Juu ya ki Yesu Amwene Liina Lyakue Yehova Kuya Lyali lya Mana Sana?

1-2. (a) Yesu waakitile ki mu nsita ya busiku ntanzi tebanamwipaye? (b) Mu leli lyasi, tuli kwasuka bipuzio ki?

NSIKU ya Ine, busiku, mu Nisani 14, mwaka wa 33, Yesu abanga wali pepi ni kupaanua, kupingulua, kutesua, ni kwipaiwa. Paapitile sie musita unini kisia wene kupua kulia kyakulia kiibeleele pamo ni batumua bakue ba kisinka. Kisia kupua kulia kekio kyakulia, Yesu waabalandile batumua bakue milandu ya kubalaya evi kubakoselezia. Kabili, musita unini ntanzi bonse tebanafume mu kekio kiyumba kya pa muulu, Yesu waapepele lipepo lya mana sana. Lelio lipepo lili mu lilembo lya Yoane katue ka 17.

² Kuwaza palua kintu kibanga kyamwemia Yesu, kelia kyaalandile mu lelio lipepo ntanzi tanafue, kunti kyatusambilizia ki? Lelio lipepo lilangiliile nangue ni kintu ki kibanga kyali kya mana kuli wene lwabanga wali panu pa kyalo? Lekela tumone byasuko bya bebi bipuzio.

“NAABABWILILE LIINA LYOBE”

3. Yesu waalandile ki palua liina lyakue Yehova, kabili milandu yakue ili na mana ki? (Yoane 17:​6, 26)

³ Mu lipepo lyakue, Yesu waalandile evi: “Naababwilile liina lyobe.” Lelio liina libanga lyali lya mana kuli Yesu pantu waalandile ezio milandu mara ibili. (Soma Yoane 17:​6, 26.) Milandu yakue ili na mana ki? Eba, waabawilile basambi bakue liina lelia libasibanga bamanine? Basambi bakue Yesu babanga Bayuda, pa kako babanga bamanine nangue liina lyakue Leeza ni Yehova. Mu malembo a Kiebrania, lelio liina lilimo mara elufu saba evi (7 000). Pa kako, Yesu tabanga walandila sie palua liina lyakue Leeza, Yehova, inzi abanga wakeba kubasambilizia palua bumuntu bwine bwakue Yehova. Yesu waabakwasiizie basambi bakue bamumane bwino sana Yehova, kubiika mukati kutona kwakue, bikitua byakue, pamo ni mibele yakue. Waakitiile evio mu nzila elia isyaavindilepo muntu ata umo.

4-5. (a) Kunti twabombia mufuano ki juu ya kulondolola mana ya kumana liina lya muntu? (b) Ni kiki kyaabakwasiizie batumua bakue Yesu baafikiile kumumana bwino sana Yehova?

⁴ Kwa mufuano, waza mukote umo wa mu kilonghaano kyenu, olia ali wakuutua David, ni doktere. Kabili, tekusyapitile myaka ingi tangia lumwaamaneene. Kisia, busiku bumo wewe wakita aksida, ni kekio kyalomba uleenge utunzue pantu bukose bobe buli mu atari. Bakutwala lubilo ku opitali kolia kuli kwabomba ozo lupua, kisia wene wabombia bufundi bwakue bwa kutunza evi kupususia bukose bobe. Kulanda kisinka, kisia papo uli kutendeka kumona liina lyakue ozo lupua kuya lyali lya mana sana kuli wewe kuliko lwa ntanzi. Kukila pa kako, teukiya wamumwene sie David nga mukote olia uumanine bwino, inzi kabili uli kuya wamumwene nangue i doktere olia waakikupususia.

⁵ Enka evio, basambi bakue Yesu ni bene babanga bamanine nangue liina lyakue Leeza ni Yehova. Inzi, lelio liina lyaalukile lya mana sana kuli bene pantu Yesu waabakwasiizie bamumane bwino sana Yehova. Juu ya ki twalanda evio? Pantu Yesu abanga walangilila mibele yakue Baba wakue mu kila kintu kyabanga walanda ni kukita. Pa kako, Batumua bakue Yesu lubaatwiliziizie masambilizio akue ni kumona vyabanga wabakitila bantu, kekio kyaalengiizie baafikiile ‘kumumana’ bwino sana Yehova.—Yoan. 14:9; 17:3.

