¿Chonigá Onorúgame napabú boʼné pueblo apirigá noká napu boʼné nulá?

1. ¿Chonigá Onorúgame napabule alué israelitas aniliame apirigá boʼné pueblo nímala?

ʼWe ʼya bilé rió Abrani aniliame nile, ʼlige eʼwale Jeobá Onorúgame. Onorúgame chaʼpile Abrani ʼkúchila napu boʼné pueblo nímala ʼlige Onorúgame nijile boʼné nulalila. Ye pueblo, Israel aniliame, nóchale napu beniri ʼla bijchiá nirawa ʼlige repú Onorúgame nila raʼíchali (Salmo 147:19, 20). Alekeri, ralómeli suwábaga pueblos umebámala naré tábiri ʼwe aʼlá. Leériwa Hechos 3:25.

Onorúgame chaʼpile alué israelitas napurigá aʼboi “testigos” nímala, alué raʼichámala ʼla bijchiá Onorúgame nila (Isaías 43:10). Alué napu ʼwe ʼya ikile alué israelitas ʼyuga, beniri napu ramué ʼla eʼwásaká Onorúgame nulalila ʼwe aʼlá ejperéliwa (Deuteronomio 4:6). Ujché jaré ralómeli umebámala machiá ʼla bijchiá Onorúgame alué israelitas gite. Leériwa Isaías 43:12.

2. ¿Chonigá alué oyérame ʼla bijchiá napuíka mochí apirigá noká napu Jeobá nulá?

Alué pueblo Israel aniliame, chaʼpirúgame nile Onorúgame gite, nobi aʼkinana Jeobá ʼma tabilé najkile, alekeri wanápale ujché jaré ralómeli apirigá congregación cristiana nímala (Mateo 21:43, TNM; 23:37, 38). Alekeri jipe rawé, alué ralómeli ʼla eʼwásaká Jeobá napurigá aʼboi testigos, alué cristianos ʼla bijchiá ju, ʼlige alué israelitas ʼma tabilé aʼboi chaʼpirúgame ju. Leériwa Hechos 15:14, 17.

Esusi napabule aʼboi oyérame apirigá raʼichámala alué ʼwe aʼlá raʼíchali Onorúgame nila alué suwábaga ralómeli gawichí ʼlige guʼírimala eʼwawa boʼné nulalila (Mateo 10:7, 11, TNM; 24:14, TNM, 28:19, 20, TNM). Ye nóchali ʼwe yati suwibámala. Abéchigó Onorúgame pe ʼwe bujémala alué tábiri chátiri gawichí nerúgame. Jipe rawé, Jeobá napabuga eʼyena milloni ralómeli bochígimi gawichí ejperégame napurigá napuímala alué religión ʼla bijchiá beniri (Apocalipsis [Revelación] 7:9, 10). Alué ʼla bijchiá Esusi oyérame napuíka nocha napu oiláriwa ʼlige guʼiri aʼnagupi neraga. Suwábaga ralómeli abalieri bení api aní Biblia alé napuíka mochígichi. Leériwa Hebreos 10:24, 25.

3. ¿Churigá chojkíwale alué testigos Jeobá kulika bamíbali?

Alué testigos Jeobá chojkíwale alué bamí 1870 nílige. Pe uʼkabi ralómeli napuíka chojkíwale benea napu aní alué Biblia ʼlige rewale ʼla bijchiá beniri api weʼká bamí alué ralómeli tabilé machile. Ye ralómeli machile napu Esusi nulale aʼboi oyérame raʼichamia ujché jaré ralómeli alué ʼwe aʼlá raʼíchali, alekeri aʼboi chojkíwale benírimia Onorúgame Gobiérnola bochígimi gawichí. Alué bamí 1931, aʼboi chaʼpile alué rewalá testigos Jeobá. Leériwa Marcos 13:10 ʼlige Hechos 5:42.

4. ¿Churigá napuíka nocha alué testigos Jeobá?

Alué bajchá siglo, nerule jaré ralómeli api ʼla machime nile napu guʼírile alué congregaciones cristianas weʼká chojkégame gawichí, ye ralómeli ʼla bijchígile api Esusi nulame nile alué congregación (Hechos 16:4, 5). Abéchigó, jipe rawé alué testigos Jeobá bochígimi gawichí inígame ju alué ralómeli api ʼla machime ju napu guʼiri, alué Cuerpo Gobernante aniliame ju, aʼboi repú alué galí napu alué testigos Jeobá osá, newá ʼlige nachuti apeli Onorúgame nila raʼíchali 750 seʼwináriga raʼíchali. Aʼboi uné alué Biblia napu beniri, abéchigó oiláriwa ʼlige guʼiri abé 120 mili congregaciones api nerú bochígimi gawichí, alé abéchigó nerú rió api ʼla machime ju ʼlige ʼwe galé repuwa alué Onorúgame oyérame. Leériwa 1 Pedro 5:2, 3.

Alué testigos Jeobá nocha napuíka napu raʼicha ujché jaré ralómeli alué ʼwe aʼlá raʼíchali beniri alué Biblia ʼlige guʼiri alué ralómeli apirigá Esusi oyérame nímala. Aʼboi napurigá alué apóstoli, raʼicha simáriga galírili (Hechos 20:20). Abéchigó beniri Onorúgame nila raʼíchali alué ralómeli napu galeme ju ʼla bijchiá. Alué testigos Jeobá tabilé biʼlepi nocha napuíka, abéchigó bilé rejimala ju, ʼwe galegá aʼnagupi neraga, ʼlige boʼné Oʼnó ʼwe ʼla repú (2 Tesalonicenses 1:3). Alué Onorúgame oyérame ʼwe nocha napuíka apirigá ʼla sébali olame ju napu Onorúgame najkí ʼlige guʼiri suwábaga ralómeli, alekeri ye rejimala abé ʼwe ganílime ju bochígimi gawichí. Leériwa 1 Pedro 2:9 ʼlige Hechos 20:35.