¿Chonigá mué abisibi benimeli ju alué Biblia?

1. ¿Churigá guʼírimala mué abisí benigá alué Biblia?

Mué ʼma abé galé Jeobá, napugiti ʼma benile alué bajchá raʼíchali napu Biblia beniri. Nobi, resíʼlá abisí galegá Onorúgame (1 Pedro 2:2, TNM). Mué aʼbé mochímili ju Jeobá ʼyuga benigá alué Onorúgame nila raʼíchali, ʼla mué najkisaka nabí bejtémala. Leériwa Juan 17:3, TNM ʼlige Judas 21, TNM.

Napuʼlige mué abé aʼlá machimela Onorúgame, alué fe abé aʼwágame nímala, ʼlige alarigá Onorúgame ʼwe ganíliga ajtímala (Hebreos 11:1, 6). Alué fe olá api ramué seweme nímala napugiti ʼya cha nokale ʼlige jipe ramué ʼla nokinali alué aʼlá tábiri. Leériwa Hechos 3:19.

2. ¿Churigá mué ikiru guʼiri ujché jaré ralómeli?

Mué ʼla kerékó raʼichánili ujché jaré ralómeli ʼyuga alué napu mué ʼma benile, napugiti suwábaga ramué ʼla ganili raʼicha alué ʼwe aʼlá raʼíchali. Napuʼlige mué abé aʼlá machimela alué Biblia, abéchigó benimela churigá uné alué Biblia apirigá raʼicha Onorúgame ʼlige ruwí alué ʼwe aʼlá raʼíchali Jeobá nila apirigá suwábaga ralómeli. Leériwa Romanos 10:13-15, TNM.

Mué ikiru chojkiwa raʼíchiga mué rejimala ʼlige amígola ʼyuga. Nobi, mué ʼwe semátiri raʼichawa, ʼla niraga eté ujché jaré ralómeli. Tabilé aniwa napu aʼboi bijchigi ʼyégali ju, abé aʼlá ju napu mué raʼicha aʼboi ʼyuga alué aʼlá tábiri napu Onorúgame newámala pe aʼminana. Mué ʼnatawa napu abé najtékame ju mué ʼla sébali olame ʼlige tabilé biʼneli mué semátiri raʼíchali. Leériwa 2 Timoteo 2:24, 25.

3. ¿Tachiri ʼwe aʼlá tábiri mué narémala?

Mué ʼla benísaká alué Biblia aʼbé asíriga mochímala Onorúgame ʼyuga ʼlige boʼné amígola nímala. ʼWe suétiri ju, bilé Onorúgame ranala nímala. Leériwa 2 Corintios 6:18.

4. ¿Churigá mué ikiru abisí olagá napu Onorúgame nulá?

Mué tabilé aʼrewa benea alué Onorúgame nila raʼíchali (Hebreos 5:13, 14, TNM). Mué tániwa bilé testigo Jeobá napu benírimala mué unega alué líburu ¿Qué nos enseña la Biblia? aniliame. Mué ʼla benísaká abé tábiri, abé ganíliga bejtémala. Leériwa Salmo 1:1-3 ʼlige 73:27, 28.

Tabilé weʼkawawa napu alué ʼwe aʼlá raʼíchali Bíbliachi uchúkame Onorúgame nijila. Jeobá ʼwe ganílime ju, ʼlige mué aʼbé mochímala alué ʼyuga, mué ʼla napabúsaká alué aʼboi oyérame ju (Hebreos 10:24, 25). ʼLiko, mué abisí ʼwe iwériga olásaká napu Jeobá najkí, mué ʼla narémala ʼwe semátiri raweli: alué nabí bejtélime. ʼLa bijchiá ju, napu Onorúgame amígola nímala abé najtékame ju. Leériwa 1 Timoteo 1:11, TNM ʼlige 6:19.