LECCIONI 26

¿Chonigá nerú weʼká chátiri ʼlige resí níliame?

Edición impresa

Napuʼlige ikísimi tábiri chátiri, weʼká ralámuli rukériame ju «¿Chonigá?». Ju ʼwe aʼlá machiá alué Biblia ʼla nejériame ju.

1. ¿Tachiri netele Satanasi apirigá nerúmala jena Gawichí weʼká chátiri?

Alué Riablo, Satanasi, tabilé eʼwame nile Onorúgame. Boʼné najkí nulame ujché jaré, ʼyégali bajchá ralámuli—Arani ʼlige Eba—abiena alué tabilé eʼwame nile. ʼLa gayénale ʼyega aniá alué Eba (Génesis 3:1-5). ʼLa bijchiá mayele Jeobá tabilé najkile apirigá boʼné nígame nímala ʼwe aʼlá, alué nile ʼwe chátiri. Alekeri Satanasi anile alué ralámuli ʼwe raʼsálagá bejtégame nímala tabilé eʼwágame nisa Onorúgame. Napu alué Satanasi anele Eba tajsiné mukumela, alarigá anile bajchá ʼyégame. Alekeri alué Biblia aní alué ju «ʼyégame ʼlige oʼnola alué ʼyégali» (Juan 8:44, TNM).

2. ¿Tachiri netele Arani ʼlige Eba?

Jeobá ʼwe nejime nile Arani ʼlige Eba si. Anele alué goʼpoa apiépiri rojá alé Ereni pe biʼlepi tabilé (Génesis 2:15-17). Rekó alarigá anile, goʼale alué rojá. Eba «chaʼpisá bilé alué rojá rakala, goʼale». ʼLige, bajchibé, Arani «goʼálechigó» (Génesis 3:6). Alarigá okánika tabilé eʼwale Onorúgame. Napurigá Arani ʼlige Eba ʼla sebali olame nile, aʼboi ʼla umeba ʼwe aʼlá netea. ʼLige, alué tabilé eʼwame nile Onorúgame, cha olame nile ʼlige tabilé najkile apirigá boʼné nulémala. Ye netea aʼpárame weʼká resí níliame (Génesis 3:16-19).

3. ¿Chu ikile ramué napu netele Arani ʼlige Eba?

Napu Arani ʼlige Eba tabilé eʼwale, gayénale alué ralámuli tabilé ʼla sébali olame nile, napu boʼné netele arigá ramué nachútale ju. Raʼíchiga napu ju Arani, alué Biblia aní: «ʼWe ʼya bajchá bejtégame rió Arani anilime tabilé ʼla sébali olale napu nulélige Onorúgame ʼlige mukule ʼlige alé si seʼwináriga ikile alué ʼya bajchá bejtégame rió naʼtálila ʼlige jípesí ejperégame tabilé aʼlá ʼnátame ju ralámuli ʼlige suwábaga suwiboli niru» (Romanos 5:12).

ʼLiko, ¿chonigá ramué resí nilia mochiru? Iʼsínimi, tabilé ʼwe aʼlá naʼtáriame ju. Ujché siné, ujché jaré ralámuli chojkila gite. ʼLige, iʼsínimi, resí níliame mochiru napugiti mochiru bilena napu ramué tabilé mochíliame ju (leériwa Eclesiastés 9:11).

ABÉ BENIBOA

Eʼnewa chonigá ramué tabilé aní Onorúgame chojkila ju napu simíriame ju weʼká chátiri ʼlige resí níliame napu nerú jena gawichí, ʼlige chu níliame ju boʼné napu eteru ramué resí nilia.

4. Alué chojkila napu ramué resí nilia mochiru

Weʼká ralámuli mayé Onorúgame nulame ju bojchígame gawichí. ¿ʼLige alué ju ʼla bijchiá? Eʼnewa alué VIDEO.

VIDEO: ¿Chieri nulá jena wijchimoba? (1:24)

Leériwa Santiago 1:13 ʼlige 1 Juan 5:19, ʼlige raʼichawa ye:

¿Onorúgame chojkila ju napu ʼwe resí nili nerú ʼlige ʼwe chátiri?

