Utso ɓarikishiwa daimani aɓada na Muumbizi watru

Mungu a mu toleya wahadi mutrume Ibrahim amba harimwa mbeu yahe vwa u moja atso vingao zi ɓaraka ha « piya zi nishani za i shivandre ya tsi » (Mwandro 22:18). Mbeu iyo, atso ka ɗe mbani ?

Ina kadiri ya maha alifu mbili (2 000), Mungu a mu va mutrume Insa, a ka ɗe i mbeu ya mutrume Ibrahim, ushindzi wa ufanya midjuza miɓole. Midjuza ini yako onesa amba ɗe ha i ndzia ya mutrume Insa ɗe zi ɓaraka za tolewa wahadi mutrume Ibrahim zitso eneao zi nishani (Magalatwiya 3:14).

I midjuza ya mutrume Insa i hakikisha amba waye de aka a tsahulwa na Mungu, pare a ɓarikishe u wanadamu. I onesa i namna Mungu a tso mu rumiao mutrume Insa ile a ɓarikishe daimani aɓada u wanadamu. Tsena i midjuza ya mutrume Insa yako tria mbeli zi swifa ndjema zahe. Nari ngalie ɓaãdhwi yazo :

Usikitifu : Mutrume Insa a vonesa wawaɗe.

Suku, mwenefu a mu tafadhali mutrume Insa a mu vonese. Mutrume Insa a mu ɓamba, tsena a mu djiɓu : « Nisu tsaha ! » Alafu, sa iyo uenefu wahe u lawa (Markusi 1:40-42, Tafaswiri ya dunia mpia).

Uvendza uva : Mutrume Insa a lisi wawo wako kia ndza.

Mutrume Insa kako tsaha watru wa kosewa na shahula. Ha mara mbili ha ushashi, a fanya midjuza ha ulisa zaidi ya watru alifu ha uengedza wana madipe na wana fi (Matiyo 14:17-21 ; 15:32-38). Ɓaãda wa ɗya, watru piya waka wa kura, tsena vuka vu ɓaki shahula nyengi.

Li poreho : Mutrume Insa a ɓaãthi watru wa fa.

Mutrume Insa « asikwa na poreho na » mutru mama aka a filiwa na mume wahe, wala ka kana mutru atso shahilihao na waye. Ɓasi, mutrume Insa a ɓaãthi u mwana moja moja wahe (Lukasi 7:12-15).