LECCIONI 10
¿Churigá machí chieri ju alué religión napu ʼla bijchiá beniri?
1. ¿ʼLa nerú biʼneli bilé religión napu ʼla bijchiá beniri?
“ʼWe majawa alué ʼyégame ralámuli napu ruwime korí napu ané Onorúgame napu ʼwe aʼlá Onorúgame oyérame korime ju, peka Onorúgame oyérame ke” (MATEO 7:15).
Esusi ʼlige aʼboi oyérame nokale napu aní alué biʼlepi religión napu ʼla bijchiá beniri, Esusi anile napurigá bilé bowé ju napu oʼtó nabí ejperélime, nobi pe uʼkabi ralómeli simíbame ju alé bowechi (Mateo 7:14, TNM). Onorúgame pe biʼlepi ʼla niraga eté pe alué napu eʼwame ju alué Onorúgame raʼichálila, alué Biblia aniliame. Alué ralómeli ʼla bijchiá sébali olame napu aní Biblia napuíka mochímala pe bilepi fe. Leériwa Mateo 7:21; Juan 14:6, ʼlige Efesios 4:5, 6.
Eʼnewa alué video ¿Onorúgame ʼla niraga eté suwábaga religiones?
2. ¿Tachiri anile Esusi ʼwe ʼya alué ralómeli ʼyega benírime alué Biblia?
“Aʼboika ʼwe ʼla oyérame korime ju Onorúgame, nobi ʼwe cha nokame júkuru napu tabilé galé Onorúgame” (TITO 1:16).
ʼWe ʼya Esusi anile nerúlimala ralómeli ʼyégame ju, tabilé beniri ʼla bijchiá ʼlige tabilé benírime nímele apirigá Esusi benírile. Ye ralómeli ʼlige aʼboi reʼobá cristianos korime ju, rekó alué aní ʼla bijchigi beniri, nobi ʼwe ʼyégali ju. Ramué ʼla ikiru machiyá chieri ju religión napu ʼla bijchiá beniri, napugiti alué ralómeli ʼla sébali olame ju ʼlige suwábaga ikiru eté ye ralómeli ʼla bijchiá Esusi oyérame ju. Leériwa Mateo 7:15-23.
3. ¿Ichka ʼla sébali olame ju alué religión napu ʼla bijchiá beniri?
Eʼnebo malige tábiri napu nokame ju Esusi oyérame:
ʼLa niraga alué Biblia napu Onorúgame nila raʼíchali. Tabilé bijchigi ujché jaré ralómeli beniri, biʼneli ʼla iwériga nocha napu eʼwawa Onorúgame nila raʼíchali nulá (Mateo 15:7-9). Abéchigó, noká napu alué aʼboi beniri. Leériwa Juan 17:17 ʼlige 2 Timoteo 3:16, 17.
ʼLa nirame ju alué Onorúgame rewalá, Jeobá. Esusi alarigá olale napuʼlige benírile alué boʼné Oʼnó rewalá. Raʼíchale ralómeli ʼyuga churigá ju Onorúgame ʼlige benírile tániwa nirawa ye rewalá napuʼlige raʼicha Onorúgame ʼyuga (Mateo 6:9, TNM). ¿Chieri religión beniri alué Onorúgame rewalá napu mué bejtélachi? Leériwa Juan 17:26, TNM ʼlige Romanos 10:13, 14, TNM.
Raʼicha Onorúgame Gobiérnola. Esusi julárigame nile jena gawichí napu raʼicha ʼwe aʼlá raʼíchali Onorúgame Gobiérnola, biʼlepi ju guʼírimala alué ralómeli. ʼLige Esusi benírile ye napusí nujubá rawé bejtele (Lucas 4:43; 8:1; 23:42, 43, TNM). Abéchigó, anile api aʼboi oyérame raʼichámala Onorúgame Gobiérnola. Alekeri ʼla jaré ralómeli sebasa mué bejtélachi ʼlige mué ʼyuga raʼicha Onorúgame Gobiérnola, ¿chieri religión ju? Leériwa Marcos 13:10.
Tabilé oyérame ju alué chátiri ʼnátili napu nerú jena gawichí. Alué Esusi oyérame tabilé eʼyéname niru política nibilé naʼáwili (Juan 18:36). Tabilé chigó cha nokame ju nibilé tabilé ʼnata napurigá ʼnátame ju alué ralómeli tabilé Esusi oyérame ju (Santiago 4:4). Leériwa Juan 17:16.
Ujché jaré ralómeli ʼla eté apirigá ʼwe najkí aʼbopi neraga. Onorúgame nila raʼíchali beniri api Esusi oyérame ju suwábaga ralómeli nirámili júkuru, tabilé eʼnéniga kochena ejperégame ka. Alué religiones napu tabilé ʼla bijchiá beniri iʼsínimi guʼiri alué ralómeli napu simí najkomia, nobi alué cristianos ʼla bijchiá beniri tajsiné eʼyéname ju najkólichi (Miqueas 4:1-3). Alué Esusi oyérame ʼwe ganíliga mochí ujché jaré ralómeli guʼíriga ʼlige oiláriga, tabilé tániga alué ralómeli aʼboi tábiri inila. Leériwa Juan 13:34, 35 ʼlige 1 Juan 4:20.
4. ¿Mué ʼla machí chieri ju religión napu ʼla bijchiá beniri?
¿Chieri ju religión ʼla bijchiá beniri api aní alué Biblia? ¿Chieri ʼla nirá alué Onorúgame rewalá? ¿Chieri beniri Onorúgame Gobiérnola ʼpa rewagachi ajtígame pe biʼlepi ju umeba guʼiri alué ralómeli? ¿Chieri ju pe biʼlepi religión aʼboi oyérame galeme aʼnagupi ʼlige tabilé najkome? ¿Tachiri aní mué? Leériwa 1 Juan 3:10-12, TNM.