“LIINA LYOBE LIWAAMPEELE”

6. Yesu abanga wakeba kulanda ki musita lwaalandile nangue Yehova waamupeele liina lyakue? (Yoane 17:​11, 12)

⁶ Yesu waapepele evi palua basambi bakue: “Nalomba ubalabukile na maka a liina lyobe liwaampeele.” (Soma Yoane 17:​11, 12.) Eba, Yesu abanga wakebele bantu batendeke kumukuuta wene nangue Yehova? Ata. Mana nangue Yesu lwaalandiile palua liina Yehova, waalandile nangue “liina lyobe.” Pa kako, liina lyakue Yehova te lyaalukile liina lyakue Yesu. Ale Yesu abanga wakeba kulanda ki musita lwaalandile nangue Yehova waamupeele liina lyakue? Kya kwanza, Yesu waatuminue na Yehova evi aye wamulandila. Yesu waaizile mu liina lyakue Baba wakue, kabili abanga wakita bimpezia mano kupitila mu lelio liina. (Yoan. 5:43; 10:25) Kya bubili, liina Yesu lili na mana ya “Yehova I Bupusuko.” Pa kako, mu mana ya liina lyakue Yesu muli ni liina Yehova.

7. Juu ya ki Yesu abanga wali ni buvinde bwa kumulandila Yehova? Leta mufuano.

⁷ Evi tunvwisie juu ya ki Yesu waavindile kumulandila Yehova, tuwazenke palua ozu mufuano. Kateeka kunti wamutuma muntu aye alande ni bantu bange pa lwakue. Kulanda kisinka, milandu yakue ozo muntu ili kuya yali ni buvinde nga milandu yakue kateeka olia wamutumanga. Pa kako, Yesu ni wene abanga wali ni buvinde bwa kumulandila Yehova pantu Yehova wenka i waamutumine.—Mat. 21:9; Luk. 13:35.

8. Ntanzi Yesu tanaize panu kyalo, liina lyakue Yehova libanga lyali “muli” wene mu mana ki? (Kufuma 23:​20, 21)

⁸ Bibilia ili yamukuuta Yesu nangue “Mulandu” pantu Yehova abanga wamubombia evi kubabwila ba malaika pamo ni bantu bintu byabanga watona bamane ni kukita. (Yoan. 1:​1-3) Pange Yesu i malaika olia waatuminue na Yehova evi kubeemena ba Israeli musita ubabanga bafuma ku Misri. Musita lwaabalandile Baisraeli bamunakile ozo malaika, Yehova waalandile evi: “Pantu liina lyane lili muli wene.”a (Soma Kufuma 23:​20, 21.) Liina lyakue Yehova libanga lyali “muli” Yesu mu mana ya kulanda nangue Yesu i mukenzi ao kikula wakue Yehova, kabili wene i ali wasakila ni kuswesia liina lyakue.

“WE TAWE, LUMBA LIINA LYOBE”

9. Juu ya ki Yesu abanga wamwene liina lyakue Yehova kuya lyali lya mana sana? Londolola.

⁹ Nga vitwamona, ata sie ntanzi Yesu tanaize panu pa kyalo, wene abanga wamwene liina lyakue Yehova kuya lyali lya mana sana. Waalangiliile evio mu byonse byabanga wakita lwabanga wali panu pa kyalo. Ku mwinsio-mwinsio wa miilo yakue panu pa kyalo, Yesu waamulombele evi Yehova: “We Tawe [ao Baba], lumba liina lyobe.” Penka palia, Baba wakue waamwasukile evi na lizui likata sana: “Naalilumbile, kabili nakalilumba.”—Yoan. 12:28.

10-11. (a) Yesu waalumbile liina lyakue Yehova mu nzila ki? (Mona ni foto.) (b) Juu ya ki liina lyakue Yehova lipalile kuswesiiwa ni kusakilua?

¹⁰ Yesu ni wene waalumbile liina lyakue Baba wakue. Mu nzila ki? Waababwilile bange mibele ya kupapia pamo ni bikitua byakue Baba wakue. Inzi, taapeleele sie pa kukita evio. Liina lyakue Yehova libanga lyapalile kuswesiiwa, kabili sifa yakue ni yene ibanga yapalile kusakilua.b Yesu waalangiliile nangue waamwene kukita evio kuya kwali kwa mana musita lwaabasambiliziizie basambi bakue lipepo lya mufuano. Waalandile evi: “We Baba wetu wa ku muulu, liina lyobe liswesiiwe.”—Mat. 6:​9, NWT.

