Vitu vya Maana Sana vya Historia Yetu
Kulinda Vitu vya Maana Sana Vinavyoonyesha Historia Yetu
WATU wa Yehova wana historia ndefu na yenye kupendeza katika kazi ya Mungu. Tunaweza kujua historia hiyo yenye kupendeza kupitia vichapo vyetu, lakini pia kupitia picha na barua mbalimbali, masimulizi ya maisha ya watu, na vyombo vingine vilivyotumiwa zamani kuhusiana na ibada yetu, kazi yetu ya kuhubiri, na historia yetu. Lakini kuna faida gani kulinda vitu kama hivyo na kutafuta kujua vizuri historia yetu? Katika Israeli, baba wa familia walipaswa kujulisha watoto wao sheria na matendo ya ajabu ya Yehova ili “wawekee Mungu tumaini lao.”—Zab. 78:1-7, (La Sainte Bible en swahili de la R.D. Congo).
Tangu zamani, kuchunguza maandishi ya zamani ili kuonyesha ao kuhakikisha jambo fulani kumesaidia ili mapenzi ya Yehova yatimizwe. Kwa mufano, wakati wapinzani walijaribu kusimamisha kazi ya kujenga hekalu la Yerusalemu, kufanya utafiti katika maandishi ya zamani yaliyokuwa Ekibatana, muji mukuu wa Umedi, kulisaidia kupata mambo ambayo Mufalme Koreshi (Sirise) alikuwa ameandika ili kuruhusu hekalu lijengwe. (Ezra 6:1-4, 12) Kwa hiyo, hekalu likajengwa upya kulingana na mapenzi ya Mungu. Mwandikaji wa Injili Luka, yeye pia alitumia maandishi ya zamani ili ‘kufuata kwa uangalifu mambo yote tangu mwanzo kwa usahihi.’—Luka 1:1-4.
Baraza Linaloongoza linapendezwa sana na historia ya watu wa Mungu. Ili kuonyesha kwamba ni jambo la maana sana kulinda maandishi na kuwajulisha wengine historia yetu, mushiriki mumoja wa Baraza Linaloongoza alisema: “Tunapaswa kujua mahali tunapotoka ili kujua mahali tunapokwenda.” Kwa hiyo, Biro Inayoshugulikia Vitu vya Maana Sana vya Historia Yetu iliundwa hivi karibuni kwenye makao makuu ya Mashahidi wa Yehova huko Brooklyn, New York, na inaongozwa na Halmashauri ya Uandikaji.
“KITABU CHA KUMBUKUMBU CHA FAMILIA” YETU NA “URITI WETU”
Kadiri wakati unavyopita, watu wanasahau mambo yaliyopita zamani, na inaelekea kwamba wengi kati yetu wamesikitika kwa kuwa hatukulinda kumbukumbu la mambo yote ya familia yetu. Katika Biro Inayoshugulikia Vitu vya Maana Sana vya Historia Yetu, kazi kubwa inafanywa ili kulinda uriti wetu mukubwa na unaoongezeka. Picha zinazolindwa kwa uangalifu katika Biro hiyo ni kama “kitabu cha kumbukumbu cha familia” yetu. Katika Biro hiyo utakuta pia vichapo vyetu vya kwanza-kwanza, masimulizi yenye kuvutia ya watu wanaoeleza maisha yao, na vyombo vya maana sana vilivyotumiwa na tengenezo letu zamani. Vitu kama hivyo ni “uriti wetu,” vinasaidia familia yetu ya kiroho kuelewa historia yetu na hivyo kuwa na nguvu na uhakika kuhusu wakati ujao.
Tunakualika ujue mambo yaliyo katika Biro Inayoshugulikia Vitu vya Maana Sana vya Historia Yetu kupitia habari mupya inayoitwa “Vitu vya Maana Sana vya Historia Yetu.” Habari hiyo itatolewa mara ine kwa mwaka katika Munara wa Mulinzi; gazeti la funzo. Kwa mufano, katika gazeti linalofuata mutakuwa habari yenye picha itakayojibu maulizo haya: Chombo kidogo chenye magurudumu mawili kilichoitwa “L’aurore du Millénium” ni nini? Kilitumikishwa na nani? Kilitumiwa wakati gani, na kwa kusudi gani?
