Baraka ‘Katika Majira Yanayofaa na Majira Yenye Taabu.’​—2 Tim. 4:2.

KUANZIA miaka ya mwisho ya 1990 na kuendelea, Mashahidi nchini Georgia walifurahia ongezeko kubwa la idadi ya wahubiri na la watu wanaopendezwa. Katika mwaka wa 1998, zaidi ya watu 32,409 walihudhuria Ukumbusho wa kifo cha Kristo.

Hata hivyo, wahubiri wengi, kutia ndani wazee, walikuwa wapya katika kweli na hawakuwa na uzoefu. Wengi walihitaji kuzoezwa jinsi ya kufanya mambo mbalimbali katika utendaji wao wa kiroho. Mazoezi hayo yangetolewaje?

Tengenezo la Yehova Linatoa Utegemezo Zaidi

Arno na Sonja Tüngler, waliokuwa wahitimu wa Tanzu la Shule ya Gileadi huko Ujerumani, walipewa mgawo wa kwenda Georgia mnamo Machi 1998. Mwaka huohuo, Baraza Linaloongoza likaidhinisha kufunguliwa kwa ofisi ya nchi huko Georgia, ambayo ingesimamiwa na ofisi ya tawi ya Urusi.

Halmashauri ya Nchi iliwekwa rasmi isimamie kazi ya kuhubiri. Mara tu utendaji wetu ulipoandikishwa kisheria, machapisho ya Biblia yaliingizwa moja kwa moja kutoka katika ofisi ya tawi ya Ujerumani (sasa inajulikana kama ofisi ya tawi ya Ulaya ya Kati). Kutambuliwa kisheria kulitufungulia njia ya kununua viwanja kwa ajili ya kujenga Majumba ya Ufalme na ofisi ya tawi.

Wakati wa Kuzoezwa Kiroho

Wahubiri wengi hawakuweza kuhubiri nyumba kwa nyumba wakati wa ile miaka mingi ya marafuku chini ya utawala wa Sovieti. Arno Tüngler anakumbuka: “Wahubiri wengi walizoea kuhubiri barabarani, lakini si wote waliozoea kwenda nyumba kwa nyumba na kufuatia upendezi.”

Davit Devidze, ambaye alianza kutumikia katika ofisi ya nchi iliyoanzishwa mnamo Mei 1999, anasema: “Kulikuwa na mengi ya kufanya shambani na pia Betheli. Kuna mambo ambayo tulikuwa tumesoma kuyahusu lakini hatukujua jinsi ya kuyafanya. Kwa hiyo, tulitazama na kujifunza kutoka kwa ndugu wenye uzoefu waliotumwa na Baraza Linaloongoza.”

Kipindi cha mazoezi mengi kilianza kwa ajili ya akina ndugu nchini Georgia. Wale wanaohamia maeneo yenye uhitaji mkubwa wamejionea mara nyingi kwamba si wale wanaozoezwa peke yao wanaopata baraka kutokana na mazoezi yanayotolewa. (Met. 27:17) Kwa kweli, wale waliohamia Georgia kusaidia walijifunza mambo mengi kutoka kwa ndugu na dada wa eneo hilo.

Mashahidi Wenyeji Waonyesha Sifa Zenye Kuvutia

Arno na Sonja wanakumbuka jinsi walivyokaribishwa kwa uchangamfu walipofika Georgia. Ndugu na dada wenyeji walifanya yote wawezayo ili kuwasaidia wajihisi wamestarehe katika mgawo wao mpya.

Sonja anakumbuka ukarimu wao. Anasema hivi: “Wenzi wa ndoa walioishi karibu nasi walikuwa wakituletea chakula kitamu. Dada mmoja alitupeleka katika utumishi wa shambani, akatutambulisha kwa watu katika kutaniko letu jipya, na kutueleza kuhusu utamaduni wa Georgia. Dada mwingine alitufundisha Kigeorgia kwa subira nyingi.”

Warren na Leslie Shewfelt, waliopewa mgawo kwenda Georgia kutoka Kanada mnamo 1999, wanasema: “Upendo tulioonyeshwa na ndugu na dada zetu wa Georgia ulitufanya tuwapende na tulichochewa kuwaiga. Wote, kutia ndani vijana walionyeshana wazi jinsi walivyohisi na walivyopendana sana.”

Wale waliopewa mgawo kwenda Georgia kutoka nchi nyingine hawakuzingatia changamoto walizokabili bali waliangalia sifa nzuri za watu wa eneo hilo. Mtazamo wa unyenyekevu na upendo ambao wamishonari walionyesha, uliwafanya ndugu wa Georgia wawapende sana.

