LECCIONI 22
¿Churigá umébala predikáriga mué alué ʼwe aʼlá raʼíchali?
Machiá aʼlá beniá alué Bíbliachi, mué ʼnatámala ju: «¡Suwábaga ralámuli machimela ye!». ʼLa bijchiá ju; suwábaga ralámuli machimela ju. Nobi kerékó mué ʼwe majá raʼicha jaré napu mué beniá. Eʼnewa churigá weʼkáriwa alué majáriame ʼlige arigá mué ʼma raʼichárimala ʼwe raʼsálagá alué ʼwe aʼlá raʼíchali alé Bíbliachi uchúkame.
1. ¿Churigá raʼichámala mué ujché jaré si napu mué beniá ajtí?
Alué Esusi oyérame anile: «Ramueka raʼicháwaleké napu ekí eteru, napu ekí akerú, suwábaga alué» (Hechos 4:20). ʼWe najtékame nile alué bijchiá alekeri raʼichánale suwábaga ralámuli napu aʼboi umébame nile. ¿Alarigá chu nili ajtí mué? ʼLiko, ʼyáawa churigá ʼwe niraga raʼichawa ye napu ju mué rejimala ʼlige mué amígola napu mué beniá ajtí (leériwa Colosenses 4:6).
Jaré rejcholi churigá chojkiwa
Napuʼlige raʼíchiga boʼné rejimala, chojkiwa raʼíchiga napu aní alué Biblia aniá ye «Ye tarali benile ne bilé tábiri ʼwe najtékame».
Napuʼlígame bilé amígola nayúkame ajtígachi o weʼka ʼnátiga ajtígachi, leériwa bilé texto apirigá oiláriwa.
Napu bilé kompañérola alué nóchali rukériame nisa chena aʼlá simírale ye oká rawé, raʼichawa napu mué benile alé curso bíblico o alé napuíkachi jaré koche napuíkame ju alé kongregacionchi.
Beníriwa boʼné amígola alué sitio internetchi jw.org.
Bayériwa ujché jaré alé beníriame alué Biblia aminami beníriwa churigá tániwa bilé kurso bíbliko alé jw.org.
2. ¿Chonigá ʼwe aʼlá ju mué predikáriga alué kongregación si?
Napu ju alué oyérame Esusi tabilé raʼíchame nile alué ʼwe aʼlá raʼíchali napu ju alué machiárime si. Esusi «júlale bajchabemi pe okacho neraga iʼwana chojkégame. Júlale alemi weʼkaná riógachi» apirigá predikárimala alé (Lucas 10:1). Alarigá ye netériame guʼírale apirigá weʼká ralámuli akemela alué ʼwe aʼlá raʼíchali. Aminami, alué oyérame ʼwe raʼsálagá mochile predikárile napuíka (Lucas 10:17). ¿ʼLige mué abiena neteasa ye perdikáriwa alué kongregación si?
ABÉ BENIBOA
Eʼnewa tachiri guʼiro apirigá weʼkáriwa alué majáriame ʼlige arigá mué ʼma raʼichárimala ʼwe raʼsálagá alué ʼwe aʼlá raʼíchali.
3. Jeobá asimela mué si
Jaré ralámuli najkinale predikáriga ʼnátame ju napu jaré ralámuli: «tachiri naʼtámala neʼchí».
ʼLige mué, ʼnátiga raʼíchiga ujché jaré si napu beniá, ¿ʼwe majá, o tabilé? ¿Chonigá?
Eʼnewa alué VIDEO ʼlige raʼichawa ye:
¿Tachiri guʼírole alué ejtemali apirigá tabilé majá?
Leériwa Isaías 41:10 ʼlige raʼichawa ye:
¿Chonigá netémala oracioni ʼla majáriame ju predikáriga?
¿Mué ʼma machime nile?
Weʼká napu jipe ju testigo Jeobá ʼnátale tajsiné umébamala predikáriga. Alarigá ikile, bilé rió Sergey anilime ʼnátame nile boʼné tabilé najtékame nile aminami ʼwe nóchame nirame nile raʼicha ujché jaré si. Bilé rawé chojkile beniá alué Biblia. Boʼné aní: «Rekó majáriame nile, chojkile ne raʼíchiga ujché jaré si napu ne benime nile. ʼLiko, ʼnátale ne ʼla najtékame nile napu ne beníriame uchú ne sulachí».
