Zizo i mitrume wa ri somedzao ju la Mungu

MUTRUME IBRAHIM

Mungu ka ngalia sura, tsena asu tsaha a ɓarikishe piya u wanadamu.

Mungu a mu toleya wahadi mutrume Ibrahim : « Piya zi ngudjama zi lio shivandreju mwa tsi zitso ɓarikishiha ha i ndzia yaho » (Mwandro 12:3).

Risu fundriha trini ? Mungu u ri vendza swafi, tsena waye u tsaha a ɓarikishe piya zi ngudjama zi mu tuĩo, rangu watru ɓaɓa, watru mama ata na u wana.

MUTRUME MUSA (MOUSSA)

Mungu waye mwema, tsena waye u ɓarikisha wawo wa fanyao djitihadi wa mu jue.

Monyewe Ushindzi a mu va mutrume Musa ushindzi wa ufanya midjuza miɓole. Ɓe ata na vavo ne mutrume Musa a fanya swala ini : « Ni onese i heli u dji vingao, ile ni hu jue, tsena ni ɓaki harimwa mukuɓaliyo waho » (Ulawa 33:13). I hadja ya mutrume Musa i mu jivia Mungu, ɓasi a mu ɓarikisha mana a fanya ata a jue, tsena a elewe zaidi i heli a dji vingao na zi swifa ndjema zahe. Ha mufano, mutrume Musa a fundriha amba u Muumbizi, waye Mungu mwema, tsena mutrulivu (Ulawa 34:6, 7).

Risu fundriha trini ? Mungu asu tsaha a ɓarikishe kula mutru a fanyao djitihadi ile a mu jue zaidi, rangu mutru ɓaɓa, mutru mama, au mwana. Harimwa i Miangishio mitwaharifu, Mungu asu eledza i namna ya u mu ambudu, tsena asu rongoa amba asu tsaha ha kweli a ri ve zi radi na zi ɓaraka zahe.

MUTRUME INSA

Ritso jua ri ɓarikishiwe na Mungu daimani aɓada neka risu fundriha ri mu jue mutrume Insa, na ujua tsena zitrendrwa zahe na i misomo yahe.

I Miangishio mitwaharifu isu ri somedza trongo nyengi za patana na ya maesha ya mutrume Insa na i misomo yahe. Mungu a mu va mutrume Insa ushindzi wa ufanya midjuza mengi, mauri uvonesa wafa matso, wafa makio na magoɓo. Ata mutrume Insa a ɓaãthi ɓaãdhwi za u wafu. Ɓasi i midjuza ya mutrume Insa i onesa zizo Mungu atso fanyiaozo piya u wanadamu meso oho. Atso va unono wa kamiliha piya u watru, tsena atso regeza hayi wawo wa fa, harimwa i pevo shivandreju mwa tsi. Mutrume Insa a eledza zizo kula mutru a lazimu a zi fanye ile a pare zi neema zini : « Na tsini i mana ya uhayati mukamilifu kauna mupaka, ɗe wao uhujuwa wawe uliyo Mungu wa kweli weke waho, amoesa wajuwe na uwo wamuv̄eleha, ne ɗe Ĩsa Kiristi. » (Yuhani 17:3).

Mutrume Insa a ka mutru wa poreho, mutrulivu na mwema. Rangu watru ɓaɓa na watru mama, wana hirimu na waɗuhazi, wa ka wengi wakondro mu para ha udjiɓu mulahikio mwema wahe : « Muje nimufundriseni, mana i roho yangu ndzitrulivu, wala wami tsi mutru nidziv̄ao daradja ; v̄av̄o mutsopara uv̄umuzi wa zi roho zanyu » (Matiyo 11:29). Mutrume Insa ako renga u watru washe ha uwema, tsena ako wa stehi, ha kinyume watru wa wakati wahe wako dhulumu u watru mama.

Risu fundriha trini ? Mutrume Insa ako vendza halisi u watru. Tsena a onesa ha uzuri i namna ya lazimu ri renge u watru.

MUTRUME INSA TSI ƊE MUNGU

I Miangishio mitwaharifu isu somedza amba « hatruju v̄wa Mungu moja tu », tsena amba Insa Almasi a ka ɗe u mujudzuzi munyekevu wa Mungu (1 Makorintiyo 8:6). Mutrume Insa a rongoa ha uvenufu amba Mungu muɓole raha na waye, amoesa Mungu ɗe a mu veleha shivandreju mwa tsia (Yuhani 11:41, 42 ; 14:28).