Ona Paka Asiyeonekana kwa Vyepesi Anayeishi Katika Muchanga wa Jangwa

[Picha katika ukurasa wa 10] — Kisha miezi miwili ya kubeba mimba, paka anayeishi katika muchanga wa jangwa atakuwa na watoto watatu hivi

KATIKA jangwa kavu sana, wakati wa usiku wenye giza, paka anayeishi katika muchanga anatoka ndani ya shimo lake na kusimama. Anaangalia huku na huku na kusikiliza. Kisha, akiwa mwenye kuchutama chini, munyama huyo anaanza kutembea polepole katika eneo lenye muchanga.

Kwa gafula, paka huyo anamurukia panya wa jangwa asiyekuwa mwangalifu. Kisha, anaendelea kuwinda usiku muzima, akiruka-ruka hewani mara kwa mara ili kunasa panya wengi. Akinasa panya wengi zaidi ya wale ambao anaweza kula, paka huyo anafunika sehemu yenye kubaki katika muchanga. Anarudi tena ndani ya shimo lake asubuhi sana na wakati wa muchana anaonekana mara chache. Ona mambo fulani yenye kupendeza juu ya kiumbe huyo asiyeonekana kwa vyepesi.

Uwezo mukubwa wa kusikia wa paka anayeishi katika muchanga wa jangwa unamusaidia kujua mahali panya wa kuwinda anapatikana, hata ikiwa ni chini ya udongo
Ili kupata paka wa kike, paka wa kiume anatoa sauti nyembamba ya juu sana. Uwezo mukubwa wa kusikia wa paka wa kike unamuwezesha kusikia sauti hiyo hata akiwa mbali sana
Manyoa yanayofunika miguu ya paka huyo yanamusaidia asizame ndani ya muchanga na yanalinda miguu yake isichomwe na muchanga wenye joto kali
Sehemu ya ndani ya kila sikio lake inafunikwa na manyoa manene meupe yanayolinda paka huyo na muchanga unaopeperushwa na upepo
Ni vigumu kuona paka anayeishi katika muchanga kwa sababu sehemu za mwisho za miguu yake zinafunikwa na manyoa mengi yanayofanya mahali alipopita pasionekane vizuri
Paka anayeishi katika muchanga wa jangwa anaweza kuendelea kuishi kupitia maji yanayopatikana katika nyama ya panya anazowinda
Muchanga wa Jangwa la Kara-Kum unaweza kufikia kiwango cha joto cha digrii 80 za Selsiasi. Nyakati nyingine hali ya joto inaweza kushuka sana mupaka kufikia digrii 25 za Selsiasi chini ya zero