Je, kutukuza msalaba ni tendo la Kimaandiko?

1 Kor. 10:14: “Wapendwa wangu, ikimbieni ibada ya sanamu.” (Sanamu ni mfano au kiwakilishi kinachosujudiwa, kutukuzwa, au kuabudiwa.)

Kut. 20:4, 5, UV: “Usijifanyie sanamu ya kuchonga, wala mfano wa kitu cho chote kilicho juu mbinguni, wala kilicho chini duniani, wala kilicho majini chini ya dunia. Usivisujudie wala kuvitumikia.” (Ona kwamba Mungu aliwaamuru watu wake hata wasifanye mfano wa kusujudiwa.)

Ona maelezo haya katika New Catholic Encyclopedia: “Kiwakilishi cha kifo cha ukombozi cha Kristo katika Golgotha hakionekani katika sanaa ya viwakilishi ya karne za kwanza za Ukristo. Wakristo wa kwanza, kwa kufuata amri ya Agano la Kale inayokataza sanamu za kuchongwa, walikataa kufanyiza hata chombo cha Mateso ya Bwana.”—(1967), Buku la 4, uku. 486.

Kichapo History of the Christian Church kinasema hivi kuhusu Wakristo wa karne ya kwanza: “Msalaba haukutumiwa wala hapakuwa na mfano wake.”—(New York, 1897), J. F. Hurst, Buku la 1, uku. 366.

Je, kuna makosa ikiwa mtu anaupenda msalaba, lakini hauabudu?

Wewe utaonaje rafiki yako mpendwa sana akiuawa kwa sababu ya mashtaka ya uwongo? Je, utatengeneza mfano wa chombo kilichotumiwa kumuua? Je, utakipenda, au utaona ni afadhali kukiepuka?

Katika Israeli la kale, Wayahudi wasio waaminifu waliomboleza kifo cha mungu wa uwongo, Tamuzi. Yehova alisema kwamba yale waliyofanya yalikuwa “machukizo.” (Eze. 8:13, 14) Kulingana na historia, Tamuzi alikuwa mungu wa Babiloni, na mfano wake ulikuwa msalaba. Tangu mwanzo wake katika siku za Nimrodi, Babiloni ilimpinga Yehova nayo ilikuwa adui wa ibada ya kweli. (Mwa. 10:8-10; Yer. 50:29) Kwa hiyo, mtu akiupenda msalaba, atakuwa akiuheshimu mfano wa ibada inayompinga Mungu wa kweli.

Kama inavyoelezwa katika Ezekieli 8:17, Wayahudi waasi-imani pia ‘walinyoosha chipukizi kuelekea pua ya Yehova.’ Yeye aliliona hilo kuwa “machukizo” na kitu cha ‘kumtia uchungu.’ Kwa nini? Kulingana na maelezo ya watu fulani, “chipukizi,” lilikuwa kiwakilishi cha kiungo cha uzazi cha kiume, kilichotumiwa katika ibada ya viungo vya uzazi. Basi, Yehova ataonaje mtu anapotumia msalaba, ambao, kama tulivyokwisha kuona, ulikuwa mfano uliotumiwa zamani za kale katika ibada ya viungo vya uzazi?

Je, kuna sababu nzuri za kuamini kwamba kuna Mungu?

Zab. 19:1: “Mbingu zinatangaza utukufu wa Mungu; nalo anga linatangaza kazi ya mikono yake.”

Zab. 104:24: “Jinsi kazi zako zilivyo nyingi, Ee Yehova! Zote umezifanya kwa hekima. Dunia imejaa vitu ulivyotokeza.”

Rom. 1:20: “Sifa zake ambazo hazionekani, zinaonekana waziwazi tangu kuumbwa kwa ulimwengu na kuendelea, kwa sababu zinaeleweka kwa vitu vilivyofanywa.”

Gazeti New Scientist lilisema: “Watu wa kawaida wanaendelea kuwa na maoni kwamba wanasayansi ‘wameikana’ dini. Kulingana na maoni hayo, kwa ujumla wanasayansi hawatazamiwi kuwa waamini; wanaamini kwamba Darwin aliondoa kabisa uwezekano wa kuwapo kwa Mungu; na kwamba mfululizo wa mavumbuzi ya kisayansi na ya kitekinolojia tangu wakati huo yameondoa uwezekano wa ufufuo wowote. Maoni hayo ni yenye makosa kabisa.”—Mei 26, 1977, uku. 478.

