LISOMO 15
Sababu ya ki Upalile Kutwalilila Kusambilila Bibilia?
1. Wakaba kupata faida ki kine watwalilila kusambilila Bibilia?
Masambilizio a musiingi a Bibilia ali mu eezi broshua, akikosia kakiine ntono yoobe palwakue Yehova. Kansi, upalile kutwalilila kusuunga ntono ezio. (1 Petro 2:2) Twalilila kumupalama Leeza kupitila kusambilila Mulandu wakue. Ni kupitila sie kusambilila i luwakaba kwaluka ni kiswapilo kya kwikala loonse.—Soma Yoane 17:3; Yuda 21.
Kine watwalilila kumumana Leeza, kiketekelo kyoobe kili kukila kukosa. Kiketekelo kyoobe kili kukukwasia kumusaansamusia Yehova. (Baebrania 11:1, 6) Kili kukukinkizia kulapila ni kupilibuka. Kukita evio kuli kuwamia buikazi boobe.—Soma Miilo 3:19.
2. Kunti wabakwasia siani baange kupitila bintu biwakisambilila palwakue Leeza?
Kunti waipeela kuli Yehova kupitila lipepo ni kukita bukibuza bwa peepi saana nakue
Fwe boonse tuli twatona kubalondoluelako baange mpunda iweeme. Pakaako, ni weewe uli kutona kubabwilako baange bintu biwasambilila, kabili i vikili kyasaangua. Kine watwalilila kusambilila Bibilia, wakaba kumana vya kuibombia eevi kulondoluelako baange kiketekelo kyoobe kuli Yehova ni kubabuila mpunda iweeme ifumine kuli weene.—Soma Baroma 10:13-15.
Beengi bali babamba kulondolola palua mpunda iweeme na babibuza baabo ni bantu ba mu lupua lwabo. Walanda sie naabo buino kabili wabakindikile. Paali pa kubalanda bantu ba mu lupua loobe nangue kanisa kaabo ni ka bufi, balondoluele palua bulayo bwakue Leeza. Inzi, wamanine eevi, bantu bakaba kutona saana kine walanda naabo mu nzila iweeme kuliko beelia biwakaba kubabuila.—Soma 2 Timoteo 2:24, 25.
3. Wakaba kukita bukibuza bwa siani pamo ni Leeza?
Kusambilila Bibilia kwakaba kukukwasia utwalilile kukita buyantaanzi. Pa mpelezio, wakaba kwaluka ni bukibuza bwa peepi saana pamo ni Yehova. Wakaba kwingila mu lupua lwakue.—Soma 2 Bakorinto 6:18.
4. Kunti watwalilila siani kukita buyantaanzi?
Kine watwalilila kusambilila Mulandu Wakue Leeza, wakaba kukila kukita buyantaanzi kakiine. (Baebrania 5:13, 14) Mulande Kasininkizia Wakue Yehova asambilile Bibilia pamo ni weewe mu kitabu Biblia Inatufundisha Nini? Kine watwalilila kusambilila Mulandu Wakue Leeza, buikazi boobe bwakaba kukila kwaluka ni nsaansa.—Soma Malumbo 1:1-3; 73:27, 28.
Mpunda iweeme ilondolwelue mu eezi broshua ifumine kuli Yehova, Leeza wa nsaansa. Kunti wamupalama Leeza kine wabapalama bantu bakue. (Baebrania 10:24, 25) Kine waikwinda kukita bintu bitonene Leeza, uli kwingila mu nzila ya bukose bwa kisinka, i kulanda nangue bukose bwa loonse. Ewee, kumupalama Leeza i kintu kya mana saana kiupalile kukita!—Soma 1 Timoteo 1:11; 6:19.