LECCIONI 55
Guʼíriwa mué kongregación
Bochígimi gawichí, weʼká milloni ralámuli ʼwe ganíliga nirame ju Jeobá alé weʼká kongregacionchi. Napu beníriame ʼlige alué aʼlá nareme rejcholi alé, aʼboi ʼwe niraga eteme ju, ʼlige alekeri guʼírame ju weʼkaná neraga. Mué ¿alarigá níliame ju chigó mué kongregacionchi?
1. ¿Churigá ʼla umebámala mué guʼiria weʼkaná neraga mué kongregacionchi?
Suwábaga umeba guʼiria alé kongregacionchi. Mué naʼtawa, ¿ʼla nerusa jaré ermano ʼma oʼchérame o nayume mué kongregacionchi? ¿Mué umeba guʼiri apirigá aʼboi simámala alé napuíkachi? ¿O ʼla umeba guʼiri uché jarena neraga, kerékó ralagá goʼame apiriga aʼboi o biʼwiga alué galila? (leériwa Santiago 1:27). Abiena ramué umeba guʼiri biʼwiga ʼlige gatega alé Galí napu napuíme ju alué testigo Jeobá. Tabilé ʼwesi owerli nulá apirigá mué ye iʼsímala. Ramué aʼboi ʼwe ganíliga guʼírnali napugiti ʼwe galé Onorúgame ʼlige ramué ermano (Salmo 110:3).
Alué testigo ʼma rewarárime ju ʼla umeba guʼiria ujché jarena neraga. Alé kongregacionchi napuʼlige bilé rió ʼla sébali eʼwasa napu aní alué Biblia ʼla umebámala gainámala bilé guʼírame alué rió napu bajchá jágame ju ʼlige napu simíriachi bamí gainámala ju bilé napu bajchá jágame. ʼLige suwábaga ermano, umugí ʼlige riótiri, abé guʼírimala alé predikasión prekursor nisa. Jaré testigo ʼla umeba guʼiri newagá seʼwinátiri galí apirigá nirawa Jeobá ʼlige jaré simí chechi bilena apirigá guʼírimala bilé kongregacionchi najkiárime.
2. ¿Churigá umebámala ramué guʼiria alé kongregacionchi unegá enomí napu ramué ekí nígame niru?
Alué Biblia aní: «ʼWe aʼlá nirawa Onorúgame unegá alué tábiri najtékame napu nígame ju mué» (Proverbios 3:9). ʼWe raʼsálagá uneru enomí ʼlige ujché jaré tábiri apirigá guʼírimala kongregacionchi ʼlige apirigá predikárimala bochígimi gawichí (leériwa 2 Corintios 9:7). Alué enomí napu ramué nejime abiena unériame ju apirigá guʼírimala napuʼlige resí ikichi. Weʼká ermano aʼkuepi wanápame ju enomí apirigá ʼyámala (leériwa 1 Corintios 16:2). Ramué gayena mochiá enomí alé gajónichi napu ilime alé galí napu napuíme ju alué testigo Jeobá o alé donate.jw.org. Jeobá aʼreme ju api ramué unémala alué tábiri napu ramué nígame ju apirigá etériame nímala chekí ramué ʼwe galeme ju Jeobá.
ABÉ BENIBOA
Eʼnewa churigá guʼíriwa mué alé kongregacionchi.
3. Unewa alué tábiri napu mué nígame ju
Jeobá ʼlige Esusi ʼwe ʼla galeme ju alué ralámuli napu aʼlá ganíliga nejime ju. Esusi etele bilé mukí gunálkame tabilé enomígame, rekó alarigá nile alarigá nejile ʼpe uʼkabi enomí. Leériwa Lucas 21:1-4, ʼlige raʼichawa ye:
¿Weʼká enomí nejímili ju ramué apirigá Jeobá ganíliga asimela?
¿Chu nílime ju Jeobá ʼlige Esusi napu ramué aʼlá ganíliga nejisa?