5. Napu ikí napugiti Satanasi nulá

Eʼnewa alué VIDEO.

VIDEO: ¿Chonigá Onorúgame aʼré apirigá resí níliga mochiwa? (uʼteli) (3:07)

Leériwa Génesis 3:1-6 ʼlige raʼichawa ye:

¿Tachiri ʼyégame anile Satanasi? (Eʼnewa alué bersíkulo 4 ʼlige 5).
¿Churigá anile Satanasi napu Jeobá tabilé najkí ʼwe aʼlá napu ju alué ralámuli?
Napu aní Satanasi, ¿resíʼlá alué ralámuli napu Jeobá nulá alué apirigá raʼsálagá nímala?

Leériwa Eclesiastés 8:9 ʼlige raʼichawa ye:

Napu Jeobá tabilé nulale jena wijchimoba, ¿chu ikile mochí alué ralámuli?

Bajkiá retrato koche etériame ju gawichí churigá nile ya ʼlige jipe ʼlige bachabé: A. Bilé gawichí ʼwe semátiri Ereni aniliame. B. Napu nulame ju jena gawichí aʼpáriame ju najkólime ʼlige eʼluíkame weʼka bamí. Nerú weʼká gobierno, napurigá Egipto, China, Grecia, Roma, Gran Bretaña ʼlige Estados Unidos. C. Ralámuli bejtega ujché siné bilena gawichí ʼwe semátiri.

Arani ʼlige Eba ʼla sébali olame nile alé gawichí ʼwe semátiri, eʼwale Satanasi ʼlige aʼrele Jeobá.
Napu aʼresa Jeobá bochígimi gawichí nachútale nile alué pekado ʼlige naulí, ʼlige mukiálime.
Jeobá suwibámala napu ju pekado ʼlige resí nílime ʼlige mukiálime. Pe ʼwe alué ralámuli ku ʼla sébali olame nímala ʼlige bejtémala alé gawichí ʼwe semátiri.

6. Jeobá oʼkólime ju etesa ramué resí nilia mochígachi

¿Jeobá tabilé oʼkólime ju etesa ramué resí nilia mochígachi? Beníriwa napu alué selígame Rabí ʼlige apóstoli Pegro napu osálime nile. Leériwa Salmo 31:7 ʼlige 1 Pedro 5:7, ʼlige raʼichawa ye:

¿Chu nilia mué napu etea Jeobá ramué resí nilia mochígachi ʼlige boʼné oʼkólime ju etesa?

7. Onorúgame suwibámala napu ju resí níliame bochígimi gawichí

Leériwa Isaías 65:17 ʼlige Apocalipsis 21:3, 4, ʼlige raʼichawa ye:

Jeobá ʼya ʼma anile bujémala napu ju resí níliame ʼya ʼma tabilé nerúmala ʼlige netémala tábiri ʼwe aʼlá. ¿Oilárime mué napu Onorúgame anile? ¿Chonigá?

¿Mué ʼma machime nile?

Napu Satanasi anile bajchá ʼyégame, raʼíchale ʼwe chátiri napu Jeobá. Ye aniame ju ʼwe enátiri raʼíchali boʼné rewalá, Satanasi anile Jeobá tabilé ju ʼwe aʼlá selígame. Pe ʼwe, Jeobá bujémala napu ju resí níliame, nemímala boʼné rewalá. Ye ju, Onorúgame pe ʼwe etérime nímala boʼné gobiérnola ʼwe aʼla ju. Jeobá nemímala boʼné rewalá, ye ju bilé tábiri abé najtékame nerúgame (Mateo 6:9, 10).

JARÉ RALÁMULI ANÍ: «Onorúgame aʼpáriame ju apirigá resí nília mochiwa».

¿Tachíri aní mué?

ABÉ NAJTÉKAME

Satanasi ʼlige bajchá oká ralámuli ju chojkila napu nerú chátiri jena gawichí. Jeobá ʼwe oʼkólime ju etesa ramué resí nilia mochígachi ʼlige pe ʼwe yati suwibámala resí níliame.