¹¹ Juu ya ki liina lyakue Yehova lipalile kuswesiiwa ni kusakilua? Pantu mu busitani bwa Edeni, Sataana Kibanda waafisiizie liina lyakue Yehova Leeza kupitila kulanda bya bufi pa lwakue. Sataana waalandile nangue Yehova ni wa bufi, kabili nangue abanga wabatana bintu biweme ba Adamu ni Eva. (Kut. 3:​1-5) Kabili, Sataana waalandile nangue nzila yakue Yehova ya kutungulwilamo te ibanga yaweme. Pantu Sataana waalandile bya bufi pa lwakue Yehova, kekio kunti kyalengia bantu batendeke kuwaza nangue Yehova ni muntu abipile. Kisia papo, mu nsiku yakue Yobu, Sataana waalandile nangue bantu bali bamubombela sie Yehova pantu Wene ali wabapaala. Kabili, bobo bufi bulangiliile nangue bantu kunti balekela kumubombela Yehova kine bapata maavia pantu te bamutonene kakiine. (Yob. 1:​9-11; 2:4) Kyaalombele musita upitepo evi pakati kakue Yehova ni Sataana pamanike kine wa bufi nani.

“NE MPEENE BUKOSE BWANE”

12. Pantu abanga watonene liina lyakue Yehova, Yesu waapingwile kukita ki?

¹² Pantu abanga watonene liina lyakue Yehova, Yesu waapingwile kukita kintu kyonse kyabanga wali ni buvinde bwa kukita evi kuliswesia ni kulisakila. Wene waalandile evi: “Ne mpeene bukose bwane.” (Yoan. 10:​17, 18) Kulanda kisinka, wene waapingwile kufwilapo evi kulisakila ni kuliswesia.c Nga vitumanine, bantu babili ba kwanza, baalia babanga bapwililikile, i kulanda, ba Adamu ni Eva, baapingwile kuya ku lubali lwakue Sataana kuliko kumunakila Yehova. Inzi, Yesu wene waapingwile kwiza panu pa kyalo evi kulangilila nangue abanga wamutonene Yehova. Yesu waalangiliile evio kupitila kumunakila Yehova mu bintu byonse byabanga walanda ni kukita. (Baeb. 4:15; 5:​7-10) Waatwaliliile kuya wali wa kisinka mu bwikazi bwakue bonse mpaka lwaafwile pa kimuti kya mateso. (Baeb. 12:2) Pantu waakitile evio, wene waalangiliile vyamutonene Yehova pamo ni Liina lyakue.

13. Juu ya ki Yesu sie i abanga wali muntu wa kusininkizia nangue Sataana ni wa bufi? (Mona ni foto.)

¹³ Bintu byonse byaakitile Yesu byaasininkiziizie paswetele nangue Sataana i wa bufi, apana Yehova. (Yoan. 8:44) Te kubanga kwali muntu ata umo abanga wamumanine bwino sana Yehova kumupita Yesu. Mu belia byaalandile Sataana mubenge mwali ni kisinka, Yesu nga waamanine. Inzi, Yesu waapingwile kutwalilila kusakila sifa yakue Yehova, i kulanda, liina lyakue. Ata sie kine kyaamwenekele nangue Yehova waamusiile, wene waapingwile kufua ni kutwalilila kuya wali wa kisinka kuli Baba wakue wa ntono.—Mat. 27:46.d

“MIILO YA KUBOMBA IWAAMPEELE, NAAKIIBOMBA”

14. Pantu Yesu abanga wali wa kisinka, Yehova waamupaalile syani?

¹⁴ Nsita ya busiku, ntanzi tanafue, Yesu waapepele evi: “Miilo ya kubomba iwaampeele, naakiibomba.” Abanga waswapiile nangue Yehova wakaba kumupaala pantu abanga wali wa kisinka. (Yoan. 17:​4, 5) Yesu abanga wali ni nsambu ya kumuswapila Baba wakue. Yehova taamulekeleele asyale lonse mu mankabuli. (Miil Bat. 2:​23, 24) Wene waamutuntumwine ni kumupeela cheo ya pa muulu sana ku muulu. (Baf. 2:​8, 9) Kupwako, Yesu waabambile kuteeka wali Likolo mu Buteeko Bwakue Leeza. Bobo Bukolo bwakaba kukita ki? Mu semu ya bubili ya lipepo lyakue lya mufuano Yesu waalandile evi: “Bukolo bobe bwize. Kutona kobe [Yehova] kukitike pa kyalo, nga vikuli mukukitika ku muulu.”—Mat. 6:​10, NWT.