Mwanachama wa French Academy of Sciences alisema: “Utaratibu wa kiasili haukubuniwa na akili ya mwanadamu wala kuanzishwa na nguvu fulani zenye fahamu. . . . Kuwako kwa utaratibu kunaonyesha kwamba lazima kuwe na akili fulani yenye kupanga mambo. Akili hiyo si ya mtu mwingine bali ni ya Mungu.”—Dieu existe? Oui (Paris, 1979), Christian Chabanis, akimnukuu Pierre-Paul Grassé, uku. 94.

Wanasayansi wametambua elementi zaidi ya 100 za kemikali. Muundo wa atomu zake unaonyesha uhusiano tata wa hesabu kati ya elementi hizo. Jedwali ya elementi huonyesha ubuni ulio wazi. Haiwezekani kwamba ubuni huo wenye kustaajabisha ulijitokeza wenyewe tu.

Mfano: Tunapoona kamera, redio, au kompyuta, tunakubali haraka kwamba bila shaka vitu hivyo vimefanyizwa na mbuni mwenye akili. Basi, je, lingekuwa jambo linalopatana na akili kusema kwamba vitu tata zaidi—jicho, sikio, na ubongo wa mwanadamu—havikufanyizwa na Mbuni mwenye akili?

Ona pia ukurasa wa 390-392 chini ya kichwa “Uumbaji.”

Je, kuwako kwa uovu na kuteseka kunathibitisha kwamba hakuna Mungu?

Fikiria mifano hii: Kwa kuwa visu vimetumiwa kuua watu, je, hilo linathibitisha kwamba hakuna mtu aliyevitengeneza? Ndege zinapotumiwa kuangusha mabomu wakati wa vita, je, hilo linathibitisha kwamba hakuna mtu aliyezitengeneza? Je, kinachomletea mwanadamu msiba si jinsi vitu hivyo vinavyotumiwa?

Je, si kweli kwamba magonjwa mengi yanatokea kwa sababu ya mazoea mabaya ya maisha ya mwanadamu mwenyewe na kwa kujiharibia mwenyewe na wengine mazingira? Je, vita vinavyopiganwa na wanadamu si kisababishi kikubwa cha kuteseka kwa wanadamu? Je, si kweli pia kwamba, huku mamilioni wakiteseka kwa kukosa chakula, kuna chakula cha ziada katika nchi nyingine, hivi kwamba mojawapo ya matatizo ya msingi ni pupa ya wanadamu? Mambo yote hayo yanathibitisha, si kwamba hakuna Mungu, bali kwamba wanadamu kwa kusikitisha wanatumia vibaya dunia na uwezo wao waliopewa na Mungu.

Je, kweli Mungu anajali yanayotupata sisi wanadamu?

Ndiyo, anajali! Fikiria uthibitisho: Biblia inatuambia kwamba Mungu alimpa mwanadamu mwanzo mkamilifu. (Mwa. 1:27, 31; Kum. 32:4) Hata hivyo, ili wanadamu waendelee kuwa na kibali cha Mungu, walipaswa kumtii Muumba wao. (Mwa. 2:16, 17) Ikiwa mwanadamu angetii, angeendelea kuishi maisha makamilifu—bila ugonjwa, bila kuteseka, bila kifo. Muumba angempa mwanadamu mwongozo unaohitajiwa na angetumia uwezo Wake kumlinda mwanadamu asipate msiba wowote. Lakini mwanadamu alikataa mwongozo wa Mungu; akachagua kujitawala mwenyewe. Kwa kujaribu kufanya jambo ambalo hakukusudiwa kamwe kufanya, yeye mwenyewe amejiletea msiba. (Yer. 10:23; Mhu 8:9; Rom. 5:12) Hata hivyo, kwa miaka mingi Mungu amekuwa akitafuta kwa subira wale ambao wana nia ya kumtumikia kwa sababu wanampenda yeye na njia zake. Yeye anaweka mbele yao nafasi ya kupata baraka zote ambazo wamenyimwa kwa sababu ya kutokamilika na utawala mbaya wa wanadamu. (Ufu. 21:3-5) Uandalizi ambao Mungu alifanya kupitia Mwanawe ili kuwakomboa wanadamu katika dhambi na kifo ni uthibitisho mzuri wa upendo mkuu wa Mungu kwa wanadamu. (Yoh. 3:16) Pia Mungu ameweka wakati atakapowaharibu wale wanaoiharibu dunia naye atawafanya wale wanaopenda uadilifu waishi kupatana na kusudi lake la kwanza.—Ufu. 11:18; Zab. 37:10, 11; ona pia vichwa “Kuteseka” na “Uovu.”

