Je, umewahi kujiuliza maswali kama hayo? Ikiwa ndivyo, hauko peke yako. Ulimwenguni pote watu wanajiuliza maswali muhimu kuhusu maisha. Je, unaweza kupata majibu?

Huenda mamilioni ya watu wakajibu, “Ndiyo!” Kwa nini? Kwa sababu wamepata majibu yenye kuridhisha ya maswali yao katika Biblia. Je, ungependa kujua kile ambacho Biblia inasema? Basi, utanufaika zaidi kwa kujifunza Biblia na Mashahidi wa Yehova bila malipo.a

Ni kweli kwamba inapohusu kujifunza Biblia, baadhi ya watu husema: “Nina shughuli nyingi.” “Biblia haieleweki.” “Ninaogopa kuahidi kwamba nitapatikana ili kujifunza.” Hata hivyo, wengine wana maoni tofauti. Wanakubali kujifunza kile ambacho Biblia inafundisha. Fikiria mifano michache:

• “Nilishirikiana na makanisa ya Kikatoliki na Kiprotestanti, hekalu la Kalasinga, makao ya watawa Wabudha, na nilisomea theolojia katika chuo kikuu. Hata hivyo, maswali yangu mengi kuhusu Mungu hayakujibiwa. Kisha, Shahidi wa Yehova alinitembelea nyumbani. Nilikubali kujifunza Biblia baada ya dada huyo kujibu maswali yangu kwa kutumia Biblia.”—Gill, Uingereza.

• “Nilikuwa na maswali mengi kuhusu maisha, lakini majibu ya mchungaji wangu hayakuniridhisha. Hata hivyo, Shahidi wa Yehova alijibu maswali yangu kwa kutumia Biblia tu. Aliponiuliza ikiwa ningependa kujifunza mengi zaidi, nilikubali mara moja.”—Koffi, Benin.

• “Nilitaka sana kujua kinachopata watu wanapokufa. Niliamini kwamba wafu wanaweza kudhuru walio hai, lakini nilitaka kujua kile ambacho Biblia inasema. Hivyo, rafiki yangu ambaye ni Shahidi alianza kunifundisha Biblia.”—José, Brazili.

• “Nilijaribu kuisoma Biblia lakini sikuielewa. Kisha, Mashahidi wa Yehova walinitembelea na kunifafanulia vizuri unabii unaopatikana katika Biblia. Baada ya hapo, nilitaka kujifunza mengi zaidi.”—Dennize, Mexico.

• “Nilifikiria sana ikiwa kwa kweli Mungu ananijali. Hivyo, nikaamua kusali kwa Mungu anayetajwa katika Biblia. Siku iliyofuata, Mashahidi walinitembelea nyumbani kwangu, nami nikakubali funzo la Biblia.”—Anju, Nepal.

Masimulizi hayo yanatukumbusha maneno haya ya Yesu: “Wenye furaha ni wale wanaotambua uhitaji wao wa kiroho.” (Mathayo 5:3) Naam, kiasili wanadamu wana uhitaji wa kumjua Mungu. Ni Mungu tu anayeweza kutimiza uhitaji huo, na anafanya hivyo kupitia Neno lake, Biblia.

Hata hivyo, funzo la Biblia linahusisha nini? Litakunufaishaje? Maswali hayo yatajibiwa katika makala inayofuata.

Mashahidi wa Yehova wanajulikana sana kwa sababu ya kazi yao ya kuhubiri hadharani. Hata hivyo, je, unajua kwamba sisi hujifunza na watu Biblia duniani pote?

Katika mwaka wa 2014, zaidi ya Mashahidi 8,000,000 katika nchi 240, waliongoza mafunzo ya Biblia, 9,500,000 hivi kila mwezi.a Kwa kweli, idadi ya watu wanaojifunza Biblia pamoja nasi, inazidi idadi ya watu katika nchi 140 hivi!

Ili kufanya kazi hii ya kuelimisha watu, kila mwaka Mashahidi wa Yehova huchapisha Biblia, vitabu, magazeti na machapisho mengine ya Biblia, bilioni moja na nusu hivi katika lugha 700! Jitihada hizo kubwa za kuchapisha zinasaidia watu wajifunze Biblia katika lugha wanayopendelea.

MAJIBU YA MASWALI YANAYOULIZWA MARA NYINGI KUHUSU MPANGO WETU WA KUJIFUNZA BIBLIA

Utaratibu wa kujifunza umepangwa jinsi gani?

Sisi huchukua habari mbalimbali zinazopatikana katika Biblia na kuchunguza mistari ya Biblia inayohusiana na habari hizo. Kwa mfano, Biblia inatoa majibu ya maswali kama vile: Mungu ni nani? Ana utu wa aina gani? Je, ana jina? Anaishi wapi? Je, tunaweza kumkaribia? Watu wengi hupata changamoto ya kujua ni wapi katika Biblia wanaweza kupata majibu.

Ili kuwasaidia watu wapate majibu ya maswali ya Biblia, sisi hutumia kitabu chenye kurasa 224, kinachoitwa Biblia Inafundisha Nini Hasa?b Kitabu hicho kimetayarishwa ili kuwasaidia watu kuelewa mafundisho ya msingi ya Biblia. Mafundisho hayo yanatia ndani masomo kuhusu Mungu, Yesu Kristo, kwa nini wanadamu wanateseka, ufufuo, sala, na mengine mengi.

Funzo linaweza kufanywa wakati na mahali gani?

Funzo linaweza kufanywa wakati na mahali panapokufaa.

Vipindi vya kujifunza huchukua muda gani?

Watu wengi hutenga saa moja au zaidi kila juma ili kujifunza Biblia. Hata hivyo, urefu wa kujifunza wa kila kipindi unaweza kubadilika. Tutajifunza kulingana na ratiba yako. Wengine wamejifunza kwa dakika 10 au 15 tu kila juma.

Funzo hilo linagharimu pesa ngapi?

Funzo na machapisho ya kujifunzia hutolewa bila malipo. Hilo linapatana na agizo hili la Yesu alilowapa wanafunzi wake: “Mlipokea bure, toeni bure.”—Mathayo 10:8.

Funzo linachukua kipindi gani mpaka kumaliza?

Unaweza kujifunza kwa kipindi cha wakati unachopenda. Kitabu Biblia Inafundisha Nini Hasa? kina masomo 19. Unaweza kumaliza masomo hayo yote kulingana na nafasi yako.

Je, ni lazima niwe Shahidi wa Yehova baada ya kumaliza kujifunza?

Hapana. Tunatambua na tunaheshimu uhuru alionao kila mtu wa kuamua atakachoamini. Hata hivyo, watu waliopata ujuzi wa msingi wa Biblia wanaweza kufanya uamuzi kulingana na ujuzi huo.

Nitapata wapi habari zaidi?

Tovuti ya jw.org/sw inatoa habari sahihi kuhusu imani na utendaji wa Mashahidi wa Yehova.

Ninawezaje kuomba funzo la Biblia?

• 

  Tuma ombi kupitia www.jw.org/sw.

• Tuma ombi lako ukitumia mojawapo ya anwani zinazopatikana katika ukurasa wa pili wa gazeti hili.

• Wasiliana na Mashahidi wa Yehova walio karibu nawe. Unaweza pia kutafuta Mashahidi wa Yehova katika kitabu cha orodha ya simu.