15. Ni biki binge kyakaba kukita Yesu mu Bukolo Bwakue Leeza?

¹⁵ Lenu sie, Yesu wakaba kulwana ni balwani bakue Leeza, kabili wakaba kubenoona babifi pa Armagedoni. (Nfy. 16:​14, 16; 19:​11-16) Musita unini kisia papo, Yesu wakaba kumupoza Sataana mu “abiso”; momo takaba kuya wali na buvinde bwa kukita kintu ata kimo. (Nfy. 20:​1-3) Yesu wakaba kubwezia mutende ni kupwililika kwa bantu mu Buteeko Bwakue bwa Myaka Elufu Imo. Wakaba kubatuntumuna bafwile. Wakaba kwalula kyalo kyonse paradiso. Kutona kwakue Yehova kwakaba kukitika!—Nfy. 21:​1-4.

16. Ni biki byakaba kukitika kisia Buteeko bwa Myaka Elufu Imo?

¹⁶ Ni kiki kyakaba kukitika kisia Buteeko bwa Myaka Elufu Imo? Bantu te bakaba kuya bali kabili ni lizambi; kabili bakaba kupwililika. Kukila pa kako, te bakaba bali kabili ni lazima ya kumulomba Leeza abeleele mazambi kupitila kilubula-mulandu. Kabili, te bakaba kuya bali ni koani ao muntu wa kubapatanisia kuli Leeza. Ni “lufu, lolia lwaaletele [Adamu], i mulwani wakaloviiwa [ao kwinoonua] pa mpeleezio.” Mu mankabuli temukaba kantu. Bafwile bakaba kutuntumunua. Bantu bonse pa kyalo bakaba kupwililika.—1 Bakor. 15:​25, 26.

17-18. (a) Ni biki byakaba kukitika kisia Buteeko bwa Myaka Elufu Imo? (b) Yesu wakaba kukita ki musita wakue wa kulekela kuteeka luwakaba kukumana? (1 Bakorinto 15:​24, 28) (Mona ni foto.)

¹⁷ Ni kiki kinge kyakaba kukitika kisia Buteeko bwa Myaka Elufu Imo? Mu ozo musita, kintu kimo kiibeleele kyakaba kukitika. Lyasi palua kuswesiiwa kwa liina lyakue Yehova lyakaba kupua. Juu ya ki twalanda evio? Mu busitani bwa Edeni, Sataana waalandile nangue Yehova ni wa bufi, kabili nangue tezi kubateeka bwino bantu pantu tabatonene. Ntangia lolo, baalia bonse bali bamunakila Yehova ni kumukindika bali bakwasia kuswesia liina lyakue. Pa kako, kisia Buteeko bwa Myaka Elufu Imo, sifa yakue Yehova yakaba kusakilua mu nzila ipwililikile. Baba wetu wa ku muulu Yehova wakaba kulangilila paswetele kakiine nangue wene ni Leeza wa ntono.

¹⁸ Ku mwinsio, bantu bonse bakaba kusininkizia nangue bintu byonse byaalandile Sataana pa lwakue Yehova ni bya bufi. Eba, Yesu wakaba kukita ki musita wakue wa kulekela kuteeka luwakaba kukumana? Eba, wakaba kukonka mufuano wakue Sataana ni kumusangukila Yehova? Ata, takaba kukita evio! (Soma 1 Bakorinto 15:​24, 28.) Yesu wakaba kumubweziizia Baba wakue Bukolo. Wene wakaba kunakila buteeko bwakue Yehova. Kulanda kisinka, kupusana ni Sataana, Yesu apingwile kumusiila Yehova kila kintu pantu amutonene.

19. Juu ya ki Yesu amwene liina lyakue Yehova kuya lyali lya mana sana?

¹⁹ Yehova abanga wali ni nsambu ya kupingula kumupeela Yesu liina Lyakue! Juu ya ki? Pantu wene waalangiliile mu nzila ipwililikile vili Baba wakue. Pa kako, juu ya ki Yesu amwene liina lyakue Yehova kuya lyali lya mana sana? Pantu amwene lyakilile kila kintu. Waapingwile kufwilapo pa lelio liina, kabili wakaba kupingula kumubweziizia Yehova kila kintu kisia Buteeko bwa Myaka Elufu Imo. Kunti twakonka syani mufuano wakue Yesu? Twakaba kupata kyasuko kya kekio kipuzio mu lyasi likonkelepo.