Ninavutiwa na Mtu wa Jinsia Yangu—Je, Hilo Linamaanisha Mimi Ni Shoga?
La hasha!
Ukweli wa mambo: Katika visa vingi kuvutiwa na mtu wa jinsia yako ni jambo la muda tu.
Lisette, mwenye umri wa miaka 16, ambaye wakati mmoja alikuwa akivutiwa na msichana fulani aligundua hivyo. Anasema: “Kupitia somo la biolojia nilijifunza kwamba katika miaka ya kubalehe, viwango vya homoni hubadilika-badilika sana. Ninafikiri ikiwa vijana wengi zaidi wangejifunza kuhusu miili yao, wangeelewa kwamba kuvutiwa na mtu wa jinsia yao ni jambo la muda tu na hawangeshinikizwa wawe mashoga.”
Kila kijana anahitaji kuamua—ama afuate maoni yaliyopotoka ya ulimwengu kuhusu ngono au aishi kupatana na Neno la Mungu
Lakini vipi ikiwa kuvutiwa kwako na watu wa jinsia yako kunaonekana kuwa si jambo la muda tu? Je, ni ukatili kwa Mungu kumtazamia mtu anayevutiwa na watu wa jinsia yake kuepuka kufanya ngono na mtu wa jinsia yake?
Ikiwa jibu lako kwa swali la pili ni ndiyo, unapaswa kujua kwamba kufikiri kwa njia hiyo kunatokana na wazo la kwamba lazima wanadamu watosheleze tamaa zao za ngono. Biblia inawaheshimu wanadamu kwa kuwahakikishia kwamba wanaweza kuepuka kutenda kupatana na hisia zisizofaa za ngono.—Wakolosai 3:5.
Msimamo wa Biblia ni uleule. Unawahimiza wale walio na hisia za kufanya ngono na watu wa jinsia yao wafanye kilekile ambacho wale wanaovutiwa na watu wa jinsia tofauti wanapaswa kufanya, yaani, ‘waukimbie uasherati.’ (1 Wakorintho 6:18) Ukweli ni kwamba mamilioni ya watu wanaovutiwa kingono na watu wa jinsia tofauti na ambao wanataka kupatanisha maisha yao na viwango vya Biblia lazima wajizuie licha ya vishawishi vyovyote ambavyo huenda wakakabili. Wale walio na maelekeo ya kufanya ngono na watu wa jinsia yao wanaweza kufanya vivyo hivyo ikiwa kwa kweli wanataka kumpendeza Mungu.—Kumbukumbu la Torati 30:19.