¿Churigá umebámala ramué Onorúgame amígola nímala?

1. ¿Onorúgame ʼla gepú suwábaga oraciones?

Onorúgame nepari alué ralómeli bochígimi gawichí ejperégame apirigá ʼla ikiru aʼbé mochímala Onorúgame ʼyuga raʼíchaga (1 Juan 5:14). Onorúgame tabilé gepú nibilé najkí suwábaga oraciones. Alué Biblia aní napuʼlige bilé rió cha olá boʼné upila ʼlige abé iʼlibeko raʼicha Onorúgame ʼyuga, aʼboi raʼíchali tabilé sebámala napu ajtí Onorúgame (1 Pedro 3:7, TNM). Napuʼlige alué israelitas weʼsá cha nokale, Onorúgame tabilé gepúnale. Nobi, Onorúgame ʼla gepú alué ralómeli ʼwe cha nokame aʼrésaká cha noká. Leériwa Proverbios 28:9 ʼlige Hechos 3:19.

Eʼnewa alué video ¿Onorúgame ʼla gepú suwábaga oraciones?

2. ¿Churigá ikiru raʼicha Onorúgame ʼyuga?

Ramué pe biʼlepi Jeobá nokiboa oración, napugiti alué oración ju apirigá nirawa Onorúgame (Mateo 4:10; 6:9, TNM). Abéchigó, napugiti ramué tabilé ʼla sébali olame ju, nokiboa alué oración Esusi rewalá gite, napugiti Esusi mukule ramué pecados gite (Juan 14:6). Jeobá tabilé najkí api ramué oración weʼsá simérawa bilé raʼíchali nibilé napurigá bilé apeli aní. Abé ʼla ju, raʼicha Onorúgame ʼyuga napu ramué nili pachá sulálachi. Leériwa Mateo 6:7 ʼlige Filipenses 4:6, 7.

Alué Onorúgame napu ramué newale aʼlá aké apiʼlige ramué raʼíchali eʼkilí (1 Samuel 1:12, 13). Onorúgame nepari ramué apirigá nokiboa oración nabí rawé, beʼá ʼlige rukó, napuʼlige goʼá ʼlige ʼwe seweka mochirú. Leériwa Salmo 55:22 ʼlige Mateo 15:36.

3. ¿Churigá guʼiri ramué alué napawika?

Ramué jena gawichí ejperégame napu nerú weʼká ralómeli tabilé bijchígame ju Onorúgame ʼlige ʼwe gaweli napu aní, tabilé bijchigi Onorúgame bujemio najkome. Ye ralómeli olá napu ramué ʼwe seweka mochímala ʼlige aʼboi noká napu ramué ʼma tabilé eʼwánili Onorúgame (2 Timoteo 3:1, 4; 2 Pedro 3:3, 13). Alekeri, ramué resíʼlá napuímala ujché jaré Esusi oyérame apirigá naré oiláriwa. Aʼboi abéchigó resíʼláame ramué nejí oiláriwa. Leériwa Hebreos 10:24, 25.

Napuʼlige ramué napuímala alué ralómeli ʼyuga ʼla galé Onorúgame, ramué ʼwe aʼbé mochímala Onorúgame ʼyuga. Alé napawika testigos Jeobá, ramué beniboa alué fe inígame ujché jaré ralómeli. Leériwa Romanos 1:11, 12, TNM.

4. ¿Churigá umebámala mué Onorúgame amígola nímala?

Mué kilí ʼnatásaká napu ʼma benile Onorúgame alué Bíbliachi. Mué ʼnatawa napu Onorúgame newale, aʼboi rejcholi ʼlige napu aní apirigá olámala pe aʼminana. Napuʼlige mué kilí ʼnata ʼlige raʼicha Onorúgame ʼyuga, guʼírimala mué inamia api Onorúgame abé galeme ju ʼlige abé machime ju. Leériwa 1 Timoteo 4:15, 16.

Mué aʼbé ajtímala Onorúgame ʼyuga ʼla bijchígisaká alué. Alué fe napurigá bilé sewá ju: resíʼlá baʼwí roʼewa nabí rawé, ʼlige alekeri resíʼlá eʼkilí ʼnata chonigá ramué bijchigi. Leériwa Mateo 4:4 ʼlige Hebreos 11:1, 6.

5. ¿Tachiri narémala alué Onorúgame amígola?

Jeobá ʼwe niraga eté alué ralómeli api ʼwe galé alué. Onorúgame umeba tebú aʼboi napuʼlige cha ikí, apirigá boʼné fe tabilé suwibámala ʼlige ʼla nabí ejperélima pe aʼminana (Salmo 91:1, 2, 7-10). Onorúgame ané aʼboi chieri ju alué tábiri api tabilé nokimeli ju apirigá tabilé nayúmala ʼlige beniri churigá ganíliga ejperélima jipe ʼlige pe aʼminana. Leériwa Salmo 73:27, 28 ʼlige Santiago 4:4, 8.