7. Mtazamo wa kungoja utatusaidiaje kuwa na maoni ya kupata uelewevu wa Biblia ulioboreshwa hatua kwa hatua?

⁷ Unabii mbalimbali wa Biblia uendeleapo kutimia, uelewevu wetu wa Maandiko huboreka. Hata hivyo, huenda nyakati nyingine tukaona kwamba wakati wa ufafanuzi fulani umefika. Ikiwa ufafanuzi huo hauji wakati tunapotaka, je, tuko tayari kungoja? Kumbuka kwamba ilimpendeza Yehova kufunua kidogo kidogo “siri takatifu ya Kristo” kwa kipindi cha miaka ipatayo 4,000. (Waefeso 3:3-6) Basi je, tuna sababu yoyote ya kukosa subira? Je, tunashuku kuwa “mtumwa mwaminifu na mwenye busara” amewekwa rasmi kuwapa watu wa Yehova “chakula chao kwa wakati unaofaa”? (Mathayo 24:45) Mbona tujinyime furaha ya kimungu kwa sababu tu hatuelewi mambo yote kikamilifu? Kumbuka, Yehova huamua ni lini na jinsi gani azifunue “siri” zake.—Amosi 3:7.

10. Mtu mwenye mtazamo wa kungoja aweza kuepuka tabia gani isiyomcha Mungu? Eleza.

¹⁰ Mtazamo wa kungoja pia hutusaidia kuepuka kiburi. Watu fulani ambao wameasi imani hawakuwa tayari kungoja. Labda waliona kuna uhitaji wa marekebisho katika uelewevu wa Biblia au katika mambo ya kitengenezo. Lakini, walishindwa kukubali kwamba roho ya Yehova humchochea mtumwa mwaminifu na mwenye busara kufanya marekebisho kwa wakati Wake, wala si wakati tunapofikiri hayo yanahitajika. Na marekebisho yoyote yale lazima yapatane na mapenzi ya Yehova, si mawazo yetu binafsi. Waasi-imani huruhusu mtazamo wa kiburi upotoe fikira zao na kuwakwaza. Lakini kama wangalikuwa na mtazamo wa akili wa Kristo, wangalidumisha shangwe yao na kubaki miongoni mwa watu wa Yehova.—Wafilipi 2:5-8.