Biblia Mpya Katika Kigiriki cha Kisasa

AGOSTI 23, 1997, ilikuwa siku ya pekee kwa wale waliokusanyika kwenye “Imani Katika Neno la Mungu” Mkusanyiko wa Wilaya katika Ugiriki. Karibu na mwisho wa kipindi cha alasiri, Biblia mpya ilitolewa — Tafsiri ya Ulimwengu Mpya ya Maandiko Matakatifu katika Kigiriki cha kisasa. Wasikilizaji wenye kushangaa waliitikia mara moja kwa machozi ya shangwe na vifijo!

Tangu 1905, Mashahidi wa Yehova wamekuwa wakitumia tafsiri ya Biblia ya karne ya 19 ambayo ilitokezwa na kasisi wa Kanisa Othodoksi la Ugiriki. Biblia hiyo iliwasaidia kwa miaka mingi. Ingawa hivyo, kwa muda fulani, Mashahidi wa Yehova wamehisi uhitaji wa kuwa na tafsiri ya Biblia ambayo ni sahihi zaidi na rahisi kueleweka. Katika 1993, walifurahi kupokea tafsiri ya Kigiriki ya Tafsiri ya Ulimwengu Mpya ya Maandiko ya Kigiriki ya Kikristo. Hata hivyo, sasa, walijawa wa shangwe kuwa na Biblia nzima katika Kigiriki cha kisasa.

Shahidi mwenye uthamini aliiita Tafsiri ya Ulimwengu Mpya “shairi, pepezi yenye uanana iliyo na sauti ya Yehova, ambayo kwa mara ya kwanza, twaweza kuielewa waziwazi katika lugha yetu wenyewe.” Wengine walianza kuisoma Biblia yao mpya mara walipofika nyumbani. Mkusanyikaji mmoja mwenye msisimko hakuiweka chini Biblia yake hadi saa saba usiku, alipomaliza kusoma kitabu kizima cha Ayubu!

Tafsiri ya Ulimwengu Mpya ya Maandiko Matakatifu katika Kigiriki ni tokeo la kazi ngumu ya miaka saba. Barua moja iliyopokewa ilisema hivi: “Mwaweza kuwa na uhakika kwamba Tafsiri ya Ulimwengu Mpya itatusaidia sana katika kusaidia watu wenye mioyo myeupe wajifunze kuhusu Yehova.”