¿Tachiri beniri alué Biblia pe aʼminana ikimela alué weʼká religiones?

1. ¿Suwábaga religiones ʼwe aʼlá ju?

ʼLa nerú ralómeli ʼwe aʼlá ju ʼlige tabilé riólame ju suwábaga religiones mochígame. ʼLige ʼwe aʼlá raʼíchali ju machí api Onorúgame eté ye ralómeli najtékame ju ʼlige alué tebú. Nobi, jaré religiones olá weʼká tábiri chátiri (2 Corintios 4:3, 4, TNM; 11:13-15, TNM). Ramué gepú jaré religiones guʼiri alué najkome ʼlige weʼká tábiri chátiri noká ujché jaré ralómeli ʼlige chaʼpile uʼkuchítiri, cha olale gojchile alué ʼyuga. ¡Ralómeli aʼlá ʼnátame ʼwe seweme ju alué chátiri api nokame eté boʼné religión! Leériwa Mateo 24:3-5, 11, 12.

Alué religión ʼla bijchiá beniri, Jeobá ʼla nirá, nobi Jeobá ʼwe seweka ajtí alué religión ʼyuga api tabilé ʼla bijchiá beniri. Alué religión api tabilé bijchiá beniri chátiri raʼicha Onorúgame nila, tabilé bijchiá raʼicha alué suwígame, abienachigó beniri alué api tabilé Biblia uchúkame ju. Jeobá najkí alué ralómeli ʼla machimela ʼla bijchiá alué. Leériwa Ezequiel 18:4 ʼlige 1 Timoteo 2:3-5, TNM.

2. ¿Tachiri ikimela alué religiones ʼyuga?

Onorúgame tabilé bijchigi alué religiosos korime Onorúgame ʼwe galé, nobi aʼboi ʼla galé ye Satanasi gawichí (Santiago 4:4). ʼWe ʼya waʼlú uʼkule, napuʼlige Noé bejtégame nile, aʼkinana alemi bile pueblo Babilonia anilichi, chojkile alué religión api tabilé ʼla bijchiá beniri. Jipe suwábaga religiones napu tabilé ʼla bijchiá beniri alué Biblia aní api “Waʼlú Babilonia” aniliame ju. Peʼ we, Onorúgame suwibámala suwábaga religiones api ʼwe ʼyégame ju ʼlige tabilé guʼiri alué ralómeli. Leériwa Apocalipsis (Revelación) 17:1, 2, 5, 16, 17 ʼlige 18:8.

Jeobá ʼla machí alué aʼlá ralómeli mochígame weʼká religionchi ʼyégame ju ichúrimi gawichí nerúgame ʼlige Onorúgame ʼma napabuga ajtí aʼlá ralómeli, ¿churigá? ʼLa bijchiá beníriga. Leériwa Juan 6:45.

3. ¿Chonokimeli ju alué ʼwe aʼlá ralómeli?

Jeobá najkí alué ralómeli galeme ʼla bijchiá ʼlige nokinali ʼwe aʼlá. Alekeri Jeobá tani alué ralómeli buyásiwa alué religión api tabilé ʼla bijchiá beniri. Alué ralómeli galeme Onorúgame newámala tábiri api Onorúgame najkí napurigá ʼwe aʼlá ganíliga nímala. Leériwa Apocalipsis 18:4.

Esusi mukule, aʼkinana weʼká aʼlá ralómeli ʼla ganíliga eʼwale alué ʼwe aʼlá raʼíchali api ruwile alué apóstoli. Jeobá benírile ye ralómeli napurigá abé ʼwe ganíliga ejperé. Aʼchigóriga, ramué abiena eʼwámili júkuru alué ʼwe aʼlá raʼíchali uchú osiruga alé Bíbliachi napugiti Jeobá bajchá ju apirigá ramué. Leériwa 1 Tesalonicenses 1:8, 9 ʼlige 2:13.

Jeobá ʼwe ganíliga naré alué ralómeli napu aʼré religión api tabilé bijchiá beniri ʼlige eʼwánili ʼla bijchiá. Suwábaga ye ralómeli ʼwe ganíliga mochí napugiti Onorúgame amígola ju, abiena weʼká rejimala inígame ju ʼwe galeme ʼlige suwábaga alué nabí ejperémala. ¿Mué ʼla narénali ye tábiri ʼwe aʼlá? Leériwa Marcos 10:29, 30, TNM ʼlige 2 Corintios 6:17, 18.

4. ¿Tachiri newámala Onorúgame napurigá kilí mochiwa ʼlige ʼwe ganíliga ejperéliwa jena gawichí?

Napuʼlige Jeobá suwibasa alué religión tabilé ʼla bijchiá benírime, suwábaga ralómeli ʼwe raʼsálá mochímala jena gawichí. Alué religión api tabilé ʼla bijchiá beniri ʼma tabilé benírimala ʼyégali nibilé rojámala alué ralómeli. Suwábaga ralómeli ʼla nirawa bijchiá biʼlepi Onorúgame. ¿Mué ʼla bijchigi ye ʼwe aʼlá raʼíchali? Leériwa Apocalipsis 18:20, 21 ʼlige 21:3, 4.