Namna jeje ɗe udjama waho utso kao furahani ?

1. Ile udjama u ke furahani, mana trini ya lazimu vu fanyishihe ndrola sirikalini ?

I Labiblu ina « i haɓari ndjema ndzitukufu ya u Mungu wa raha » (1 Timuthausu 1:11, Tafaswiri ya dunia mpia). U Mungu wa raha asu tsaha amba zi ngudjama zi ke furahani. Waye ɗe a umba u mutru ɓaɓa na u mutru mama wa handra, tsena a wa fungidza. Ha zizo, waye ɗe a liona zi nyasiya ndjema, ha u watru wa lola. Mungu a amurisha kula mutru a tsahao a mu tuĩ, a stehi wajau i sharia ya i sirikali ya i tsi yahe, ya patana na mutru ufanya i ndrola mbeli mwa i yezi ya sirikali. Ɗe ha i namna iyo tu, ɗe Mungu atso kuɓalio i ndrola (Lukasi 2:1, 4, 5). Neka watru wasu tuĩ i sharia ya i sirikali harimwa i ndrola, u mutru mume na u mutru mushe, tsena na wana wao, watso eshi vwamoja. Ɓasi, udjama unu utso eshi harimwa hifadhwi, mahaɓa na furaha. — Soma Mwandro 2:24.

I ndrola, Mungu u i ona jeje ? Ha Mwezi Mungu, i ndrola iyo u tsanganisa mutru ɓaɓa na mutru mama, ile wa eshi vwamoja daima. Jehovah asu tsaha tsena amba, mutru mume na mutru mushe wasu rengeyane hawara (Mahebraniya 13:4). Jehovah u yenga mutru ufungua (Malaki 2:16). Ɓe, neka mutru mume wa mutru, a fanya zina, Jehovah u ruhusu mushe wahe a mu fungue, tsena atso jua a lolwe na mutru ɓaɓa wangina. Wajau, neka mutru mushe ɗe a fanya zina, mume wahe atso jua a mu fungue, tsena atso jua a lole mutru mama wangina. — Soma Matiyo 19:3-6, 9.

2. Mutru mume na mutru mushe wahe wa lazimu wa vingane jeje ?

Mutru ɓaɓa na mutru mama, kula mutru ana dhwamana harimwa i ndrola. Tsena wa lazimu wa saidiane. Iyo ɗe trongo Mungu ako i tsaha makati a wa umba (Mwandro 2:18). Ha ivo i lio amba u mutru mume ɗe u shefu wa udjama, a lazimu a ve mutru mushe wahe na wana wahe zizo zi lio muhimu harimwa ya maesha yao. Tsena i lazimu a wa somedze trongo za Mungu. Mutru mume a lazimu tsena a mu vendze mutru mushe wahe ha djitihadi. Mutru mume na mutru mushe wa lazimu wa vendzane, tsena wa stehiyane wawo na wawo. Ha ivo i lio amba piya u watru wame na u watru washe kawa kamiliha, yaani wa fanyiana mahosa, wa lazimu wa swamihiyane. Iyo ɗe itso fanyao amba i ndrola yao i ke furahani. — Soma Maefeso 4:31, 32 ; 5:33 ; 1 Monye 3:7.

3. Eɓa mu lazimu mu tsapushiane neka ndrola yanyu kai si furahani ?

Neka vwa taãɓu harimwa i ndrola yanyu, kula mutru na fanye djitihadi a mu vinge munyahe ha mahaɓa (1 Makorintiyo 13:4, 5). Urongozi wa Mungu kausu usiya amba, vwa hi ka wana taãɓu harimwa i ndrola, watru wa tsapushiane. — Soma 1 Makorintiyo 7:10-13.

4. Neka wawe mwanamtsa au shaɓaɓi, Mungu asu tsaha trini hahoju ?

Jehovah asu tsaha amba u ke harimwa raha. Asu hu va zi nyasiya ndzuzuri za lazimu, ile u eshi fetre ushaɓaɓi waho. Jehovah asu tsaha amba u vulikie wadzaɗe waho, mana wana hikima na ujuzi raha na wawe (Makolosiya 3:20). Jehovah asu tsaha tsena amba u pare i raha ya mutru ufanya i uvendza yahe, Waye, Muumbizi waho, na i uvendza ya u Mwana wahe. — Soma Mungulidza 11:9–12:1 ; Matiyo 19:13-15 ; 21:15, 16.

5. Neka wawe ɓaɓa au mama, i lazimu u fanye trini ile wana waho wa ke furahani ?

I lazimu u fanye hazi swafi, ile u ve u wana waho shahula, vahanu vwa ulala, na nguo (1 Timuthausu 5:8). Ɓe ile wa ke furahani, i lazimu wajau u wa somedze wa mu vendze Mungu, tsena wawo wa dji lishe wa somedzewe na Mungu (Maefeso 6:4). Neka usu onesa harimwa ya maesha yaho amba usu mu vendza Mwezi Mungu, iyo itso wa saidia wa mu vendze Mungu wajau. Tsena, neka usu somedza wana waho ha urumia i Labiblu, musomo waho utso shindra u parange fikira zao, ha uwema. — Soma Maeledzo ya Tawreta 6:4-7 ; Nyasiya 22:6.

U wanatsa, wawo u ka fetre makati wa trilwao nguvu na ufereshewa, wa hi fanya trongo ndzuzuri. Ɓe i lazimu wajau wa regezewe, tsena wa andilishiwe, wa hi fanya kosa. Malezi mauri ɗe yayo, yatso wa hifadhwi : yatso wa tradza ufanya zitrendrwa za peu, zitso tsongesao amba kawatso ka rahani (Nyasiya 22:15). Ɓe mutru a himo andilisha u mwana, kaya lazimu ata hata a mu andilisha ha udziro wala ha upeu, au ha udhuluma. — Soma Makolosiya 3:21.

Ya Mazahidi ya Jehovah wa trangaza zio nyengi ile zi saidie wadzaɗe na wana. Zi nyasiya zi lio harimwa zio zizo, zi lawa harimwa i Labiblu. — Soma Zaɓur 19:7, 11.