VIJANA HUULIZA

Urafiki wa Kimapenzi—Sehemu ya 2: Nitarajie Nini Ninapokuwa Katika Urafiki wa Kimapenzi?

Unavutiwa na mtu ambaye umekutana naye, nanyi wawili mmeamua kuanzisha urafiki wa kimapenzi ili kuona ikiwa mnaweza kufaana na kuoana. Unapaswa kutarajia nini uhusiano wenu unapoendelea?

Katika makala hii

Tarajia kuwa na mazungumzo ya wazi

Utajifunza mengi kumhusu rafiki yako mnapotumia muda pamoja, naye pia atajifunza mengi kukuhusu. Utajifunza baadhi ya mambo kwa kutazama tabia ya rafiki yako.

Hata hivyo, kuna mambo fulani ambayo ninyi wawili mnahitaji kuzungumzia waziwazi. Mnapofanya hivyo, dumisha maoni yenye usawaziko na uepuke kufanya maamuzi kwa kutegemea hisia zako.

Mnaweza kuzungumzia mambo yafuatayo:

Uchumi. Je, una madeni yoyote? Je, ni vigumu kwako kudhibiti matumizi yako ya pesa? Mtakapofunga ndoa, wewe na mwenzi wako mtafanyaje maamuzi kuhusu matumizi ya pesa?
Afya. Je, una afya nzuri? Je, umewahi kuwa na matatizo yoyote makubwa ya afya?
Miradi. Ungependa kutimiza nini maishani mwako? Je, miradi yako inapatana na miradi ya mwenzako? Baada ya kufunga ndoa, je, bado utakuwa na furaha ikiwa hali zitakuzuia kufikia miradi yako?
Familia. Je, sasa hivi una majukumu ya kuwatunza watu wa familia yako? Unafikiri utakuwa na majukumu hayo wakati ujao? Je, ungependa kupata watoto? Ikiwa ungependa, unataka wangapi?

Msichana na mvulana walioonyeshwa mapema wakielezana miradi waliyojiwekea. Picha ndogo: 1. Mvulana angependa watumie wakati katika utumishi na kusafiri. 2. Msichana angependa kuwa na nyumba, watoto wawili, na mbwa.

Mnapozungumzia mambo hayo, uwe mnyoofu kabisa. Usifiche au kupinda habari zozote ili tu kumpendeza mwenzako.—Waebrania 13:18.

Jambo la kufikiria: Ungependa kujua nini kumhusu mwenzako? Yeye anapaswa kujua nini kukuhusu? Kuzungumzia mambo kwa unyoofu kutasaidiaje mazungumzo yenu kuwa ya wazi baadaye ikiwa mtaamua kufunga ndoa?

Kanuni ya Biblia: “Semeni ukweli kila mmoja na mwenzake.”—Waefeso 4:25.

“Msichana anaweza kujiambia, ‘Ndani ya miezi sita ijayo, huenda tutakuwa tumetoa ahadi ya kufunga ndoa,’ lakini huenda mvulana akawa anafikiria kutoa ahadi hiyo baada ya mwaka mmoja. Kwa sababu hiyo, huenda msichana akaumia au kuchanganyikiwa kwa sababu alitarajia jambo hilo mapema zaidi. Ni muhimu sana kila mmoja wao aelewe mwenzake anafikiri kwa njia gani.”—Ariana, alifunga ndoa mwaka mmoja uliopita.

Tarajia mtakuwa na maoni tofauti

Hakuna watu wawili wanaofanana kabisa. Kwa hiyo, usiwazie kwamba wewe na rafiki yako mtakubaliana kuhusu kila jambo au mtakuwa na hisia zilezile kuhusu mambo. Utamaduni na malezi yanaweza kuathiri maoni yenu.

Msichana na mvulana walioonyeshwa mapema wakitoa maoni tofauti. Picha: 1. Mvulana ameshika bisi akielekeza waende kwenye ukumbi wa sinema. 2. Msichana amebeba mkoba na ameshika kijiti kirefu cha kutembelea huku akielekeza waende kutembea.

Jambo la kufikiria: Mnapotofautiana kuhusu mambo ambayo si muhimu, je, kila mmoja wenu yuko tayari kuachilia mambo hayo ili kudumisha amani maadamu hakuna viwango vya Biblia vinavyovunjwa?

BKanuni ya Biblia: “Usawaziko wenu na ujulikane kwa watu wote.”—Wafilipi 4:5.

“Hata ikiwa unafikiri mnapatana kabisa na mwenzako, lazima kuna mambo mnayotofautiana. Licha ya kwamba ni muhimu kupatana, sifa ambazo kila mmoja wenu anaonyesha mnapokosa kukubaliana ni muhimu zaidi.”—Matthew, alifunga ndoa miaka mitano iliyopita.

Tarajia urafiki wa kimapenzi utakuletea mkazo

DBila shaka, urafiki wa kimapenzi utachukua muda wako mwingi na huenda ukakusababishia mkazo. Ni nini kinachoweza kukusaidia?

Jiwekee mipaka yenye usawaziko. Usikazie fikira sana uhusiano wenu hivi kwamba upuuze majukumu yako—au rafiki zako wengine. Alana, aliyefunga ndoa miaka mitano iliyopita, anasema hivi: “Bado unawahitaji marafiki wako baada ya kufunga ndoa, nao pia wanakuhitaji. Usiwapuuze kwa sababu tu umeanzisha urafiki wa kimapenzi.”

Kumbuka, unapofunga ndoa, utahitaji kusawazisha sehemu zote za maisha yako. Kwa nini usijitahidi kupata usawaziko huo unapoendelea na urafiki wenu?

Msichana na mvulana walioonyeshwa mapema wakiwa wamechoka baada ya utendaji wa siku. Picha: 1. Wakiendesha baiskeli pamoja. 2. Wakipiga picha pamoja na marafiki. 3. Wakitazama TV pamoja na marafiki jioni. 4. Wakiandikiana ujumbe usiku sana.

Jambo la kufikiria: Je, unamsisitiza mtu uliyeanzisha urafiki naye atumie wakati mwingi na akuelekezee fikira kwa njia isiyo na usawaziko? Je, unahisi kwamba anadai mengi sana kutoka kwako? Nyote wawili mnaweza kuonyeshaje usawaziko ili mwenzako asihisi amechoshwa au amebanwa na uhusiano wenu?

Kanuni ya Biblia: “Kuna wakati uliowekwa wa kila jambo, wakati wa kila shughuli chini ya mbingu.”—Mhubiri 3:1.

“Ikiwa watu walio katika urafiki wa kimapenzi wanatumia wakati pamoja katika burudani tu, ndoa inaweza kuwashtua. Ni vizuri kwa marafiki hao kushiriki katika utendaji halisi wakiwa pamoja kama vile kufanya ununuzi, kazi za nyumbani, na ibada. Hilo linaweza kuwasaidia kusitawisha njia nzuri za kufanya kazi pamoja ambazo zitawasaidia watakapofunga ndoa.”—Danieli, alifunga ndoa miaka miwili iliyopita.

Kumbuka, kipindi cha urafiki wa kimapenzi ni cha muda na ni kipindi ambacho kitaongoza kwenye uamuzi, ama wa kufunga ndoa au wa kukomesha uhusiano wa kimapenzi. Sehemu ya 3 ya mfululizo huu itazungumzia mambo unayohitaji kufikiria unapofanya uamuzi huo.