Ukosefu wa maji uliokuwa tatizo kubwa kwa jiji hilo, ulikuwa umeshindwa kwa kuleta maji kupitia mifereji kutoka visima vyenye maji moto vilivyokuwa umbali fulani. Hivyo, maji yangekuwa yenye uvuguvugu tu kufikia wakati ambao yangewasili katika jiji hilo.

6. (a) Yesu anaelezaje hali ya kiroho ya kundi katika Laodikia? (b) Ni kielelezo gani kizuri cha Yesu ambacho kundi la Laodikia limeshindwa kufuata?

⁶ Yesu ana ujumbe gani kwa Walaodikia? Yeye hana neno la pongezi. Yeye anawaambia waziwazi hivi: “Mimi najua matendo yako, kwamba wewe si baridi wala moto. Mimi naona laiti ungekuwa baridi au sivyo moto. Kwa hiyo, kwa sababu wewe ni vuguvugu na wala si moto wala baridi, mimi nitatapika wewe utoke katika kinywa changu.” (Ufunuo 3:15, 16, NW) Wewe ungeitikiaje ujumbe kama huo kutoka kwa Bwana Yesu Kristo? Je! wewe hungeamka ujichunguze mwenyewe? Kwa hakika, Walaodikia hao wanahitaji kujiamsha wenyewe, kwa kuwa wamekuwa wavivu kiroho, kwa wazi wakichukua mambo mengi mno vivi hivi tu. (Linga 2 Wakorintho 6:1.) Yesu, ambaye wao wakiwa Wakristo iliwapasa kuiga, sikuzote anaonyesha bidii yenye kuwaka moto kwa ajili ya Yehova na utumishi wake. (Yohana 2:17) Zaidi ya hilo, wasikivu wamempata sikuzote akiwa mwanana na mpole, mwenye kuburudisha kama kikombe cha maji baridi katika siku yenye joto la kutosha jasho jingi. (Mathayo 11:28, 29) Lakini Wakristo katika Laodikia si moto wala baridi. Kama yale maji yanayotiririka kuingia jiji lao, wao wamevuvuwaa, wamekuwa vuguvugu. Wao wanaelekea kukataliwa kabisa na Yesu, ‘kutapikwa watoke katika kinywa chake’! Sisi kwa upande wetu na tujitahidi kwa bidii sikuzote, kuwaandalia wengine burudisho la kiroho, kama alivyofanya Yesu.—Mathayo 9:35-38.