LECCIONI 25
¿Tachiri najkile Onorúgame apirigá nímala ramué?
Alué Biblia aní alué ralámuli «pe kabi bamí ejperégame ju ʼlige nígame ju weʼká tábiri chátiri» (Job 14:1). ʼLiko ¿ye najkí ajáliame Onorúgame nígame niwa? ʼLige, tabilé nisa alarigá, ¿tachiri najkile Onorúgame apirigá nímala ramué? ¿ʼAlá simírimala ye bilé rawé? Etewa chieri ba ʼwe semátiri raʼíchali beniri alué Biblia.
1. ¿Churigá najkí Onorúgame ramué apirigá bejtériwa?
Jeobá najkí ʼwe aʼlá ramué gite. Napu netéasa bajchá ralámuli—Arani ʼlige Eba—, ajchale bilena gawichí ʼwe semátiri: rewégame Ereni. ʼLige alé «abiena Onorúgame anele: ʼEmi weʼká ʼkúchiga mochiwa ʼlige bochiwa jena gawichí, ʼlige jena nulawa suwábaga» (Génesis 1:28). Jeobá najkile apirigá ʼkúchila mochiwa, bochígame gawichí nímala ʼwe semátiri ʼlige repúriame nímala ajágame. Napu Onorúgame najkime nile apirigá ralámuli tabilé nayume nímala ʼlige bejtégame nímala nabí.
Rekó tabilé arigá ju jipe,a napu Onorúgame najkí tabilé nakulígame ju (Isaías 46:10, 11). Boʼné abiena najkí alué ralámuli eʼwame nabí ejperélimala ʼwe aʼlá (leériwa Apocalipsis 21:3, 4).
2. ¿Churigá bejtériga ʼwe raʼsálagá jipe rawé?
Jeobá netele ramué «resíʼlá tábiri espiritual», anilime ju, ne najkí machinali ʼlige nirárime boʼné (leériwa Mateo 5:3-6). Onorúgame najkí ramué amígola nímala boʼné, napu ramué eʼyena «boʼné bowechi», napu ramué ʼwe galé boʼné ʼlige ramué eʼwawa suwábaga sulachí (Deuteronomio 10:12; Salmo 25:14). ʼLa neteasa suwábaga ye, bejtériwa ʼwe raʼsálagá rekó ʼwe resí nilia mochiria. Niráriga Jeobá machiárime ju chonigá bejtériwa, arigá machiboa churigá unewa boʼné ramué ajáliame.
ABÉ BENIBOA
Eʼnewa chekí galériame nile Jeobá napu netea ye gawichí apirigá ramué ʼlige napu beníriame ju boʼné Raʼíchali chonigá ramué bejtériwa.
3. Jeobá najkí alué ralámuli apirigá bejtémala ʼwe semátiri ejperélimala
Eʼnewa alué VIDEO ʼlige raʼichawa ye:
¿Chonigá Onorúgame newale alué ʼwe semátiri gawí?
Leériwa Eclesiastés 3:11 ʼlige raʼichawa ye:
¿Tachiri beniri ye alué Jeobá?
4. Napu Jeobá najkí tabilé nakulíwame ju
Leériwa Salmo 37:11, 29 ʼlige Isaías 55:11, ʼlige raʼichawa ye:
¿Churigá ramué machí api Jeobá najkí apirigá ramué tabilé nakulíwame ju?
Bilé galí ʼma gajunárime uchéchigó netériame ju ʼwe semátiri. Alarigá ikíriame ju ye Gawí: alué ralámuli ʼwe resí olale ye Gawí, Onorúgame ku gatémala alué ralámúli gite napu galeme alué
5. Niráriga Jeobá machiárime ju chonigá ramué bejtériwa
Machiá churigá uné boʼné ajáliame ʼwe raʼsálagá mochiru. Eʼnewa alué VIDEO ʼlige raʼichawa ye:
¿Churigá guʼírole alué mukí Terumi aniliame machiá churigá unémala alué ajáliame?
Leériwa Eclesiastés 12:13 ʼlige raʼichawa ye:
Napuʼlige ramué eté suwábaga napu Jeobá netele ramué gite, ¿tachiri netewa apirigá cheliérabá ʼyawa?
JARÉ RALÁMULI RUKÉ: «¿Chonigá mochiru jena? ¿Chonigá ramué bejtériwa?».
¿Tachiri nejériame mué?
ABÉ NAJTÉKAME
Jeobá najkí apirigá ramué bejtériwa ʼwe raʼsálagá jena Gawichí ʼlige ʼwe aʼlá. Abiena jipe rawé, napu niraga Jeobá suwábaga sulachí ramué machiá chonigá bejtériwa.
Api mué ʼma benile
Napu Jeobá netele Arani ʼlige Eba, ¿tachiri najkí boʼné apirigá alué?
¿Churigá ramué machí api Jeobá najkí apirigá ramué tabilé nakulíwame ju?
¿Tachiri nejkúrimala apirigá unémala ʼwe aʼlá alué ajáliame?
UCHÉ RAJPÉ ʼYÁAWA
Eʼnewa chonigá aʼlá bijchiwa nile alué gawí ʼwe semátiri Ereni rewégame.
«Alué Ereni aniliame, ¿bilé leyenda ju?» (La Atalaya, 1 de enero de 2011)
Beniboa chonigá aʼlá bijchiá ye gawí tajsiné gajunárime nímala.
Beníriwa napu aní alué Biblia chonigá ramué bejtériwa.
Eʼnewa bilé rió napu mayele suwábaga nígame nile machile bilé tábili rokáriame nile.
a Ujchéchi bilena leccioni eʼnewa tachiri tabilé maʼchínale ʼwe aʼlá.