Je, Mungu ni mtu halisi?

Ebr. 9:24: “Kristo . . . aliingia mbinguni kwenyewe, ili sasa aonekane mbele za uso wa Mungu kwa ajili yetu.”

Yoh. 4:24: “Mungu ni Roho.”

Yoh. 7:28: “Yule aliyenituma ni halisi,” akasema Yesu.

1 Kor. 15:44: “Ikiwa kuna mwili wa nyama, kuna wa roho pia.”

Je, Mungu ana hisia kama za watu walio hai?

Yoh. 16:27: “Baba mwenyewe anawapenda ninyi, kwa sababu mmenipenda na mmeamini kwamba mimi nilitoka nikiwa mwakilishi wa Baba.”

Isa. 63:9: “Wakati wa taabu zao zote hilo lilimtaabisha. . . . Katika upendo wake na katika huruma yake yeye mwenyewe aliwakomboa.”

1 Tim. 1:11: “Mungu mwenye furaha.”

Je, Mungu alikuwa na mwanzo?

Zab. 90:2: “Kabla ya kuzaliwa kwa milima, au kutokezwa kwa dunia na nchi yenye kuzaa kana kwamba kwa maumivu ya kuzaa, tangu wakati usio na kipimo mpaka wakati usio na kipimo wewe ni Mungu.”

Je, hilo linapatana na akili? Akili zetu haziwezi kulifahamu kikamili. Lakini hiyo si sababu halali ya kulikataa. Fikiria mifano: (1) Wakati. Hakuna mtu anayeweza kusema wakati ulianza lini. Na ni kweli kwamba, hata ingawa maisha yetu hukoma, wakati haukomi. Sisi hatulikatai wazo la wakati kwa sababu kuna mambo fulani kuuhusu ambayo hatufahamu kikamili. Badala yake, sisi tunautegemea maishani mwetu. (2) Anga. Wataalamu wa nyota hawaoni mwanzo na mwisho wa anga. Kadiri wanavyoendelea kuuchunguza ulimwengu, ndivyo wanavyoona hauna mwisho. Hawapingi uthibitisho huo; wengi husema anga haina mwisho. Kanuni hiyohiyo inaweza kutumiwa kuhusu kuwako kwa Mungu.

Mifano mingine: (1) Wataalamu wa nyota hutuambia kwamba joto la jua katika kiini chake ni digrii 15,000,000 Selsiasi. Je, tunapinga wazo hilo kwa sababu hatuwezi kufahamu kikamili joto jingi namna hiyo? (2) Wanatuambia kwamba galaksi yetu ya Kilimia ni kubwa sana hivi kwamba nuru inayosafiri mwendo wa zaidi ya kilometa 300,000 kwa sekunde moja ingechukua miaka 100,000 kuivuka. Je, akili zetu kweli zinaufahamu umbali huo? Hata hivyo tunakubali jambo hilo kwa sababu uthibitisho wa sayansi unaliunga mkono.

Ni jambo gani linalopatana na akili zaidi—kwamba ulimwengu uliumbwa na Muumba aliye hai, mwenye akili? au kwamba ulitokea wenyewe tu kutokana na chanzo kisicho hai bila mwelekezo wenye akili? Watu fulani wanakubali maoni hayo ya mwisho kwa sababu kukubali vingine kungemaanisha kwamba wangelazimika kukubali kwamba kuna Muumba ambaye sifa zake hawawezi kuzifahamu kikamili. Lakini inajulikana sana kwamba wanasayansi hawafahamu kikamili utendaji wa chembe za urithi zilizo katika chembe hai na zinazoamua jinsi chembe hizo zitakavyokua. Wala hawajaelewa kikamili jinsi ubongo wa mwanadamu unavyofanya kazi. Hata hivyo, ni nani anayeweza kusema kwamba vitu hivyo haviko? Je, kwa kweli tutarajie kuelewa kila jambo kumhusu Mtu aliye mkuu sana hata akaweza kutokeza ulimwengu mzima, pamoja na ubuni wake wote ulio tata na wenye ukubwa wa kustaajabisha mno?

Je, ni muhimu kulitumia jina la Mungu?

Rom. 10:13: “Kila mtu anayeliitia jina la Yehova ataokolewa.”