Ni Lazima Utazame Vidio No Blood —Medicine Meets the Challenge

Je, unajua habari za kutosha kuhusu machaguo yanayopatikana kuhusiana na utunzaji wa kiganga usiotumia damu? Je, unaelewa madawa fulani yanayoweza kutumiwa badala ya kutiwa damu mishipani na jinsi hayo yanavyotumika? Tazama vidio hii, na ujaribu ujuzi wako kupitia maulizo yafuatayo.—Taarifa: Kwa kuwa vidio inatia ndani maonyesho mafupi ya upasuaji, wazazi wanapaswa kutumia busara wanapotazama vidio hii na watoto wadogo.

(1) Ni nini sababu ya msingi inayofanya Mashahidi wa Yehova wakatae kutiwa damu mishipani, na kanuni hiyo inapatikana wapi katika Biblia? (2) Matunzo ya kiganga yanapohusika, tunatamani nini? (3) Wagonjwa wana haki gani ya msingi? (4) Kwa nini kukataa kutiwa damu mishipani ni jambo la akili na lenye kuonyesha kwamba mtu anachukua mambo kwa uzito? (5) Mgonjwa anapopoteza kiasi kikubwa cha damu, madaktari wana mambo mawili gani wanayopaswa kutanguliza kwa uharaka? (6) Ni hatari gani za kiafya zinazotokana na kutiwa damu mishipani? (7) Ni ufundi gani mbalimbali ambao madaktari wapasuaji wanaweza kutumia ili kupunguza kiasi cha damu kinachopotea wakati wa upasuaji? (8) Ni mambo gani unayopaswa kujua kuhusu dawa inayotumiwa badala ya kutiwa damu mishipani? (9) Je, upasuaji mkubwa na wenye kutatanisha unaweza kufanywa bila kutia damu mishipani? (10) Hesabu yenye kuongezeka ya madaktari wana nia tayari ya kufanyia Mashahidi wa Yehova nini, na huenda kiwango cha matunzo kwa wagonjwa wote kikawa nini mwishowe?

Bila shaka, litakuwa jambo lenye kusaidia kutazama vidio No Blood pamoja na wanafunzi wowote wa Biblia, wenzi wasio Mashahidi au washiriki wa familia, wafanyakazi wenzetu, walimu, na wanashule wenzetu wanaoweza kutokeza maulizo kuhusu msimamo wetu kuhusiana na damu. Kukubali matunzo yoyote yanayoonyeshwa katika vidio hiyo ni uamuzi wa kibinafsi, unaotegemea dhamiri.—Ona “Maswali Kutoka kwa Wasomaji” katika matoleo ya Mnara wa Mlinzi ya Juni 15 na Oktoba 15, 2000.