Usaidia wawo wa liona hadja ya musada iyo u vinga ɓaraka

Duniani vanu watru wengi kawa sina makazi, tsena wasu fa na ndza. Ɓaãdhwi yawo kawa sina tsena tama ju la ya maesha. Nari one namna jeje ɗe u wa saidia itso ri vingiao zi radi na zi ɓaraka za Mungu.

ZIZO I MIANGISHIO MITWAHARIFU I RONGOAO

« Uwo a rendrao zema u mutiti, a mu azima Jehovah, waye ɗe atso mu livao na zizo a zi fanyao » (NYASIA 19:17).

I MANA YA USAIDIA WAWO WA LIONA HADJA

Mutrume Insa a toa hale ya mutru ɓaɓa aka a ɓuɓulwa, na waidzi wa mu lishi kaka a fa wala ka ka hayi (Lukasi 10:29-37). Mutru ka mu ji ako vira a zia, a shahiliha na mutru ɓaɓa unu aka a kodza swafi. Laukana kawa kana uraĩa moja, a mu saidia.

Mutru mwema unu a mu va musada wa ãlal-hafla, tsena a mu saidia mutru ɓaɓa unu aka a kodza ha utoa marike, alafu a mu trulidza i roho na izo zaka za mu para.

I hale ini isu ri somedza trini ? Mutrume Insa ako tsaha a onese vanu, amba i lazimu ri fanye piya izo ritso shindrao ri zi fanye ile pare ri saidie wawo wa liona hadja ya musada (Nyasia 14:31). I Miangishio mitwaharifu isu somedza amba tsi hale Mungu atso toa usikini na zi taãɓu. Ɓe mukini usu dji dzisa wakati trini na namna jeje ɗe Mungu atso zi toao. Musomo u ɗungao usu onesa zi ɓaraka Muumbizi waho wa mahaɓa a hu hetsiazo.