LECCIONI 8
¿Chonigá Onorúgame aʼré ikimela tábiri chátiri ʼlige resí níliame?
1. ¿Churigá chojkile alué tábiri chátiri?
Weʼká bamí Onorúgame aʼrele api alué riótiri nulé ʼlige tabilé umeba ʼla eʼselígame ju, napugiti tabilé umeba bujea alué chátiri
Alué chátiri chojkile jena gawichí napuʼlige Satanasi anile bajchá ʼyégali. ʼWe ʼya Satanasi bilé ánjeli ʼwe aʼlá nile, nobi ʼma tabilé najkile ʼla bijchiá (Juan 8:44). Kilí neraga alué najkile apirigá ʼla nerawa, nobi pe biʼlepi Jeobá ju apirigá ʼla nerawa. Satanasi anele bilé ʼyégali Eba bajchá mukí, napu eʼwawa Satanasi ʼlige tabilé eʼwawa Onorúgame. Arani tabilé chigó eʼwale Onorúgame, alekeri nerú ʼwe resí níliame ʼlige suwiyame. Leériwa Génesis 3:1-6, 19.
Napuʼlige Satanasi anele Eba tabilé eʼwawa Onorúgame, chojkile Onorúgame saíla neraga. Satanasi tabilé inámili api Jeobá pe biʼlepi nulame nímili júkuru napugiti Waʼlula ju. Napugiti weʼká ralómeli napuíle Riablo ʼyuga, ʼlige tabilé eʼwánili Onorúgame, jipe rawé Satanasi nulá jena gawichí. Leériwa Juan 14:30 ʼlige 1 Juan 5:19.
2. ¿Onorúgame chátiri newale suwábaga tábiri?
Suwábaga tábiri Onorúgame newale ʼwe aʼlá ju. Alué bajchá ralómeli ʼlige alué ánjeli umebámala sébali olá napu Onorúgame najkí (Deuteronomio 32:4, 5). Onorúgame aʼré napu aʼpílipi ramué nokiboa ʼwe aʼlá o tábiri chátiri. Alarigá guʼiri ramí apirigá ʼla sébali olame nibo napugiti ʼwe galeme júkó ramué Jeobá Onorúgame. Leériwa Santiago 1:13-15 ʼlige 1 Juan 5:3.
3. ¿Chonigá Jeobá tabilé bujé tábiri chátiri?
Jeobá aʼré alué ralómeli api tabilé eʼwánili ʼlige buwé ajtí peʼwera ¿chonigá? Jeobá ramí ruyénali ta ʼwesi gobierno umeba guʼiria alué ralómeli napuʼlige Onorúgame tabilé guʼiri (Eclesiastés 7:29; 8:9). ʼMa simárili 6 mili bamí ʼlige ʼma abé aʼlá machirú: alué ralómeli eʼselígame ju tabilé umeba bujea tábiri chátiri, naʼáwili, najkome, nibilé naulítiri. Leériwa Romanos 9:17.
Nobi, ramué ʼla najkisaka apirigá Onorúgame nulámala, narémala weʼká eʼkarúgame tábiri ʼwe aʼlá (Isaías 48:17, 18). Pe ʼwe, Jeobá suwibámala alué ralómeli api eʼselígame ju. Jena gawichí ejperémala pe alué ralómeli api ʼla eʼwame ju Onorúgame Gobiérnola (Isaías 11:9). Leériwa Apocalipsis (Revelación) 11:15.
Eʼnewa alué video ¿Chonigá Onorúgame aʼré ikimela tábiri chátiri ʼlige resí níliame?
4. ¿Churigá guʼiro ramué api Onorúgame kilí buwé?
Satanasi aní apirigá ralómeli pe eʼwame ju alué Onorúgame napugiti ʼya weʼká tábiri ʼwe aʼlá. Napugiti Onorúgame kilí buwé ramí, alekeri ramué ʼla sébali olame niru, alarigá ruyé api Satanasi ʼwe ʼyégame ju ʼlige ramué najkí eʼwawa Onorúgame Gobiérnola ʼlige tabilé riótiri. Leériwa Apocalipsis 12:10 ʼlige 2 Pedro 3:9.
5. ¿Churigá chaʼpiboa Onorúgame ramué nuleme ju?
Napu ramué nokiboʼre, aní ʼla najkí o tabilé api Onorúgame nulémala
Bajchá, ramué ʼla machímili júkuru churigá Onorúgame najkí ramué ʼla nerawa ʼlige nokimeli ju api aní ʼla bijchiá beniri, ye religión beniri alué Bíbliachi uchúkame (Juan 4:23). Ramué ʼla sébali olásaká apirigá Esusi, tabilé eʼyéname niru política nibilé najkólime, alarigá ramué ʼwe kijchí Satanasi gobiérnola. Leériwa Juan 17:14.
Satanasi uné boʼné aʼwalila apirigá ralómeli cha nokame nímala, napuʼlige ramué tabilé olá ye tábiri chátiri, alué amigo ʼlige rejimala gaweli ramué ʼlige ayome ju ramué ʼyuga (1 Pedro 4:3, 4). Alarigá nísaká, ramueka napuípua alué ralómeli ʼyuga napu galeme ju Onorúgame ʼlige ʼla nokiboa api Onorúgame nulá. Alarigá ramué beniri apirigá Satanasi ʼyégame ju napuʼlige aní ta ʼwesi eʼwame ju Onorúgame napuʼlige ramué ʼwe resí nili. Leériwa 1 Corintios 6:9, 10, TNM ʼlige 15:33.
ʼLa bijchiá ju Onorúgame ʼwe galé ramué, alekeri bujémala resí níliame ʼlige tábiri ʼwe chátiri. Alué ralómeli ʼla bijchígisaká ʼlige eʼwásaká Onorúgame ʼla ejperémala nabí jena gawichí. Leériwa Juan 3:16, TNM.