Matarajio yenye kupita kiasi yaweza kwa urahisi kugeuka kuwa mwelekeo wa kutaka ukamilifu, nao waweza kuwa wenye kukatisha tamaa kabisa. Kijana ambaye ameoa aitwaye Ben akiri: “Ninapochunguza matendo, mawazo, na hisia zangu, sikuzote naona jinsi ambavyo ningaliweza kufanya vyema zaidi. Daima natafuta ukamilifu, nayo matokeo ni hali ya kuvunja matumaini, kutokuwa na subira, na kukatishwa tamaa.” Gail aliye mke Mkristo asema hivi: “Mwelekeo wa kutaka ukamilifu hauruhusu ushindwe kamwe. Tunataka kuwa mama au wake bora. Lazima tuwe na matokeo, sivyo hatutakuwa wenye furaha; kushindwa kwamaanisha kupoteza wakati na nguvu, nako kwatuudhi.”

Athari za mwelekeo wa kutaka ukamilifu zaelezwa vizuri katika msemo huu: “Kutarajia maisha yawe jinsi tunavyotaka kabisa ni kana kwamba tunataka kukatishwa tamaa.” Ili tuepuke kukatishwa tamaa tunahitaji kurekebisha mawazo yetu. Unyenyekevu na kiasi—yaani kuwa na maoni yanayofaa juu ya udhaifu wetu—hakika zitatusaidia kusitawisha matarajio yenye kiasi na usawaziko. Kwa kufaa, andiko la Waroma 12:3 latuonya kwamba ‘tusijifikirie wenyewe zaidi kuliko ilivyo lazima kufikiri.’ Na kwa kuongezea, andiko la Wafilipi 2:3 latutia moyo tuwe na hali ya akili ya kujishusha chini na kuona wengine kuwa wakuu kuliko sisi.