¿Ichka ju Onorúgame?

1. ¿Chonigá ramué nirámili júkuru Onorúgame?

Onorúgame newale suwábaga tábiri, tabilé siné oʼchérile ʼlige tabilé siné mukumea (Salmo 90:2). Onorúgame beniri alué ʼwe aʼlá raʼíchali alué Bíbliachi uchúkame (1 Timoteo 1:11). Napugiti boʼné newale ramué, biʼneli eʼwámili júkuru ʼlige nirámili júkuru alué. Leériwa Apocalipsis (Revelación) 4:11.

2. ¿Churigá ju Onorúgame?

Tabilé ʼwesi ralómeli tajsiné etele Onorúgame napugiti boʼné tabilé etérume ju, bilé espíritu ju, alué asíriga abé najtékame ju ramué taʼmé, napugiti ramué saʼpala ʼlige oʼchí júkuru (Juan 1:18; 4:24, TNM). Napuʼlige ramué eté suwábaga napu newale ʼwe aʼlá machirú alué tábiri aʼlá inígame Onorúgame. Alué weʼká rakala ʼlige sewá napu newale beniria ʼwe galeme ju ʼlige abé aʼlá machime ju. Abéchigó, napuʼlige eteru gawichí, ʼpa rewagachi ʼlige soʼpilí, ramué beniwá napu Onorúgame abé aʼwágame ju. Leériwa Romanos 1:20.

Abienachigó ramué ikiru machí Onorúgame leériga alué Biblia. Ye ka raʼicha churigá ju Onorúgame suwábaga alué ralómeli ʼyuga, tachiri galé Onorúgame ʼlige tachiri tabilé galé ʼlige tachiri olá alué napuʼlige ekí seʼwináriga tábiri. Leériwa Salmo 103:7-10.

3. ¿ʼLa inígame Onorúgame bilé rewalá?

Esúsika anile: “Ramué Oʼnola ʼpa rewagachi ajtígame, ramueka najkiákeʼé napurigá nerawa mué rewalá” (Mateo 6:9, TNM). Rekó Onorúgame weʼká tábiri aʼlá inígame biʼlepi rewégame ju. Jaré ralómeli seʼwináriga aní Onorúgame rewalá, napugiti raʼicha ujché jaré raʼíchali. Ralámuli raʼíchali Jeobá aniliame ju, rekó abéchigó Yavé aniliame ju. Leériwa Salmo 83:18 (82:19 jaré Biblia).

Weʼká Bíbliachi, alué Onorúgame rewalá ʼma bujele ʼlige osale Riosi o Waʼlula. Nobi, napuʼlige alué Biblia oserúgame nile, alué Onorúgame rewalá abé 7 mili neraga ujchale. Napuʼlige Esúsika benírile Onorúgame alué ralómeli, unele weʼsá Onorúgame rewalá. Leériwa Juan 17:4.

Eʼnewa alué video ¿ʼLa inígame ju Onorúgame bilé rewalá?

4. ¿ʼLa Onorúgame ʼwe niraga eté ramué?

Onorúgame Jeobá ʼwe galé ramué, ʼliko ¿chonigá nerú asíriga resí níliame? Jaré ʼnátame ju Onorúgame resí olamia ramué napurigá machí ramué ʼla eʼwame nímala. Nobi, ye tabilé bijchiá ju. Leériwa Santiago 1:13.

Jeobá nejí pe lisensia napurigá aʼpílipi ramué chaʼpiboa alué najkí, ʼlige abé aʼlá ju chaʼpiá eʼwawa Onorúgame (Josué 24:15). Nobi, weʼká ralómeli tábiri chátiri nokinali, alekeri nerú asíriga resí níliame. Jeobá ʼwe sewékame ajtí napuʼlige eté suwábaga ye tábiri chátiri. Leériwa Génesis 6:5, 6.

Napugiti Jeobá ʼwe galé ramué ʼlige najkí napu ramué ʼwe ganíliga ejperéliwa, pe ʼwe suwibámala oʼkó ʼlige tábiri chátiri. Nobi, jipe abijí nerú resí níliame ¿chonigá? Alué leccioni 8 ruwimela. Leériwa 2 Pedro 2:9 ʼlige 3:7, 13.

5. ¿Churigá ikiru ramué aʼbé mochiá Onorúgame ʼyuga?

Jeobá najkí ramué raʼichámala alué ʼyuga napurigá aʼboi amígola nímala. Alué ʼwe naʼtemame ju aʼpílipi ramué (Salmo 65:2; 145:18). Abéchigó, Onorúgame eʼkáwinali ramué ʼlige ʼwe niraga eté ramué napuʼlige ʼwe iwériga nocha apirigá eʼwawa napu alué nulá, rekó iʼsínimi tabilé ikiru ʼla sébali olá. Alekeri, rekó ramué tabilé ʼla sébali olame niru, ʼla ikiru Onorúgame amígola nímala. Leériwa Salmo 103:12-14 ʼlige Santiago 4:8.

Napugiti Onorúgame newale ramué, ʼliko ramué asíriga galémili júkuru alué ʼlige tabilé galé aʼchigóriga ta ʼwesi (Marcos 12:30). Napuʼlige bené Onorúgame ʼlige eʼwawa boʼné nulalila, yeka ju napugiti ramué ʼwe galé Onorúgame. Aminami napuʼlige olá ye, Onorúgame amígola ju. Leériwa Efesios 1:17 ʼlige 1 Juan 5:3.