Kuwasaidia Wote Ambao Wameonyesha Kupendezwa
1 Imani yetu na upendo wetu kwa wengine utatusukuma kuwasaidia wote ambao wameonyesha kupendezwa na habari ya Ufalme katika Machi na kuwakaribisha kwenye Ukumbusho. Watu kama hao wanahitaji kuongozwa kwenye uandalizi wa Yehova wa wokovu, ambao unategemea dhabihu ya fidia ya Kristo.—Ebr. 9:28.
2 Ni wazo zuri kupanga orodha ya wale unaotaka kualika kwenye Ukumbusho. Tia ndani wowote wanaohudhuria mikutano mara kwa mara pamoja na wale ambao walikuwa wakijifunza au ambao kwa njia fulani wameonyesha kupendezwa. Usisahau wenzi wa ndoa wasioamini na washiriki wengine wa familia. Baada ya kupanga orodha yako, fanya bidii ya kipekee kumzuru kila mmoja. Unaweza kuwaomba wazee wakusaidie katika kuwazuru wengine.
3 Unaweza kusema nini unapozuru?
Baada ya salamu changamfu, unaweza kusema hivi:
◼ “Wakati uliopita ulionyesha kupendezwa katika mambo ya kiroho, na nikafikiria kwamba ungethamini mwaliko huu wa tukio la pekee. [Mpe mwenye nyumba kikaratasi cha mwaliko wa Ukumbusho.] Ukumbusho wa kifo cha Kristo ndilo tukio pekee ambalo Bwana Yesu Kristo aliamuru wafuasi wake wakumbuke. Tunatazamia sana kujikumbusha yale ambayo Kristo alitimiza kwa kifo chake na jinsi tunavyoweza kupata uhai wa milele kupitia hicho. Mwaka uliopita, zaidi ya watu milioni 11 walihudhuria mkutano huu wa pekee. Litakuwa jambo lenye kupendeza ukijiunga nami kuhudhuria mwaka huu.” Hakikisha umeandika wakati na mahali ambapo kundi lenu litaadhimisha Ukumbusho. Pia, jitolee kuandaa usafiri au kwenda kumchukua ikihitajiwa.
4 Wapya wanapohudhuria Ukumbusho wanapaswa kujihisi kuwa wamekaribishwa. Wasaidie wajuane na wahubiri wa kwenu na uwajulishe kwa watu wowote wenye kupendezwa ambao huenda wakawa wanaishi karibu na kwao. Itawatia moyo kujua kwamba watu kadhaa katika ujirani wao wanapendezwa na kweli. Wakaribishe waketi na familia yako wakati wa mwadhimisho wa Ukumbusho ikiwa inawezekana.
5 Bila shaka, kuhudhuria Ukumbusho tu hakutawahakikishia wokovu. Lakini kwa wengi unaoalika, ingeweza kuwa ni hatua yao ya kwanza ya kujizoeza imani katika damu ya Yesu iliyomwagwa. Mrejeapo nyumbani kutoka mkutanoni, mwulize mgeni ikiwa angependa kuhudhuria Mkutano wa watu wote na Funzo la Mnara wa Mlinzi Jumapili inayofuata. Uwe mwenye uchangamfu na mwenye kusaidia. Acha ajue kwamba una nia ya kumsaidia katika njia yoyote uwezayo. Kadiri aanzapo kushirikiana nasi upesi iwezekenavyo kwa ukawaida, ndivyo maendeleo yake ya kiroho yatakavyokuwa haraka zaidi. Tutakuwa na furaha na uradhi jinsi gani kuokoka “ile dhiki kuu” pamoja na wengine wengi ambao huenda tukawa tumeweza kuwasaidia!—Ufu. 7:9, 14.