Namu mu rumishiye de Jehovah, be tsi de Shetwani

Piyasi ritso juwa ri tsahuwe. Au ri mu rumishiye Jehovah, au ri mu rumishiye Shetwani na ya madjini yahe. Kaitso kiri ra fanya zo mbili. Be iyo borwa mbali mutru hu mu rumishiya de Jehovah !

Jehovah waye mwema

Nori de heli ra y ona, ya madjini yayo u jiviwa ya fanye mbovu na hu tratra wantru. Jehovah kasi namna iyo. Waye u vendza wanadamu nori baba heli a vendzao wana wahe. Waye de uwo a vao « kakula shi volwa na kakula kado ndzuzuri » (Jacques 1:17). Waye ka haraliya wanadamu trongo itsokao yotsi ya wema, laukani trongo iyo itso mu vingiya utungu (Éphésiens 2:4-7).

Namu fikiri mwanashteku zi trongo Insa, Mwana wa Mungu, a zi fanya shivandreju mwatsi. A buwa zi hanyo za mabubu na ya matso ya wafa matso. A vonesa wenefu na magobo. A dimbidza madjini amoesa a vonesa mawade mengi. Ha ushindzi wa Mungu, a regeza ata wantru waka wa fa harimwa uhayati (Matthieu 9:32-35 ; 15:30, 31 ; Luc 7:11-15).

Raha na waye hu ri ambiya trambo za hu ri poteza, Mungu u rongowa tu de y kweli. Waye ka laba mutru atsokao yotsi (Nombres 23:19).

Namu latse zi anmali za ntsama

Nori de heli trandra bwibwi y sikao ndzi, de namna iyo tsena de kitabikoko na unafiki u sikao miliyoni za wantru. Wao u riya wafu. Wao u riya ya madjini. Wao u riya mapizo na ma sahiri. Wa rengwa matreka na uaminifu na zi mila zi lawao na zi trambo za Shetwani lbilisa. Warumwa wa Mungu kawa sikwa na mgala wa zitru zizo piya.

Jehovah mwendza nguvu mbali raha na Shetwani. Neka musi mu ambudu Jehovah, atso mu hifadhuini na ya madjini (Jacques 4:7). Kavwasi mutru a shindro mu triyaoni masahiri. Ha mfano, harimwa y tsi ya Nigéria, wagangi wa raru wahodari wako tsaha wa vutse masahiri ya hu ula Shahidi wa Jehovah tsuwani kako kiri a lawa harimwa li dago. Makati a ona amba masahiri yale kayasi kiri, moja mengoni mwa wagangi a rengwa na trisidzo, ata andre a mu para Shahidi unu a mu tsaha muswamaha.

Neka madjini yasi mu taambishani, mutso juwa mu mu hire Jehovah ha li dzina lahe, na waye atso mu hifadhuini (Proverbes 18:10). Be neka mu tsaha mu pare musada wa Mungu, y lazimu mu latse piya trongo za patana na ugangi na imbada za madjini. Iyo de warumwa wa Mungu wa dago la Ephèse hale oho wa y fanya. Wa ngulidza piya zio zao za utsai wa zi vudzu (Actes 19:19, 20). Leo, warumwa wa Mungu wa lazimu wa fanye sawasawa. Namu latse zi hirizi na zi zio za utsai na kakula shitru ya husu anmali za shi ugangi.

Namu fanye y imbada ya kweli

Neka musi tsaha Mungu a jiviwe na wanyu, kaisi tosha wanyu hu lisha y imbada ya trambo na hu ziya hu fanya trongo mbovu. Y lazimu mu fanye y imbada ya rahara. Y Labiblu isu enyesa iyo ya lazimu y fanyishihe :

Namu ngiliyane na mazahidi ya Jehovah

Shetwani na ya madjini wana wantru shivandreju mwatsi wa somedzao na hu fanya trongo zapeu. Be Jehovah wajau ana warumwa. Wao de Mazahidi ya Jehovah (Isaïe 43:10). Harimwa shivandre yatsi, wa zaidi ya miliyoni tsano. Piyao u fanya djitihadi wa fanye trongo ndjema na hu somedza wantru y kweli. Harimwa tsi nyengi, mutso shindra mu wa pare harimwa li Djumba la Ufalume lao, vahano watso mu rengaoni mihono mili.

Hazi yao de hu saidiya wanyao wa mu rumishiye Mungu. Watso twali y Labiblu na wanyu, hanyu, watso mu saidiyani mu fundriye namna ya hu mu ambudu Jehovah heli ya lazimu. Kamutso kana shahuliva. Ya Mazahidi u jiviwa wa somedze wanyawe y kweli mana wasu wa vendza amoesa wasu mu vendza Jehovah Mungu.