Te Kwimona Kuya Wali wa Mana Sana nga Bengi mu Kenu Kyalo
MU KENU kyalo, bantu bengi bali bamona nangue bapalile kukitilua mu nzila iibeleele kuliko bange. Kya bulanda, ata sie kine bakitilua mu nzila iibeleele, bali batwalilila sie kumona nangue bapalile kukitilua kabili mu nzila inge ya pa muulu sana. Bantu baalia bali batontonkania evio, bali baimona kuya bali ba mana sana kuliko bange, kabili bali balangilila nangue tebezi kutasia palua belia bibakwete. Ezio ni mibele yaalandile Bibilia nangue bantu bakaba bali nayo mu nsiku ya mpeleezio.—2 Tim. 3:2.
Kulanda kisinka, mibele ya muntu ya kwimona kuya wali wa mana kuliko bange te itendekele lonu. Kwa mufuano, ba Adamu ni Eva baapingwile kwisaakwila bo bene biweme ni bibipile, ni kekio i kilengiizie tuye twaema lonu. Mufuano unge ni wakue Uzia, Likolo wa mu Yuda. Wene waamwene nangue abanga wali ni nsambu ya kuzizia buvumba mu ekalu, inzi kekio kibanga kilubo kikata sana. (2 Mil Nsi. 26:18, 19) Ba Mafarisayo pamo ni ba Masadukayo ni bene babanga bakita enka evio. Pantu sie Abrahamu abanga wali babu wabo, babanga bamwene nangue Leza abanga wapalile kubakitila mu nzila iibeleele kuliko bange.—Mat. 3:9.
Tuzyungulukiilue na bantu bali baimona kuya bali ba mana kuliko bange, ni mibele yabo kunti yatwambukila ni fwefue. (Bag. 5:26) Kunti twatendeka kutontonkania nangue tupalile kupeelua miilo iibeleele, ao kukitilua mu nzila inge iibeleele. Kunti twakita ki evi te kunti twaluke nga bene? Kya kwanza, tupalilenke kukeba mawazo akue Yehova palua kekio. Mafunde abili ali mu Bibilia kunti atukwasia.
Yehova i ali wapingula bintu bitupalile kupeelua. Tumone mifuano paleepale.
Kukonkana ni mupango wakue Yehova palua lupua, mulume apalile kwiunvua nangue akindikilue na mukazi wakue, ni mukazi apalile kwiunvua nangue atonenue na mulume wakue. (Baef. 5:33) Ba mulume ni mukazi bapalile kulangililana ntono. (1 Bakor. 7:3) Bana bapalile kubakindika bavyazi babo, kabili bavyazi bapalile kubeemena ni kubakwasia bana babo.—2 Bakor. 12:14; Baef. 6:2.
Mu kilonghaano, bakote bali babomba sana. Pa kako, tupalile kubakindika. (1 Bat. 5:12) Anzia evio, bakote te bali na nsambu ya kubateeka lusaba ba lupua ni ba nkazi.—1 Pet. 5:2, 3.
Leza waabapeele bantu ba mu buteeko nsambu ya kusonkia bitansi, kabili bapalile kukindikua palua miilo ibali babomba.—Bar. 13:1, 6, 7.
Kwa ntono, Yehova ali watupeela bintu bingi kuliko vitupalile. Pantu tuli ba mazambi, tupalile sie kufua. (Bar. 6:23) Anzia evio, Yehova ali watupeela mpaalo ingi sana pantu wene ali ni ntono ya kisinka kuli fwefue. (Malum. 103:10, 11) buwame bwakue busipalilue i buli bwalengia atupeele mpaalo yoyonse, lisyuko, ao miilo yoyonse ituli twabomba mu kilonghaano.—Bar. 12:6-8; Baef. 2:8.
NI KIKI KILI KUTUKWASIA EVI TE KUNTI TWIMONE NANGUE TULI BA MANA SANA KULIKO BANGE?
Uye wakengeele evi te kunti uye watontonkania nga bantu ba mu kenu kyalo kyakue Sataana. Kine te tukengeele, kunti twatendeka kutontonkania nangue bantu bapalile kutukindika sana. Evi kulangilila nangue ni fwefue kunti twatendeka kutontonkania evio, Yesu waabombiizie mufuano wa babombi baalia babanga bali ba kulipua dinari palua miilo ibaapelue. Babombi bamo baatendekele kubomba lukele-keele sana, kabili baabombele koba konse ata sie musita koba lukabanga kaseeme sana; inzi bange baabombeleko sie nsa imo. Pantu baalia babombi ba mu kikundi kya kwanza baabombele sana, baatontonkaniizie nangue bene babanga bapalile kulipua dinari ingi sana kuliko benabo ba mu kikundi kya bubili. (Mat. 20:1-16) Yesu waabombizie ozo mufuano evi kulangilila nangue basambi bakue bapalile kurizika na belia byonse bibali bapeelua na Leza mu kutona kwakue.
Balalume baalia baabombele koba konse baamwene nangue babanga bapalile kulipua dinari ingi kuliko benabo.
Uye watasia, te kuya walomba-lomba. (1 Bat. 5:18) Mupale mutumua Paulo, wene taabalombele ba lupua ba mu Korinto bintu bya kumukwasia kimubili ata sie kine abanga wali ni nsambu ya kukita evio. (1 Bakor. 9:11-14) Tupalile kutasia palua mpaalo yonse ituli twapata, kabili te tupalile kuya twalomba-lomba.
Mutumua Paulo taalombele bamupeele bintu bya kumukwasia
Uye waikeefiizie. Kine muntu watontonkania sana pa lwakue ye mwine, lingi ali wafikiila kutendeka kumona nangue apalile kupata bintu bingi kuliko belia byakwete. Mibele ya kwikeefia kunti yatukwasia evi te kunti tuye twatontonkania evio.
Yehova waamumwene kabika Danieli kuya wali wa mana pantu abanga waikeefiizie
Kabika Danieli ni mufuano uweme sana wa kwikeefia. Kuvyalua mu lupua lwa mana, kufwanina kwa lukebu, mano akue, pamo ni buvinde bunge bwabanga wali nabo, nga byaamulengiizie emone nangue abanga wapalile kukitilua mu nzila iibeleele ni kuya wali ni madaraka alia abanga wali nao. (Dan. 1:3, 4, 19, 20) Kuliko kukita evio, Danieli waatwaliliile kuya waikeefiizie. Pantu abanga ni mibele ya kwikeefia, Yehova waamumwene kuya wali wa mana.—Dan. 2:30; 10:11, 12.
Kansi, te kunti tuye twaimwene nangue tuli ba mana sana, nga vili vyaimona bantu bengi mu kenu kyalo. Kuliko kukita evio, tutwalilile kupata nsansa ao kusekelela mpaalo ili yatupeela Yehova kupitila buwame bwakue busipalilue.