Kama kitabu cha kumbukumbu cha familia, picha za zamani na mambo mengine yanayopatikana katika biro hiyo, vinaeleza mambo mengi kutuhusu na kuhusu ndugu zetu wa kiroho waliotutangulia, yaani imani na ujasiri wao, furaha na magumu yanayotokana na kumutumikia Baba wetu mwenye upendo, na jinsi Mungu anavyowaongoza na kuwategemeza kabisa watu wake. (Kum. 33:27) Tuko hakika kwamba Yehova atabariki jitihada zinazofanywa ili kulinda historia ya tengenezo lake. Kujua historia hiyo kutatusaidia tuendelee kuwa na umoja zaidi na kuwa na nguvu ya kutimiza mapenzi yake.
[Sanduku/Picha katika ukurasa wa 31]
Kuchunguza kwa Uangalifu
Wakati wa kutayarisha vitabu vyetu, DVD mbalimbali, na vichapo vingine, waandikaji wetu, wachoraji wa picha, watafiti, na wengine wanatumia maandishi ya historia yetu. Kwa hiyo, Biro Inayoshugulikia Vitu vya Maana Sana vya Historia Yetu inachukua mipango ya kukusanya kwa uangalifu na kulinda maandishi mengi ya historia yetu kutoka biro mbalimbali za tawi ao Betheli, kutoka makutaniko, watu mbalimbali, na mashirika ya ulimwengu. Kwa kifupi kazi hiyo inaendeshwa hivi:
Kupata Vitu na Kuvichunguza: Ni Biro Inayoshugulikia Vitu vya Maana Sana vya Historia Yetu ndio inayopokea ao kununua vitu hivyo. Watu wanaotoa ao kutukopesha vitu hivyo ni wale ambao wanapatikana katika familia za watu waliomutumikia Yehova kwa uaminifu muda wa miaka mingi. Kuchunguza na kulinganisha vitu hivyo kunatusaidia tuelewe vizuri historia yetu na kujua vizuri utendaji wa wale waliomutumikia Yehova kwa uaminifu.
Jinsi Vitu Hivyo Vinavyopangwa: Biro Inayoshugulikia Vitu vya Maana Sana vya Historia Yetu ina vitu vingi; vingine kati yavyo vimekuwa kumepita zaidi ya miaka mia moja. Vitu hivyo ni vya aina tofauti-tofauti na vinapangwa kwa uangalifu ili vipatikane kwa urahisi wakati vinapohitajiwa.
Kuvirekebisha na Kuvilinda: Vitabu vinavyoweza kuharibika haraka ao vyombo vilivyotumiwa zamani vinavyoweza kuharibika vinarekebishwa na kulindwa kwa kutumia njia zenye ufundi. Maandishi, picha, sehemu zenye kuchanika katika magazeti, filme, na mambo yenye kurekodiwa vinatiwa katika ordinatere. Hivyo vinaweza kusomwa na kutazamwa kupitia ordinatere na kuepuka kutumia maandishi ya mwanzo-mwanzo na vitu vingine kwa mikono ili visiharibike.
Kuvichunga Vizuri ili Vitumiwe Tena: Vitu hivyo vinapangwa kwa utaratibu, vinachungwa mahali salama ili visipotee na visiharibiwe na mwangaza ao na umajimaji. Tunatayarisha dosye moja ya kielektroniki katika ordinatere ili kusaidia kutafuta habari kuhusu maandishi hayo ya maana sana yanayotuonyesha historia yetu.
[Picha katika ukurasa wa 32]
1. Tangazo kuhusu filme “Photo-Drame de la Création.” 2. Kitabu cha uandikisho. 3. Gari lililo na kikuza sauti. 4. Jalada la Munara wa Mulinzi wa 15/4/1912. 5. Uamuzi wa kufungwa kwa J. F. Rutherford. 6. Mikro ya radio WBBR. 7. Fono. 8. Kisanduku cha kubebea vitabu. 9. Maandishi ya kipekee. 10. Telegramu kwa J. F. Rutherford.