¿ʼLa Onorúgame nila ju alué ʼwe aʼlá raʼíchali?

1. ¿Ichka newale alué Biblia?

Alué Biblia ʼwe aʼlá raʼíchali nijila napugiti ruwí ramué ejperéliwa nabí jena gawichí (Salmo 37:29). Alué Bíbliachi uchúkame ju 66 líburus, napu osale 40 rió chaʼpirúgame nile Onorúgamete. Alué bajchá malige líburus osale Moisesi aniliame ʼwe ʼya 3,500 bamí, ʼlige nujubá líburu osale Juani, ʼwe ʼya 1,900 bamí. Napu aní alué Biblia Onorúgame nila raʼíchali ju. Onorúgame ʼyale espíritu santo apirigá osimela alué Biblia (2 Samuel 23:2). Ye riótiri osale alué Onorúgame naʼtálila, tabilé osale aʼboi naʼtálila. ʼLiko, alué Biblia Onorúgame nila ju. Leériwa Hechos 3:21.

Eʼnewa alué video ¿Ichka newale alué Biblia?

2. ¿Chonigá ikiru aʼlá bijchígaru napu alué Biblia ʼla bijchiá aní?

Napugiti Onorúgame nulale alué raʼíchali Bíbliachi uchúkame. Ramué ʼla bijchigi ye napugiti Onorúgame aní tachiri tábiri ikimea pe aʼminana, tabilé ʼyégame ju. Alué ralómeli tabilé umeba newá ye tábiri (Josué 23:14). Onorúgame abé aʼwágame ju. Leériwa Apocalipsis (Revelación) 1:1.

ʼLa Onorúgame nejísaká bilé líburu, ʼwe najtékame nímili júkuru. ʼLa nerú weʼká milloni Biblia, ujché jaré cientos raʼíchali ʼlige ʼma weʼká ralómeli Biblia inígame. Rekó alué Biblia ʼwe oʼchérame ju, aʼchigóriga ʼla ruwí napu ralómeli jipe rawé machí alué tábiri nerúgame jena gawichí. 40 rió oságame osale alué Biblia, jaré oságame aní bilé tábiri ʼlige ujché jaré oságame tabilé seʼwináriga aní. Abéchigó, suwábaga tábiri napu ramué leeri alué Bíbliachi beniri Onorúgame ʼwe galeme ju, ʼlige abijí jipe alué Biblia ikiru guʼiria napurigá abé aʼlá ralómeli nibo. Alekeri, milloni ralómeli ʼla bijchigi alué Biblia Onorúgame raʼichálila ju. Leériwa 1 Tesalonicenses 2:13.

Eʼnewa alué video ¿Chonigá ikiru aʼlá bijchígaru napu alué Biblia ʼla bijchiá aní?

3. ¿Tachiri aní alué Biblia?

Alué Biblia raʼicha alué tábiri ʼwe semátiri. Raʼicha alué tábiri ʼwe aʼlá napu Onorúgame pe ʼwe newámala apirigá alué ralómeli. Abéchigó ruwí napuʼlige Onorúgame ʼwe ʼya newale bajchá rió, ʼlige mabule alé gawichí ʼwe semátiri, ʼliko ʼma tabilé ikiru bejté alemi. Abiena ruwí churigá Onorúgame ujchéchigó ye gawichí ʼwe semátiri newámala. Leériwa Apocalipsis 21:4, 5.

Alué Onorúgame nila raʼíchali, nulalila ʼlige rejcholi inígame, guʼiri ramué napurigá ʼwe ganíliga ejperé. Abéchigó aní churigá Onorúgame ju alué ralómeli ʼyuga, beniri aʼboi tábiri ʼwe aʼlá alué inígame. Alué Biblia guʼiri ramué napu machí alué ʼlige abiena ruwí churigá ikiru aʼboi amígola nímala. Leériwa Salmo 19:7, 11; Santiago 2:23, ʼlige 4:8.

4. ¿Tachiri guʼírimala ramué námilia alué Biblia?

Napuʼlige Esusi benírile alué Biblia, leérile peʼkabi raʼíchali (versículos aniliame) ʼlige ruwile. Ye apeli beniri aʼchigóriga Esusi, apirigá guʼiri ramué ʼwe aʼlá námilia napu alué Biblia aní. Leériwa Lucas 24:27, 45.

Ramué ʼwe ʼla machí api mué ʼwe ganíliga ajtímala ʼla abé machísaká alué ʼwe aʼlá raʼíchali Onorúgame nila. Nobi, jaré ralómeli tabilé najkí, ʼlige ujché jaré ʼwe ayó napuʼlige gepú Onorúgame nila raʼíchali. Nobi, tabilé guwana simiboa. Napurigá aní Biblia, alué ralómeli ʼla benísaká Onorúgame nabí ejperélima. Leériwa Juan 17:3, TNM.