4. ʼWe aʼlá nirawa
Taʼchó predikáriga bilé ralámuli tabilé ʼnata tachiri animela, abiena ʼnata churigá animela mué. Leériwa 2 Timoteo 2:24 ʼlige 1 Pedro 3:15, ʼlige raʼichawa ye:
¿Churigá netémala ne napu aní ye bersíkulo napuʼlige raʼichasa jaré ralámuli si api aní alué Biblia?
Iʼsínimi tabilé narémala jaré rejimala o jaré amígola napu mué aní. ¿Chu ʼsímala mué? ¿ʼLige tachiri tabilé ʼsímala mué?
¿Chonigá ʼwe aʼlá ju ramué raʼicháliga aʼboi si ʼwé aʼlá nirawa, tabilé aniá tachiri bijchiwa alué?
5. Raʼíchiga alué ʼwe aʼlá raʼíchali ʼwe ganíliga mochírime ju
Jeobá nulele Esusi apirigá predikáriwa alué ʼwe aʼlá raʼíchali. ¿Churigá Esusi eteme nile ye nóchali? Leériwa Juan 4:34 ʼlige raʼichawa ye:
Goʼá goʼame ʼwe aʼlá ramué ajágame mochírime ju ʼlige raʼsálagá. ¿Chonigá anili Esusi netea napu Onorúgame najkí, napu ju ʼwe aʼlá predikáriga alué ʼwe aʼlá raʼíchali, apirigá goʼame goʼá ju?
Napu mué ʼnata, ¿chonigá ʼwe raʼsálagá asimela ʼla raʼichasa alué ʼwe aʼlá raʼíchali?
Jaré rejcholi
Alué napuwílime nasipa tarali, eʼnewa jaré tábiri naʼtárime apirigá machí churigá chojkiá alué raʼíchame.
Raʼichawa napu mué beníriame si tachiri netémala mué apirigá mué netémala alué napuwílime nasipa tarali. Alué nóchali mué netémala ʼwe aʼlá guʼírimala apirigá ʼwe aʼlá raʼichámala ujché jaré si napu beniá ajtí.
Unewa aʼpili chojkena «Jaré ralámuli aní» ʼlige «Jaré ralámuli ruké» ye curso apirigá machiboa apirigá nejémala mué napu ju rukéliame o napu jaré tabilé akenale.
JARÉ RALÁMULI RUKÉ: «¿Chieti ajtí mué? ¿Tachiri netea ye tarali?».
¿Churigá raʼichámala mué alué ralámuli napu mué benile alué kurso alué Biblia?
ABÉ NAJTÉKAME
Raʼíchiga alué ʼwe aʼlá raʼíchali ʼwe raʼsálagá mochírime ju, ʼlige chojkilia tabilé nóchali nímala napu mué ʼnata.
Api mué ʼma benile
¿Chonigá najkí mué predikáriga alué ʼwe aʼlá raʼíchali?
¿Churigá netémala mué ye ʼwe aʼlá nirawa?
¿Chu ʼsímala mué apirigá tabilé majawa?
UCHÉ RAJPÉ ʼYÁAWA
Eʼnewa naó tábiri naʼtárime apirigá predikáriga unewa alué tarjeta de contacto jw.org.
Tábiri naʼtárime apirigá unewa alué tarjeta de contacto jw.org (1:43)
Machiboa naó tábiri ʼwe aʼlá apirigá guʼírimala mué raʼíchiga alué ʼwe aʼlá raʼíchali.
«¿Mué ʼsímala ralámuli guʼiria buyana chátiri bowechi eʼyéname?» (La Atalaya, septiembre de 2020)
Eʼnewa napu aní alué Biblia napu guʼírame ju tabilé majá napu predikáriga reʼkó ejtemali ju.
Leériwa churigá raʼichámala mué napu ju alué Biblia alué rejimala tabilé machime Jeobá.