Apirigá machimela churigá unériame ju napu ramué nejime, eʼnewa alué VIDEO. ʼLige raʼichawa ye:
¿Churigá unériame ju alué enomí napu ramué nejime ju apirigá guʼírimala alué kongregación bochígimi gawichí?
4. ʼWe ganíliga mué nochawa guʼíriga
Napu oserúgame nile alué Biblia, alué Jeobá oyérame ʼwe ganíliga nóchale apirigá gatémala alué galí napu nirame nile Onorúgame. Aʼboi tabilé pe enomí nejígame nile. Leériwa 2 Crónicas 34:9-11, ʼlige raʼichawa ye:
¿Churigá aʼpili israelita guʼírale apirigá repumia alué Jeobá galila?
Alué testigo Jeobá abalieri nokame ju napu aʼboi nokale. Apirigá mué machimela, eʼnewa alué VIDEO. ʼLige raʼichawa ye:
¿Chonigá ʼwe najtékame ju ramué guʼíriwa apirigá alué galí napu napuíme ju testigo Jeobá biʼígame ilí ʼlige aʼlá gatériame?
¿Churigá mué umebámala guʼiria?
5. Abé nochámala alué ermano apirigá guʼírimala alé kongregacionchi
Alué Biblia oilárime ju alué riótiri napu kristiano ju apirigá wériga nochawa apirigá abé guʼírimala alé kongregacionchi. Apirigá machimela bilé ermano napu arigá netele, eʼnewa alué VIDEO. ʼLige raʼichawa ye:
¿Tachiri tábiri Ryan ʼsile apirigá abé guʼírimala alé kongregacionchi?
Alué Biblia aní tachiri netémili ju alué ermano apirigá gainámala bilé guʼírame alué napu bajchá jágame ju alé kongregacionchi ʼlige apirigá gainámala bajchá jágame alé kongregacionchi. Leériwa 1 Timoteo 3:1-13, ʼlige raʼichawa ye:
¿Tachiri netémili ju alué ermano napu gainánili guʼírame ju alué bajchá jágame alé kongregacionchi ju ʼlige gainánili alué bajchá jágame alé kongregacionchi?
¿Tachiri netémili ju aʼboi rejimala? (Eʼnewa alué bersíkulo 4 ʼlige 11).
Napuʼlige alué ermano wériga nochasa apirigá netémala ye, ¿churigá guʼírimala alué kongregación?
JARÉ RALÁMULI RUKÉ: «¿Koche maʼchí pame ju enomí alué testigo Jeobá apirigá netémala suwábaga nóchali?».
¿Chu nejémala ju mué?
ABÉ NAJTÉKAME
Jeobá ʼwe ʼla niraga eteme ju napuʼlige ramué nochasa ʼlige enomí nejisa ʼlige uché jaré tábiri guʼíriga alé kongregacionchi.
Api mué ʼma benile
¿Churigá ʼla umebámala ramué guʼiria weʼkaná neraga ramué kongregacionchi?
¿Churigá umebámala ramué guʼiria alé kongregacionchi unegá enomí napu ramué ekí niru?
¿Churigá mué guʼírinali alé kongregacionchi?
UCHÉ RAJPÉ ʼYÁAWA
Beniboa chonigá Onorúgame tabilé tani alué boʼné oyérame najtétime napu ju alué diesmo.
«¿Tachiri aní alué Biblia napu ju alué diesmo?» (Artículo de jw.org)
Alué Biblia nejí alué rió rewarárigame jaré nóchali alé kongregacionchi. Nobi, ¿tachiri ikimela ʼla bilé mukí rewarárigame netémili nísaká alué nóchali?
Machiboa jaré ermano api wériga olame ju apirigá oʼtomea oselí uché jaré ermano.
Machiboa churigá ramué maʼchí pame ju ramué enomí apirigá nochawa, tabilé abalieri ju apirigá ujché jaré relijioni.