Watu Wanaomwogopa Mungu Waikubali Kweli

Katika miaka ya 1990, watu wengi wenye mioyo minyoofu waliendelea kuikubali kweli. Katika mwaka wa 1998, watu 1,724 walibatizwa. Ni nini kilichowachochea watu wengi sana nchini Georgia kupendezwa na kweli?

Tamazi Biblaia, ambaye alitumikia kwa miaka mingi akiwa mwangalizi wa mzunguko anaeleza hivi: “Tangu utotoni, watu wa Georgia wanafundishwa kumpenda Mungu. Kwa hiyo, tulipowaeleza ujumbe wa Biblia, waliukubali bila matatizo.”

Davit Samkharadze, ambaye anatumikia akiwa mwalimu wa Shule ya Waeneza-Injili wa Ufalme anasema hivi: “Mtu anapoanza kujifunza Biblia, mara nyingi majirani na watu wa familia humpinga. Wanapojaribu kumzuia asiendelee kujifunza Biblia, mara nyingi wapinzani hao huanza kujifunza Biblia!”

Kadiri ujumbe wa Ufalme ulivyoenea, ulibadili maisha ya watu wengi. Mnamo Aprili 1999, kulikuwa na kilele kipya cha watu 36,669 waliohudhuria Ukumbusho.

“Kuna Wapinzani Wengi”

Mtume Paulo aliandika hivi kuhusu kazi yake ya kuhubiri katika jiji la kale la Efeso: “Nimefunguliwa mlango mkubwa unaoongoza kwenye utendaji, lakini kuna wapinzani wengi.” (1 Kor. 16:9) Maneno hayo yanafunua hali ambayo Mashahidi nchini Georgia walikabili miezi michache baada ya Ukumbusho wa kihistoria wa mwaka wa 1999.

Mnamo Agosti mwaka huo, kikundi chenye msimamo mkali cha Kanisa Othodoksi, kikiongozwa na kasisi aliyeachishwa, Vasili Mkalavishvili, kilipanga maandamano jijini Tbilisi na kuchoma machapisho yetu hadharani. Jambo hilo lilianzisha wimbi la mateso yaliyoendelea kwa miaka minne.

Oktoba 17, 1999, watu wachache wenye msimamo mkali wa kidini walikusanya umati wa watu 200 hivi na kuvuruga mkutano uliokuwa ukiendelea wa Kutaniko la Gldani jijini Tbilisi. Wakitumia marungu ya mbao na misalaba ya chuma, waliwavamia wahudhuriaji na kusababisha Mashahidi kadhaa wapelekwe hospitali.

Kwa kusikitisha, washambuliaji hao hawakukamatwa, na mashambulizi dhidi ya Mashahidi yaliendelea. Ingawa mashambulizi hayo yalishutumiwa na maofisa kadhaa wa serikali, kutia ndani Rais Shevardnadze, hakuna aliyechukua hatua madhubuti dhidi ya wahusika. Ilikuwa kawaida kwa maofisa wa polisi kufika muda mrefu baada ya mashambulizi kutekelezwa.

Katika kipindi hichohicho, mshiriki wa bunge la Georgia, Guram Sharadze, alianzisha kampeni kubwa sana ya kuwachafulia Mashahidi jina. Aliwashutumu Mashahidi kwamba wao ni kikundi hatari. Ilionekana kwamba “majira yanayofaa” ya kuhubiri habari njema yalikuwa yamekwisha.

Tengenezo la Yehova Lawasaidia Kukabiliana na Upinzani

Tengenezo la Yehova lilitenda upesi ili kushughulikia mahitaji ya Mashahidi nchini Georgia. Akina ndugu walipata mwelekezo wenye upendo wa jinsi ya kutenda wanaposhambuliwa. Pia, walikumbushwa sababu zinazofanya pindi fulani Wakristo wa kweli wateswe.—2 Tim. 3:12.

Isitoshe, tengenezo la Yehova lilichukua hatua za kisheria kutetea ndugu zetu mahakamani. Ndugu mmoja aliyetumikia katika Idara ya Sheria kwenye ofisi ya tawi ya Georgia anakumbuka hivi: “Katika miaka hiyo minne, tuliwasilisha zaidi ya malalamishi 800 dhidi ya kikundi cha Vasili Mkalavishvili. Tuliwaomba wenye mamlaka na mashirika ya haki za kibinadamu watusaidie. Makao makuu ya ulimwenguni pote ya Mashahidi wa Yehova yalipanga kampeni kubwa ya kuwafahamisha watu kuhusu mateso hayo, lakini hakuna kitu kilichozuia mashambulizi hayo.”a