Suunga Buumo bwa mu Kilonghaano

Musita utuli twaya twali pamo ni bazumizi neetu, tuli twaiunvua nga vyaaiunvuile Likolo Daudi, waalandile eevi: “Kiweeme saana kabili kili kyasaansamusia saana balupua kwikala pamo mu buumo!” (Malumbo 133:1) Buumo bwetu tebuizi kwiizilasie bwine. Kila muntu pakati keetu, apalile kukita bintu bili kukwasia kusuunga buumo.

1. Ni kintu ki kili kyapapia saana kili kyamoneka pa bantu bakue Leeza?

Kine waya kulonghaana mu kilonghaano kili mu kazonga kange, kunti waandua kunvua lulimi luli mukulandua mu kilonghaano. Inzi uli kuya waiunvuile buino. Juu ya ki? Paantu tuli twabombia mpapulo imonke pa kusambilila Bibilia. Kabili, tuli twaikwinda kulangililana ntono. Fwe bonse, atasie kine twikeele pi, tuli ‘twakuutila liina lyakue Yehova, eevi kumupupa weene mu buumo.’​—Zefania 3:9, bulondolozi bwa pensina.

2. Kunti wakita ki eevi ukwasie kuleeta buumo?

“Tonane saana na mitima yeenu yonse.” (1 Petro 1:22) Kunti wabombia siani leeli lisoke? Te kupooza maano ku mibeele ibiipile ya bantu bange. Inzi, pooza maano ku mibeele yabo iweeme. Kabili, te kunti uye wapisiasie musita pamo ni bantu bali nga weewe ao bali batona beelia biuli watona. Inzi, ikwinde kubamana balupua ni bankazi bali ni aali ya buikazi ipuseene ni yobe ao bafumine mu seemu inge ya kyalo. Kabili, tupalile kulekela mibeele ya bukapatulula kine tuli naayo.​—Some 1 Petro 2:17.a

3. Kunti wakita siani kine te uli mukunvuana ni Mukristu nobe?

Tuli mu buumo, inzi te tupuililikile. Musita unge, tuli twationana mutima ao kukisiana. Pakaako, Bibilia ili yatulanda nangue “kine umo wamikitila kibiipile, mweleele.” Yaongezia eevi: “Eleelane nga evelia Mulopue vyaamyeleele.” (Some Bakolosai 3:13.) Tuli twamuluvia Yehova mara ingi saana, inzi ali watweleela. Pakaako, akebele ni fwefue tuye twaeleela balupua ni bankazi betu. Kine weewe walanguluka nangue wakimuluvia muntu umo eevi, kwata mupaango wa kunti muye munvuane ni kupuisia buavia.​—Some Mateo 5:23, 24.b

TUKEBE SAANA

4. Lekela bukapatulula

Tutonene kuya twabatonene balupua bonse pamo ni bankazi betu. Inzi, kunti twaandua kumutona muntu unge amwenekele nangue tali nga fwefue. Ni kiki kili kutukwasia? Some Miilo ya Batumua 10:34, 35, kisia londoluele beebi biipuzio:

• Yehova ali waitabizia bantu ba aali yonse baaluke Bakasininkizia bakue. Weewe, kunti wakoonka siani mufuano wakue kukoonkana ni viuli wabamona bantu bange basili nga weewe?

• Pa fuasi pa wikeele, bantu bali ni bukapatulula bwa siani? Juu ya ki upalile kutiina bobo bukapatulula?

Some 2 Bakorinto 6:11-13, kisia londoluele keeki kiipuzio:

• Kunti wakita ki eevi ukile kuya watwaliliile kubatona saana balupua ni bankazi bonse?

5. Uye waeleelana mu kwitonena kabili uye wakita mutende

Yehova ali watweleela mu kwitonena anzia kine te kuli ata busiku bumo bwaakaba wakebele fwefue tumweleele. Some Malumbo 86:5, kisia londoluele beebi biipuzio:

• Leeli lileembo, lyatusambilizia ki palua kweleela kwakue Yehova?

• Eba, uli watasia juu ya kweleela kwakue Yehova? Juu ya ki?

• Ni aali ki ili kulengia paange iye yakolele kukita mutende pamo ni bange?

Kunti twakita ki eevi tukoonke mufuano wakue Yehova ni kutwalilila kuya twali ni buumo pamo ni balupua ni bankazi neetu? Some Tuswalo ni Mafunde 19:11, kisia londoluele keeki kiipuzio:

• Kine muntu wakulanda kintu kya kukukisia ao wakulengia ufiitue, weewe kunti wakita ki eevi mupuisie aali ya kusyunvuana?

Musita unge, tuli twalengia bange bafiitue. Kine twalengia bange bafiitue, tupalile kukita ki? Mone VIIDEO, kisia londoluele keeki kiipuzio.

VIIDEO: Kukita Mutende Kuli Kwaleeta Mpaalo (6:01)

• Mu eezi viideo, ozu nkazi waakitile ki eevi kukita mutende pamo ni bankazi bange?

6. Keba mibeele iweeme ku balupua ni bankazi bobe

Musita utuli twabamana balupua ni bankazi beetu, tuli twamana mibeele yabo iweeme ni mibeele yabo ibiipile. Kunti twakita siani eevi tupooze maano ku mibeele yabo iweeme? Mone VIIDEO, kisia londoluele keeki kiipuzio.

VIIDEO: Ikwinde Kwaluka ni Mibeele Iweeme! (5:10)

• Ni kiki kili kukukwasia eevi umone mibeele iweeme ya balupua ni bankazi bobe?

Yehova ali wapooza maano ku mibeele yeetu iweeme. Some 2 Milandu ya Nsiku 16:9a, kisia londoluele keeki kiipuzio:

• Waiunvua siani kumana nangue Yehova ali wapoozako maano ku mibeele yobe iweeme?

MU KIFUPI

Uli kukwasia kusuunga buumo bwa mu kilonghaano kine wabeleela ni kubatona balupua ni bankazi bobe bonse.

Kunti waasuka siani?

• Ni kiki kili kukukwasia ulekele bukapatulula?

• Wakaba kukita siani kine waandua kunvuana ni Mukristu nobe?

• Eba, watona kukoonka mufuano wakue Yehova wa kweleela bange? Juu ya ki?

MANAKO NI BINGE

Mona mufuano waaleetele Yesu viuli kutukwasia tutiine kubapingula bange.

Fumia Liboriti (6:56)

Eba, tupalile kuloomba muntu atweleele anzia kine twaimona nangue te twakimuluvia?

“Kupapaata Ni Nfungulo ya Kuleeta Mutende” (Lupungu Lwakue Kamwenenena, lwa 01/11/2002)

Mona balalume babili baakuliile mu fuasi mubanga bukapatulula bwa rangi ya mpapa vibaalukile ni buumo bwa kisinka.

Johny ni Gideon: Te Baali Baunvuana, Inzi Loonu Ni Balupua (6:42)

Mona bintu bya kukita eevi upuisie kusyunvuana kobe pamo ni lupua ao nkazi ntaanzi buavia bwenu tebunavulunghanie mutende wa mu kilonghaano.

“Puisia mu Ntono Kusyunvuana Kwenu” (Lupungu Lwakue Kamwenenena, lwa Muezi wa 05, 2016)