewa vibaya mambo wanayoona kwenye habari. Kwa mfano, baadhi yao hukata kauli kwamba mambo ambayo wameona yatatokea katika familia yao. Na watoto ambao hutazama tukio fulani lenye kuogopesha likionyeshwa tena na tena huenda wakafikiri kwamba jambo hilo linatokea tena na tena.
Huenda watoto wasielewe tukio hilo kwa njia inayofaa. Huenda wasitambue kwamba mashirika ya habari ni biashara zinazopata faida ikiwa watu wengi watatazama habari zao. Hivyo, ripoti fulani inaweza kutangazwa kwa njia yenye kusisimua ili kuwanasa watazamaji.
Unaweza kuwasaidiaje watoto wako wasilemewe na wasiwasi unaotokana na habari?
Dhibiti kiasi cha habari zenye kushtua wanazotazama. Hilo halimaanishi kwamba uwazuie watoto wako kujua kinachoendelea ulimwenguni. Lakini hawatapata faida yoyote kwa kutazama au kusikiliza habari fulani yenye kushtua inayorudiwa tena na tena.
“Nyakati nyingine mimi na mume wangu huzungumzia kwa kina kuhusu ripoti fulani ya habari bila kutambua jinsi hilo linavyowaathiri sana watoto wetu wanaotusikiliza.”—Maria.
Kanuni ya Biblia: “Moyo wa wasiwasi humlemea mtu.”—Methali 12:25, Neno—Biblia Takatifu.
Sikiliza kwa subira, jibu kwa hisia-mwenzi. Ikiwa ni vigumu kwako kuzungumza na mtoto wako kuhusu tukio fulani, mwombe achore picha kulihusu. Zungumzia mahangaiko ya mtoto wako kwa kutumia maneno atakayoelewa, lakini uepuke kuzungumzia habari zisizohitajika kuhusu tukio hilo.
“Binti yetu hujihisi vizuri zaidi baada ya kuketi na kumsikiliza. Lakini hajihisi vizuri tunapomwambia, ‘Hivyo ndivyo ulimwengu ulivyo, unapaswa kuzoea.’”—Sarahi.
Kanuni ya Biblia: “[Uwe] mwepesi wa kusikia, si mwepesi wa kusema.”—Yakobo 1:19.
Msaidie mtoto wako kuelewa uhalisi wa ripoti za habari. Kwa mfano, ripoti kuhusu kutekwa nyara inaweza kufanya ionekane kuwa uhalifu huo unaweza kutokea kwa urahisi kuliko ilivyo kihalisi. Waeleze watoto wako hatua ulizochukua ili kuwalinda. Pia, kumbuka kwamba misiba inayotangazwa kwenye habari ni ile isiyo ya kawaida—si kwa sababu inaweza kutokea kwa urahisi.
“Wasaidie watoto wako kukabiliana na hisia zao. Mara nyingi, hisia huongozwa na mawazo, kwa hiyo tukiwasaidia watoto wetu kukazia jambo fulani linalofaa, watajihisi vizuri zaidi.”—Lourdes.
Kanuni ya Biblia: “Moyo wa mwenye hekima hukipatia kinywa chake ufahamu na huongeza ushawishi kwenye maneno yake.”—Methali 16:23.
a Huenda watoto wadogo wakaonyesha wasiwasi wao kwa kuanza kujikojolea kitandani wanapokuwa wamelala usiku au kwa kuogopa kwenda shuleni wakihisi kwamba watakuwa mbali na wazazi wao.